April—Okenọ A Re Ro w’Ọwhọ kẹ Iruo Ezi!
1 Nọ ofou ọwhibo ọ tẹ be kẹle oria nọ ahwo buobu a be rria, evaọ abọ jọ akpọ na, ẹgwọlọ nọ a rẹ rọ vẹvẹ ahwo unu kpahe enwoma nọ e be kẹle otọ na o rẹ jọ kpatakpata. Epanọ ofou ọwhibo na ọ kẹle te, ere unuovẹvẹ na o rẹ ga te. Fikieme? Keme izuazọ ahwo e rrọ awa! Ẹsejọhọ ahwo jọ a yo unuovẹvẹ nọ e vrẹ no na ha. O sae jọ nọ amọfa a yo rekọ a rri rie vo re a jowọ. Epọvo na o rrọ kpahe unuovẹvẹ Ọghẹnẹ nọ a vi omai nọ ma woro taure “ẹkporo ologbo” ofu okiẹrẹe Ọghẹnẹ o te ti fou ehẹhẹ akpọ omuomu nana kpobi kufiẹ. (Itẹ 10:25) Uzuazọ ebẹdẹ bẹdẹ ahwo ima-idu buobu e rrọ awa! A re woro unuovẹvẹ na hrọ. Ma rẹ roma kẹ ‘iruo iwoma iruo avọ ọwhọ’ hrọ.—Tait. 2:11-14.
2 Anwọ ikpe buobu na, a fi ọwhọ họ ahwo Jihova oma no re a ru ezi Ekareghẹhọ na fihọ oke ọwhọ obọdẹ evaọ odibọgba na. Evaọ uvewhru ọ 1939, Informant na, onọ a rọ Odibọgba Uvie Mai nwene na, o kẹ uduotahawọ onana: “Nọ uvewhru u bi te na, avọ oke oghraghra na, ma re rẹro nọ iwhowho-uvie ukoko a ti ru euwa usiuwoma ota na bu akuava, yọ oke ekobaro u ve je bu ziezi. April yọ amara nọ o wo Ẹdoka isoi. O te je wo Ẹdẹ-Ọmaha isoi re. Ru Ẹdẹ-Ọmaha gbe Ẹdoka kpobi evaọ April . . . fihọ oke isẹri-ise obọdẹ.” Oyena o jọ ute use-abọ nọ a fihọ kẹ inievo na evaọ ikpe 60 nọ i kpemu! Enukpe ọnana, wọhọ epanọ o jọ evaọ 1939 na, amara ọ April o wo urere-oka evọvọ isoi. Kọ omaa vẹ who wo kẹ amara nana? Eme who kere fihọ ukeledẹ ra kẹ April 2000? M’omaa re who w’obọ ziezi evaọ iruo iwoma kugbe ahwo Jihova nọ i kiọkọ evaọ etoke obọdẹ amara ọ ẹvi iruẹru abọ-ẹzi nana.
3 Oware nọ Ma Rẹro nọ Ma Ti Rugba: Ẹdẹ nọ ọ mai w’uzou evaọ ukpe ọ 2000 na o kie fihọ amara nana. Ọye họ April 19, ekareghẹhọ uwhu Jesu. Joma daoma gaga re ma zizie ahwo buobu kpohọ Ekareghẹhọ na wọhọ epanọ ẹgba mai o te. Wọhọ epanọ a jiroro riẹ k’omai amara n’ukpo na, kere edẹ ahwo nọ a rẹ sai kpohọ Ekareghẹhọ na re whọ ruẹ nọ uvumọ ohwo o vo omai ẹro ho. Ahwo nọ a rẹ jọ usu enọ a ti zizie na họ iwhowho-uvie nọ i seri iruo-uvie họ no riẹriẹriẹ, emọ-uwuhrẹ Ebaibol, izihebro, enọ i je wuhrẹ okejọ vẹre, ibe iruo, ibe-isukulu, erivẹ, imoni, gbe egbẹrioma efa. Kọ ahwo nọ a gwọlọ nya a wo edhere nọ a sai ro t’obei? O gbẹ rrọ ere he, kọ whọ sae kẹ uketha uyoyou? Evaọ aso Ekareghẹhọ na, mai kpobi a ti wo uvẹ-ọghọ ọ ahwo nọ a nya ze nọ ma re dede rehọ ziezi. Nọ Ekareghẹhọ na e tẹ fa no, ma rẹ sae nya lele oyena ẹkwoma uketha abọ-ẹzi efa nọ ma rẹ rọ kẹ itieye na nọ i wo isiuru na.
