“Eware Kpobi E rẹ Lọlọhọ eva Obọ Ọghẹnẹ”
1 Iruo ọsosuọ ọ ukoko Ileleikristi na họ re a whowho ovuẹ Uvie na wariẹ akpọ na họ. (Mat. 24:14) Oyena yọ iruo ilogbo. Rọkẹ ibuobu nọ e be ruẹ omai, o wọhọ nọ o gwọlọ vi oware nọ ma wo. Rọkẹ amọfa jọ, erugba iruo nana o bi gbe ai unu keme ma rẹriẹ ovao ku ẹkoko, ọwọsuọ, gbe ukpokpoma. (Mat. 24:9; 2 Tim. 3:12) Egbavro a rọwo inọ iruo nana yọ oware nọ a rẹ sai rugba ha. Dede na, Jesu ọ ta nọ: “Eware kpobi e rẹ lọlọhọ eva obọ Ọghẹnẹ.”—Mat. 19:26.
2 Emamọ Iriruo nọ A rẹ Raro Kele: Jesu o muọ odibọgba riẹ họ wọhọ omọvo nọ ọ rẹriẹ ovao ku eyero-akpọ soso. Evaọ omodawọ re a whaha iẹe ewotobọ obokparọ, ọ jọ obọ otu ọwọsuọ na ruẹ uye oghẹrẹ ẹsọ kpobi, uwhremu na a te ru ei whu uwhu-oja. Ghele na, evaọ ukuhọ riẹ, Jesu o whowho avọ udufihọ anọ: “Mẹ re ase akpọ na no.” (Jọn 16:33) Evaọ uzẹme onana yọ obokparọ igbunu!
3 Ilele Jesu a dhesẹ ẹzi aruọwha gbe ọwhọ ọvona re evaọ odibọgba Oleleikristi na. A fa ibuobu rai eviaviẹ, kpe ai ukpe ugbobọ, gbolo ai fihọ uwou-odi, je tube kpe ae dede. Ghele na, a jẹ “ghọghọ epanọ a kele ai gbe enọ ighine te erọjẹfiẹ fiki odẹ na.” (Iruẹru 5:41) Avọ ezadhe eyena, a ru iruo nọ o wọhọ nọ o lọhọ họ na gba ọrọ ewhowho emamọ usi na “rite ọnyaba akpọ na.”—Iruẹru 1:8; Kọl. 1:23.
4 Epanọ Ma rẹ Rọ Kparobọ Evaọ Ẹdẹ Mai: Ma rehọ ọwhọ ru iruo usiuwoma ota Uvie na no re evaọ aro ezadhe nọ e wọhọ nọ e lọhọ họ. Ghelọ imuẹwho, ukpokpoma, efihọ uwou-odi, gbe omodawọ ozighi efa re a d’omai obọ ji, ma be kparobọ. Ẹvẹ onana o rọ lọhọ? “Orọnọ ẹgba, hayo ogaga ha, rekọ fiki Ẹzi mẹ, ere ỌNOWO ogbaẹmo na ọ tae.” (Zek. 4:6) Avọ Jihova evaọ emu mai, uvumọ oware o rẹ sae da iruo mai ji hi!—Rom 8:31.
5 Evaọ okenọ ma tẹ be ta usiuwoma, ma wo uvumọ ẹjiroro nọ ma rẹ rọ dh’omovuọ hayo dhozọ họ hayo roro nọ ma te he. (2 Kọr. 2:16, 17) Ma wo ẹjiroro nọ i bu thesiwa nọ ma rẹ rọ nyaharo evaọ ẹvaha emamọ usi Uvie na. Avọ obufihọ Jihova, ma rẹ sai ru “eware nọ ahwo a rẹ sai ruẹ hẹ”!—Luk 18:27.