“Kọ Mẹ Kwa?”
1 Evaọ owojẹ kẹ ujaje Jesu re a nyai “wuhrẹ ahwo erẹwho kpobi,” idibo Jihova buobu nọ e roma mudhe no a kwa kpohọ eria nọ ẹgwọlọ na ọ jẹ mae rro nyai ruiruo no. (Mat. 28:19) A be raro kele Pọl, ọnọ ọ j’owọ kẹ use na: “Wha nyaze obọ Masẹdonia re wha fiobọhọ kẹ omai.” (Iruẹru 16:9) Ẹvẹ a sai ro ru onana evaọ edhere nọ o w’iruo?
2 J’Owọ Ọvuọvo Tao: Kọ ukoko ra u wo ẹkwotọ nọ a rẹ kake jọ ruiruo ho? Otẹrọ ere, whọ rẹ sae kpọ omadawọ ra rri eria eyena. Taure whọ tẹ te jiroro nọ who re kpohọ oria ofa, lele ekpako ra t’ẹme re whọ riẹ sọ a rri rie nọ who te epanọ whọ rẹ rọ nya. Whọ sae jẹ nọ ọsẹro okogho ra sọ ọ riẹ ukoko ekẹloma jọ nọ whọ jẹ sai ru odibọgba ra kẹre. Evaọ abọdekọ riẹ, nọ whọ tẹ romatotọ roro araha na no, whọ sai wo iroro obufihọ evaọ abọfa jọ orẹwho na hayo evaọ orẹwho ofa. Onana o tẹ rọ isiuru ra, te owhẹ te ugboma ekpako ra wha re kere kpohọ uwou ogha oria nọ whọ gwọlọ jọ ruiruo na, jẹ fodẹ edikihẹ abọ-ẹzi ra. O rẹ jọ oware areghẹ re who weze kpohọ oria na taure whọ tẹ te jiroro sọ whọ rẹ kwa kpohọ oria na riẹriẹriẹ.
3 Yọroma Kpahe Ẹkwa Kpohọ Orẹwho Ofa: Inievo mai buobu a be kwa kpohọ erẹwho efa fikinọ a be gwọlọ ẹrria uzuazọ nọ o mai woma hayo re a dhẹ no okienyẹ. Evaọ ere oruo, ejọ i kie ruọ obọ ahwo ugbarugba no enọ e y’eyaa nọ a ti fiobọhọ kẹ ae d’owọ mu evaọ orẹwho okpokpọ na rekọ a tẹ rehọ igho rai dhẹ se ae ba. Evaọ ẹsejọ ahwo nana a rẹ tubẹ gwọlọ gba enọ i kpohọ erẹwho efa na fihọ iruẹru ọfariẹ-ogbe. Nọ a tẹ se, a ve vu ae wa kẹ orẹwho nọ a kpohọ na. Fikiere uyero enọ i kpohọ orẹwho ofa na u ve yoma vi onọ a jọ evaọ orẹwho rai. Ẹsejọ a rẹ tubẹ yare inievo na re a fi ae họ uwou je fiobọhọ kẹ ae, be rehọ ere fi owha ogbẹgbẹdẹ họ uzou iviuwou Ileleikristi nọ i bi lele ebẹbẹ obọrai muabọ na. Ahwo iviuwou jọ e hẹriẹ oma no ohwohwo no, yọ iviuwou jọ i wo ewhrehe abọ-ẹzi no fiki iroro ẹkwa nọ a jẹ ziezi hi.—1 Tim. 6:8-11.
4 Otẹrọnọ whọ gwọlọ kwa fiki erere omobọ ra, kareghẹhọ nọ makọ oria nọ whọ be rria kpobi kẹhẹ, ebẹbẹ e riẹ nọ whọ te rẹriẹ ovao ku. O rẹ mae lọhọ re who fi ebẹbẹ kparobọ evaọ oria nọ whọ riẹ ẹvẹrẹ gbe uruemu-ẹwho rai no, viukpọ onọ who re muhọ evaọ okegbe nọ whọ riẹ hẹ.