4 Ma tẹ roma kẹ ‘iruo iwoma iruo avọ ọwhọ’ taure Ekareghẹhọ na i te ti te hayo okenọ a te ru ei vrẹ no yọ edhere owoma jọ nọ ma re ro dhesẹ kẹ Jihova nnọ ma ghine wo ovuhumuo kẹ eware kpobi nọ o ru kẹ omai no. Otẹrọnọ who bi ru ọkobaro obufihọ, whọ te gwọlọ dao ẹgba ra re whọ raha euwa 50 hayo bu viere evaọ odibọgba na. (Mat. 5:37) Nya lele omaa nọ who ru via eva emuhọ amara na kpekpekpe. (Ọtausi. 3:1; 1 Kọr. 14:40) Jọ omai otu nọ o kiọkọ a dao ẹgba mai re ma fiobọhọ kẹ ekobaro na kpobi, ẹkwoma udu nọ ma rẹ ta họ ae awọ gbe ẹkwoma iruo nọ ma re lele ai ru evaọ usiuwoma ota na. (Wawo 2 Ivie 10:15, 16.) Otẹrọnọ ma kọ avọ ọwhọ evaọ etoke April, ma rẹ sai rẹro oghọghọ ulogbo gbe oghale n’obọ Jihova ze. (Mal. 3:10) Ẹsejọhọ onana o te jọ wọhọ edhere ẹnyaharo kpohọ iruo ọkobaro obufihọ ẹsikpobi hayo iruo ọkobaro oke-kpobi. Jọ ọwhọ abọ-ẹzi nọ ma wo evaọ April na ọ nya te emerae nọ i lele i rie nọ ma gbẹ be jọ iwhowho Uvie ikẹse kẹse na.
5 Ababọ avro, idu buobu ahwo Jihova evaọ amara nana a ti muọ ebe iwuhrẹ Ebaibol efa họ. Kọ whọ gwọlọ nọ who re muọ ọjọ họ? Lẹ kpahe obe uwuhrẹ dẹẹ, je ruiruo lele elẹ ra. O rẹ sai mu owhẹ ẹro nnọ Jihova o ti wo ovuhumuo kẹ ayare omarokpotọ ra kẹ obufihọ evaọ eduku ohwo nọ o wo udu oruọzewọ nọ who re wuhrẹ.—1 Jọn 3:22.
6 Edhere ẹmeọta jọ ọ rrọ etenẹ nọ a ro ruiruo avọ obokparọ no evaọ emuhọ ẹmeọta. Whọ rẹ rehọ onọ muhọ inọ: “Kọ who roro nọ ozighi kpobi nọ ọ rrọ isukulu na yọ iruo idhivẹri, manikọ o no ababọ ewuhrẹ ọrọ eyewọ ze?” Kuvẹ kẹ uyo. Otẹrọnọ ohwo na ọ ta nọ “iruo idhivẹri,” se Eviavia 12:9, 12, je fielo họ abọ nọ Ẹdhọ o wo evaọ ẹwhaharo ọ ozighi evaọ akpọ na. Kẹsena who ve rovie ibroshọ Gwọlọ na kpohọ uwuhrẹ avọ 4, re whọ nọ sọ oria nọ Ẹdhọ o noze o be hai gbe ohwo na unu. Gbe se haro jẹ ta kpahe idhe-eme ivẹ ọsosuọ na. Otẹrọnọ ohwo na ọ salọ “ababọ ewuhrẹ ọrọ eyewọ” wọhọ oware nọ o be wha ozighi ze evaọ isukulu, se 2 Timoti 3:1-3 re whọ riobọhọ iruemu nọ e be wha ẹbẹbẹ nana ze. Kẹsena who ve rovie ibroshọ Gwọlọ na kpohọ uwuhrẹ avọ 8, se edhe-ẹme avọ 5, jẹ t’ẹme na haro. Whọ tẹ sai ru ọtamuo re who zihe, yọ who muọ edhere họ ẹgba no kẹ obe uwuhrẹ Ebaibol ikẹse kẹse kugbe ohwo na. Evaọ iweze nọ i lele i rie, nọe sọ ọ riẹ ohwo jọ nọ o wo isiuru kẹ eyo oware nọ o bi wuhrẹ na.
7 Edhere ọfa jọ nọ a rẹ rọ roma kẹ ‘iruo iwoma iruo avọ ọwhọ’ evaọ April họ re a w’obọ evaọ abọ sa-sa ọrọ usiuwoma ota na. Kọ whọ be hai roro kpahe isẹri-ise evaọ ogege-eriosehọ hayo egareji? Evaọ oria nọ a rẹ jọ hẹrẹ imoto hayo oria itreni? Hayo whọ gwọlọ dao isẹri-ise evaọ ifonu, evaọ iyẹrẹ, hayo evaọ ẹkwotọ oria eki? Eme who gbe ru iroro eyena gba evaọ amara nana ha? Jihova o ti fiobọhọ k’owhẹ wo aruọwha nọ o gwọlọ. (Iruẹru 4:31; 1 Tẹs. 2:2b) Ẹsejọhọ whọ rẹ sai ru ọtamuo re who lele ọkobaro hayo owhowho-uvie jọ nọ o wo ona evaọ abọ odibọgba enana ruiruo.
