Omaa-Oma Haro—Rọkẹ Eme?

¹ Mai kpobi ma rẹ dina roro kpahe omaa mai kẹ obaro na. Enọ i wo ẹruore otọakpọ na a bi rri kparo kpohọ ẹrria ebẹdẹ bẹdẹ evaọ akpọ ọkpokpọ ẹrẹreokie Ọghẹnẹ. Rekọ ikpomahọ jọ e riẹ nọ e rẹ sae rehọ ẹruore ọyena no udu ohwo. O gwọlọ omodawọ gaga re ma hae bọ izuazọ mai wariẹ isiuru Uvie na jẹ seba ereghe ẹkwoma isiuru edawọ oma iwo na.—1 Jọn 2:15-17.

² Akpọ na ọ rẹ sai wo otoriẹ isiuru ahwo abọ-ẹzi hi. (1 Kọr. 2:14) Nọ ahwo-akpọ edekọ a be họ-oma re a wo odẹ, ogaga, hayo efe na, ma be dhẹ lele efe abọ-ẹzi. (Mat. 6:19-21) Otẹrọnọ ma daoma nwene iroro mai re e rọwo kugbe eriwo akpọ na kpahe obaro na, kọ ma te sae nyate itee abọ-ẹzi mai? U ti kri hi eware akpọ e vẹ te rehọ udu mai no riẹriẹriẹ. Ẹvẹ ma sae rọ whaha onana?

³ “Fi Ọnowo na Jesu Kristi Họ Oma”: Edhere jọ nọ ma rẹ rọ riẹ sọ ma be bọ obaro mai wariẹ isiuru Uvie na họ ẹkwoma ẹkiẹriwi ẹmeọta mai. Kọ isiuru ekwakwa efe gbe eware akpọ na ma be t’ẹme kpahe ẹsikpobi? Otẹrọ ere, ma re roro hrọ sọ udu mai u bi ku ẹrotọvi riẹ kpahe eware abọ-ẹzi fiẹ. O gwọlọ nọ ma re fiẹgba viere họ ‘ẹwhẹhọ Ọnowo na Jesu Kristi ukpenọ ma rẹ m’omaa haro kẹ urusio oma iwo na.’—Rom 13:14.

⁴ Izoge e rẹ sai ‘fi Kristi họ oma’ ẹkwoma omaa-oma haro rọkẹ ẹdẹ nọ a te rọ ruọ iruo odibọgba oke-kpobi na. A yọrọ uzoge jọ nọ ọ gwọlọ jọ ọkobaro oke-kpobi evaọ ẹwho nọ uruemu re a wo omofọwẹ abọ-ugho u bi jo wowẹ evaọ udevie izoge na. Fikiere, o te duomahọ okọ gaga te epanọ ọ be rọ rehọ udugaga kpohọ iwuhrẹ je w’obọ evaọ odibọgba na. Okenọ o muọ eva họ efihọ eme Jesu nọ e rọ Matiu 6:33 je siobọno iruo omolahiẹ nọ ọ jọ vẹre no, ọ tẹ ruọ iruo odibọgba oke-kpobi na. Enẹna, avọ emamọ iroro-oziẹbro, ọ be gọ Jihova, yọ wọhọ epanọ ọ ta riẹ, ‘te umuo ẹgba riẹ kpobi.’

⁵ Ebaibol na ọ ta nọ u fo re a m’omaa kẹ obaro na. (Itẹ 21:5) A j’omai kpobi ma ru ere avọ oreva Ọghẹnẹ nọ ma rẹ rọ karo.—Ẹf. 5:15-17.