Wuhrẹ Amọfa re A Wo Erere k’Oma Rai
1 Jihova ọ gwọlọ nọ ahwo kpobi a wo erere k’oma rai. (Aiz. 48:17) Ọ riẹ oware nọ o rẹ wha uvi evawere s’omai. Isiuru egaga riẹ họ re ahwo-akpọ a whaha okpẹtu jẹ reawere uzuazọ ẹkwoma ezọgaviẹ kẹ ijaje riẹ. Izuazọ mai nọ ma bi yeri lele edhere Ọghẹnẹ o be k’omai erere gaga. (Ol. 34:8) Ẹvẹ ma sai ro wuhrẹ amọfa re a ru epọvo na?
2 Eme Ahwo A Gwọlọ? Eme ọ rrọ ọdawẹ kẹ ahwo evaọ oria nọ whọ be rria? O gbẹ rrọ nọ omofọwẹ iwou rai, edikihẹ ga orọo rai, obaro emọ rai, gbe eme itieye na? Evaọ okenọ a te wo ebẹbẹ, bovẹ a rẹ jọ gwọlọ obufihọ? A rẹ sae rẹro so omobọ rai, eruẹrẹfihotọ rọkẹ obufihọ omobọ ohwo, hayo ọkpọvio amọfa. Evaọ ere oruo, ibuobu i ve reghe no fiki ẹjiroro ubroke nọ o re ruiruo ho kpahe epanọ a re ro wo erere k’omobọ rai. Ma re ru re u mu ae ẹro hrọ inọ oware nọ Ẹme Ọghẹnẹ ọ ta evaọ edhere ọkpọvio họ onọ o mai woma kpaobọ. (Ol. 119:98) Ma rẹ sai ru onana ẹkwoma edhesẹ rọkẹ ae epanọ a sai ro ru izuazọ rai woma viere makọ enẹna otẹrọnọ a ru omodawọ re a wuhrẹ Ebaibol je fi oware nọ o ta họ iruo.—2 Tim. 3:16, 17.
3 Uzuazọ Uviuwou nọ U Wo Ẹnyaharo: Umutho ahwo ọvo a vuhu epanọ ohrẹ nọ a kẹ ẹgba eva Ahwo Ẹfẹsọs 5:22–6:4 na u re ruiruo woma te evaọ ekuhọ ebẹbẹ uviuwou. Ere o jọ kẹ imava-orọo jọ nọ e j’iroro nọ a rẹ hẹriẹ evaọ okenọ orọo rai u te ikpe ikpe no. Rekọ a te muọ uwuhrẹ Ebaibol họ kugbe aye na, a te wuhrẹ iẹ ehri-izi Ikereakere na kpahe uzuazọ orọo. U kri hi ọzae na o te muẹrohọ inwene nọ o bi ru nọ o bi fi ehri-izi Ebaibol họ iruo na, o te kuomagbe uwuhrẹ na. Ọ ta okiofa nọ: “Enẹna ma ruẹ ehri ọ uvi uzuazọ uviuwou evawere no.”
4 Uvi Ẹjiroro Evaọ Uzuazọ: Okenọ ọmoha jọ nọ imu egaga elọ e reria obọ no ọ gwọlọ obufihọ mi Isẹri na, a te wuhrẹ iẹe nnọ Jihova ọ be daezọ riẹ. Ọ tẹ ta nọ: ‘Me wuhrẹ nọ Ọnọma na o wo ẹjiroro kẹ ohwo-akpọ jẹ rehọ ẹruore uzuazọ ebẹdẹ bẹdẹ kẹ enọ i wo aruoriwo riẹ. A sai gbiku epanọ onana o were omẹ eva te he. Nẹnẹ na me wo oma okpokpọ, udhedhẹ iroro, gbe usu okpekpe kugbe Ọghẹnẹ.’
5 Ohwo kpobi ọ rẹ sai wo erere no obufihọ nọ a rẹ jọ Ẹme Ọghẹnẹ duku ze. Nọ ma tẹ be rehọ iẹ kpọ oma mai, ma rẹ kẹ imuẹro inọ idhere Jihova i kpehru vi idhere akpọ na thethabọ. (Ol. 116:12) O rrọ uvẹ-ọghọ k’omai re ma wha ovuẹ onana se amọfa, re ma wuhrẹ ai re a wo erere k’oma rai. Nọ ma bi ru ere na, ma te ruẹ iyẹrẹ iwoma buobu.