M’Omaa Kẹ Obaro!
1 Ukoko Jihova o rẹ m’omaa ọ iruẹru uvie ikẹse kẹse nọ a ruẹrẹ họ re i ru ẹgwọlọ abọ-ẹzi mai kpobi gba. Ovuhumuo ọ rẹ wọ omai re ma rehọ eruẹrẹfihotọ na kpobi ruiruo vọvọ, wọhọ iweze ọsẹro ọnyawariẹ, ikokohọ esese gbe ilogbo, gbe obọdẹ iruẹru efa nọ a ruẹrẹ họ evaọ obonẹ. (Mat. 5:3) Dede na, ahwo jọ a re wo erere no eruẹrẹfihotọ abọ-ẹzi enana buobu ze he fiki eware efa nọ a duomahọ. Kọ eme a rẹ sai ru re a whaha onana? Ẹvẹ ma sai ro ru re iruo gheghe efa e siọ “eware nọ e mae r’oja” ba e ruru no?—Fil. 1:10, NW.
2 Omaa Areghẹ O r’Oja: Itẹ 21:5 o kẹ uduotahawọ nọ: “[Omaa] omamọ ohwo o rẹ rehọ ọruẹriọ tha, rekọ ohwo kpobi nọ o re bru okpakpa ọ rẹ te jọ ababọ eware.” Re ma wo “ọruẹriọ” abọ-ẹzi na, o gwọlọ nọ ma rẹ m’omaa kparo ziezi, wo iruẹru uvie nọ a ma fih’otọ no họ iroro. U fo re ma m’omaa ọ iruẹru obọ mai fihọ oke nọ i re ro kpeke kugbe oke ọ eghale abọ-ẹzi nọ ma re wo ho. Otẹrọnọ ma rehọ okpakpa m’omaa ro ru eware nọ ma gwọlọ, ababọ eroro kpahe iruẹru uvie nọ e rrọ obaro, ma rẹ sae ghinẹ jọ “ababọ eware” abọ-ẹzi.
3 Jọ O Vrẹ Owhẹ Hẹ! Mai kpobi ma rẹ m’omaa kẹ obaro, te oke ilivi, erẹ iruo, iweze enya kugbe imoni, gbe efa. Taure who te ti fi oma ra họ oware jọ hayo tehe utu mu omaa ra, rri omaa iruo abọ-ẹzi nọ e rrọ obaro. Otẹrọnọ who muẹrohọ nọ ọsẹro okogho ọ be tha hayo inọ a m’omaa okokohọ ọsese fihọ oke nọ whọ sae rọ jariẹ hẹ, daoma gaga re whọ wariẹ m’omaa re whọ sae jariẹ. A rẹ vuẹ omai oke krẹkri no taure iruẹru ilogbo mai nọ a m’omaa rai fihọ obaro i te te. Ekpako ukoko ra a rẹ sae ta k’owhẹ kpahe eware nọ a jọ obonẹ ma fihotọ.
4 Ẹkwoma ude-oruẹ kpobaro gbe omaa nọ ma rẹ ma fih’otọ kẹ eware nọ e mae r’oja, ma re wo “ibi ẹrẹreokie . . . rọ kẹ oruaro gbe ujiro Ọghẹnẹ.”—Fil. 1:11.