Ikokohọ—Etoke Oghọghọ!
1 Ikokohọ Isẹri Jihova yọ etoke oghọghọ ulogbo. Anwọ ikpe nọ i bu vi udhusoi no, ikokohọ enana i fiba ẹvi nọ ọ be romavia evaọ ukoko mai no. No emuhọ ọsese ze, ma ruẹ eghale iwoma Jihova evaọ iruo akpọ-soso mai no. Eva okokohọ ọsosuọ mai evaọ oke ọgbọna, evaọ Chicago, Illinois, evaọ 1893, ahwo 70 evaọ usu 360 nọ e jariẹ na a họ-ame wọhọ oka omarọkẹ rai kẹ Jihova. Eroro-kugbe unu ahwo nọ a kpohọ Ikokohọ Ubrotọ “Enọ I Bi Ru Ẹme Ọghẹnẹ” evaọ ukpe n’ukpo na evaọ akpọ-soso họ 9,454,055, avọ ahwo 129,367 nọ e họ-ame. Ẹvẹ onana o rọ ẹjiroro ogbunu kẹ oghọghọ te!
2 No anwọ etoke Ebaibol ze, ikokohọ ahwo Ọghẹnẹ e rọ edhere ologbo nọ a rẹ rọ kẹ uthubro nọ u n’obọ Jihova ze. Evaọ oke Ẹzra gbe Nehemaya, ahwo na a gaviezọ kẹ isase Uzi na no “ohiohiẹ frifri rite ọretuzou.” (Neh. 8:2, 3) Fikinọ a wo otoriẹ viere kpahe Uzi na evaọ etoke yena, ahwo na a te wo “oghọghọ ulogbo.” (Neh. 8:8, 12) Ma be ghọghọ re inọ ikokohọ e be k’omai uvẹ obọdẹ nọ ma re ro wo emamọ uthubro gbe emu abọ-ẹzi ‘eva ẹruoke’ n’obọ Jihova ze ẹkwoma ‘ọrigbo nọ o wo ẹrọwọ avọ areghẹ na.’ (Mat. 24:45) Nọ orọnọ Jesu ọ ta nọ ohwo ọ rẹ rria “fiki kẹme kẹme nọ ọ via no unu Ọghẹnẹ ze” na, ikokohọ e r’oja kẹ omakpokpọ abọ-ẹzi mai.—Mat. 4:4.
3 Omodawọ Kpobi re Ma Jariẹ O Rrọ Uvrẹvru Hu: Mai kpobi ma re ru ei fihọ ute mai re ma jariẹ evaọ Okokohọ Ubrotọ “Otu-Iwuhrẹ Ẹme Ọghẹnẹ” na kpobi evaọ en’ukpe ọnana. Ma rẹ m’omaa re ma kaki te etẹe evaọ ẹdẹ kpobi jẹ jariẹ bẹsenọ ma re kuomagbe ta nọ “Ami!” rọkẹ olẹ ekuhọ na. Re ma ru onana gba o gwọlọ nọ ma re ru inwene evaọ omaa mai. Re ma mi uvẹ evaọ oria iruo mai ro kpohọ okokohọ na o sae jọ bẹbẹ. U fo re ma gbaudu ru onana, ma re roro nọ uvẹ na u ti mu rovie he. Ma tẹ gwọlọ oria nọ ma re wohọ gbe/hayo igho ofa, u fo re ma kaki ru ọruẹrẹfihotọ. Omodawọ kpobi nọ ma ti ru o rro hrọ họ!
4 Ahwo Jihova a rẹ rehọ igho rọ wawọ eghale ọ ikokohọ enya ha. Roro kpahe iriruo ahwo jọ nọ a gba riẹ mu re a kpohọ Okokohọ Akpọ-Soso ọ Oreva Ọghẹnẹ ọrọ Isẹri Jihova ọrọ 1958 na evaọ New York City. Oniọvo jọ ọ se okọ ebabọ riẹ ba eka ivẹ re ọ sae kẹ obufihọ unevaze je kpohọ okokohọ na. Oniọvo jọ evaọ Virgin Islands ọ zẹ otọ etighẹ isoi riẹ re uviuwou imazeza riẹ kpobi a sae nya. Imava-orọo jọ e zẹ okọ ẹjini rai re a sae wha emọ esa rai, enọ e rọ umuo ọ emerae ivẹ rite ikpe ihrẹ lele oma kpohọ okokohọ na. A ta kẹ inievo-emezae esa jọ evaọ obọ California nọ oni ọvo o yẹ inọ otẹrọnọ a se iruo ba, a te rọ iruo na kẹ amọfa no bẹsenọ a re zihe ze. Ghele na, oyena o whaha e rae ekpohọ okokohọ obọdẹ ọyena ha.
5 Jihova Ọ rẹ Ghale Omodawọ Owhawha Mai: Jihova ọ rẹ ruẹ jẹ ghale omodawọ ahwo riẹ. (Hib. 6:10) Wọhọ oriruo, eva Okokohọ Ẹvi Esuo Ọghẹnẹ nọ a ru evaọ 1950, enọ e jariẹ a yo ẹme obọdẹ na, “Eyero Eware Ọkpokpọ.” Brọda Frederick Franz ọ kpare isiuru ahwo kpobi evaọ okenọ ọ nọ inọ: “Kọ o te were okokohọ akpọ-soso ọnana re a riẹ nọ evaọ aso nana, evaọ etenẹ, ahwo jọ nọ a te jọ emọ-ivie evaọ akpọ ọkpokpọ na a rọ udevie mai na?” Bu vi ikpe 50 evaọ uwhremu na, ma gbẹ be ghọghọ fiki oruvẹ otoriẹ nana ọrọ Olezi 45:16 na.
6 Nọ o kpohọ okokohọ ubrotọ ukpe n’ukpo na no, ọnọ o wuzou uviuwou jọ nọ o wo ovuhumuo o kere eme nana: “Inievo, wha te riẹ hẹ epanọ okokohọ ọnana ọ rọ uzuazọ-usiwo te. Uviuwou mẹ o kwa kpohọ okpẹwho fiki ẹjiroro iruo, rekọ ma tẹ be ruẹ nọ edikihẹ abọ-ẹzi mai o bi kpotọ kpehru. . . . Ma gbabọkẹ ewha-iruo Oleleikristi mai. Ma tubẹ d’obọ iwuhrẹ enya gbe abọ-owo evaọ usiuwoma ota ji no. . . . Okokohọ ọnana ọ k’omai ọwhọ no, yọ ma wariẹ mu itee abọ-ẹzi họ efihọ no jẹ be ruẹrẹ oma kpahe re ma ru ai gba.”
7 Jihova ọ be k’omai emu abọ-ẹzi nọ ma gwọlọ. Ọ ruẹrẹ okpemu buobu fihọ emẹjẹ evaọ ikokohọ mai. Ovuhumuo mai kẹ ọruẹrẹfihotọ nana o re ru omai ta oware nọ Kọniliọs ọ ta evaọ okenọ Pita ukọ na o weze bru ei: “Whaọ ri mai kpobi a gbunu evaọ aro Ọghẹnẹ etenẹ, nọ ma re ro yo epanọ Ọnowo na ọ ta kẹ owhẹ.” (Iruẹru 10:33) J’oma ru ei fihọ ute mai re ma jọ “evaọ aro Ọghẹnẹ” evaọ abọ kpobi ọrọ Okokohọ Ubrotọ “Otu-Iwuhrẹ Ẹme Ọghẹnẹ” na re ma jẹ ghọghọ!