8 Ohwo kpobi nọ ọ gwọlọ ru ẹkẹ-abọ riẹ evaọ iruo isẹri-ise na vi haro o re w’obọ evaọ isẹri-isẹ ọnyakuo. Ẹsebuobu oware nọ o rẹ gwọlọ kpobi họ ohwo na nọ a re ru dhomahọ ẹmeọta ọ oma-ogbẹnyusu. Rehọ uzoẹme nọ o rrọ isiuru kẹ owhai imava ro muhọ, ẹsejọhọ evaọ edhere nọ a dhesẹ evaọ edhe-ẹme avọ 6 na. Daoma re whọ rehọ makọ umutho oke nọ u br’owhẹ ze nọ o rẹ sai vru kufiẹ ro ruiruo ziezi. Whọ rẹ sae rehọ iminiti isoi, iminiti ikpe, hayo iminiti ikpegbisoi ro ru isẹri-ise ọnyakuo re who wo erere rai.
9 Oke Iroro: Roro kpemu kpohọ obọdẹ eme nọ a dhesẹ via evaọ edrama ọ Okokohọ Ubrotọ “Ẹme Eruẹaruẹ Ọghẹnẹ” evaọ ukpe n’ukpo na. Edrama na, nọ uzoẹme riẹ o ta nọ Ovuhumuo kẹ Ukuoriọ Abọ-ẹzi Mai, u ru omai roro gaga kpahe ẹhẹriẹ nọ ọ rrọ udevie Jekọp avọ Esọ. Esọ ọ ta nnọ o wo isiuru kẹ eware abọ-ẹzi wọhọ Jekọp, rekọ iruo Esọ i dhesẹ i rie via ha. (Emu. 25:29-34) Unuovẹvẹ nọ onana o rrọ k’omai o rro gaga! Wọhọ Jekọp, joma ruẹrẹ oma kpahe kẹ omuhrowo, tube muabọ dede, rọkẹ oghale Jihova. (Emu. 32:24-29) Eme ma gbẹ rehọ April gbe emerae nọ i lele i rie kpobi na ro ru ọwhọ mai kpokpọ họ, re ma siọ ukuoriọ oghaghae abọ-ẹzi mai ba erivo?
10 “Ẹdẹ ologbo ỌNOWO na ọ kẹle i no, o te je te otọ no.” (Zef. 1:14) A re woro emamọ usi Uvie na via hrọ. Izuazọ e rrọ awa! Jọ amara nana ọ jọ ọnọ a mae ghale rọkẹ ahwo Jihova kpobi nọ ma be rehọ okugbe ọvo dhesẹ nọ ma roma kẹ ‘iruo iwoma iruo avọ ọwhọ’ na.
[Box on page 4]
Ọjọriẹ Ehaa Ekareghẹhọ
Enukpe ọnana ehaa Ekareghẹhọ na o kie fihọ Edesa-Oka, April 19. U fo re ekpako na a rẹriẹ ovao ku eware enana:
◼ Nọ a te bi fi oke họ kẹ omakokohọ na, jọ u mu owhai ẹro nọ a rẹ wọ ebrẹdi gbe udi na ha bẹsenọ ọre o re kiediwi no.
◼ Ahwo kpobi, kugbe ọnọ ọ te kẹ ovuẹ na, a rẹ riẹ uzedhe oke gbe oria ehaa na.
◼ A re wo oghẹrẹ ebrẹdi gbe udi nọ a gwọlọ na te obọ no a vẹ jẹ ruẹrẹ ae họ.—Rri Uwou-Eroro ọ February 15, 1985 (ọrọ Oyibo), ẹwẹ-obe avọ 19.
◼ A rẹ kake wha imidhe, egalase, gbe emẹjẹ avọ ohọ-emẹjẹ nọ u kiehọ ze ọgwa na a vẹ jẹ kake ruẹrẹ ae họ oria rai.
◼ A re ru Ọgwa Uvie na hayo oria ofa nọ a ti kokohọ fo tẹtẹtẹ evaọ ẹruoke.
◼ Eruẹrẹahwohọ avọ enọ e te wọ emu na a rẹ kake salọ ae jẹ kẹ ae uthubro kpahe oghẹrẹ nọ a re ru gbe ẹkẹ-iruo rai.
◼ A re ru ọruẹrẹfihọ re a wọ ebrẹdi gbe udi na se ọnọ a wholo kpobi nọ oma riẹ o ga ha nọ ọ sae nyaze he.
◼ Nọ ikoko nọ e te jọ Ọgwa Uvie ọvo ru ehaa na e tẹ vrẹ ọvo, emamọ ọruẹrẹfihọ ọ rẹ jariẹ evaọ udevie ikoko na re a siọ ahwo ba ẹkeke evaọ unuẹthẹ, edhere owotọ, gbe oria nọ a rẹ dhẹ imoto fihọ.