Kọ Who Wo Ovuhumuo kẹ Eware Abọ-Ẹzi?
1 Okenọ a tẹ nọ omai sọ ma wo ovuhumuo kẹ eware abọ-ẹzi, ma rẹ k’uyo na vẹrẹ vẹrẹ nọ E! Eruẹrẹfihotọ abọ-ẹzi Ọghẹnẹ vẹ jọ ma re wo ovuhumuo kẹ?
2 Ẹvẹ ma riwi usu omobọ-ohwo nọ a kuvẹ nọ ma wo kugbe Ọsẹ obọ odhiwu mai na ghae te! Ọ k’omai imuẹro nnọ ma te ‘bigbae o re ti bigba omai.’ (Jem. 4:8) Ababọ idhe ẹtanigbo Jesu Kristi na, ohwo ọvo ọ rẹ sai wo uzuazọ ebẹdẹ bẹdẹ hẹ. (Jọn 3:16) Avọ uyere nọ u n’eva ze, ma rẹ ta ovuhumuo odidi mai kẹ okẹ oghaghae Ọghẹnẹ nana via evaọ olẹ kẹdẹ kẹdẹ.
3 Ẹme Ọghẹnẹ nọ ọ kẹ ẹgba na, Ebaibol Ẹri na, ọ re ghaghae k’omai re, wọhọ epanọ ukoko otọakpọ Jihova o rọ re na. Ma re dhesẹ ovuhumuo mai kẹ eruẹrẹfihotọ enana nọ i no obọ Jihova ze na nọ ma tẹ be rria lele ehri-izi Ebaibol, bọ oyerikugbe uyoyou inievo mai na ga, romatotọ muẹrohọ uzi Ọghẹnẹ, je yoẹme kẹ enọ e be kobaro na.—1 Pita 1:22.
4 Ma bi wo emu abọ-ẹzi buobu ẹkwoma ọrigbo nọ o wo ẹrọwọ avọ areghẹ na. Oyena o te jọ uzẹme enukpe nana eva Okokohọ Ubrotọ “Enọ I Bi Ru Ẹme Ọghẹnẹ” na. Ma te jọ etẹe wo uthubro obọdẹ jẹ reawere usu oruọruọ nọ ma gwọlọ gaga na. Ẹvẹ ma sai ro dhesẹ ovuhumuo nọ o no udu ze rọkẹ ọruẹrẹfihotọ abọ-ẹzi nana?
5 Who Gbabọkẹ Uwou Jihova Ha: Nehemaya ọ hrẹ enọ i ruiruo gaga rọ wariẹ bọ ugbẹhẹ Jerusalẹm na inọ ‘a jẹ uwou Ọghẹnẹ rai fiẹ hẹ.’ (Neh. 10:39) Nẹnẹ na, “uwou” Jihova họ ọruẹrẹfihotọ riẹ rọkẹ egagọ. Ikokohọ ibrotọ mai yọ abọjọ ọruẹrẹfihotọ ọyena. Re ma se abọ ba egbe kẹ ọruẹrẹfihotọ nana, ma rẹ jọ etẹe hrọ jẹ gaviezọ ziezi, rehọ ere dhesẹ kẹ Jihova nnọ ma rri eruẹrẹfihotọ riẹ ghaghae. (Hib. 10:24, 25) Kọ didi omaa ma re ru enẹna re ma dhesẹ nọ ma ghine wo ovuhumuo kẹ ehaa abọ-ẹzi nana?
6 Jariẹ Evaọ Edesa na Kpobi: Jọ mai kpobi ma ru ọruẹrẹfihotọ re ma jariẹ evaọ edesa ọ okokohọ na kpobi. Kọ whọ be m’omaa re whọ kake nyaze evaọ edẹ na kpobi jẹ jariẹ rite olẹ urere evaọ Ẹdoka? Otẹrọ ere, who ti wo eghale buobu. Ekpohọ okokohọ o sae lọhọ ẹsikpobi hi. Re who ru inwene evaọ akiruo ra o sae gwọlọ edikihẹ ọgaga. Oma-ofa o sae lọhọ tere ẹsikpobi hi. Rekọ whọ kuvẹ re eware enana e whaha owhẹ ekpohọ okokohọ na ha.
7 Roro Kpahe Oriruo Obọdẹ Ọnana: Nọ a je kpohọ okokohọ ubrotọ jọ eva ukpe n’ukpo, utu inievo jọ evaọ orẹwho Africa jọ nọ ozighi omoma ọ rọ a tẹ nyaku utu isoja jọ. A nọ inievo na nọ: “Whai yọ amono, kọ bovẹ wha be nya?” A tẹ kuyo nọ: “Mai yọ Isẹri Jihova, yọ ma bi kpohọ okokohọ ubrotọ na.” Osoja jọ ọ tẹ kpahe nọ: “Whai Isẹri Jihova wha rẹ dhozọ oware ovo ho. Wha nya, yọ wha te sai ru okokohọ rai ababọ ẹbẹbẹ. Rekọ, wha riẹ nọ wha te nyaku isoja buobu. Wha nya udevie edhere na ẹsikpobi! Wha tẹ ruẹ ahwo buobu nọ a kokohọ, wha gbẹ hae nya udevie edhere na ọvo!” A te ru ere je te okokohọ na omakọkọ. Inievo enana a wo oghale keme a dhesẹ ovuhumuo rai kẹ eware abọ-ẹzi.
8 Wọhọ inievo mai evaọ orẹwho oyena, ma rẹriẹ ovao ku use-abọ re. Rekọ ababọ avro ma rẹ sae raro kele ẹrọwọ rai je ru ọtamuo re ma jariẹ evaọ abọ kpobi ọrọ okokohọ ubrotọ mai na. O tẹ gwọlọ inwene, rẹro so Jihova kẹ ẹruọsa, nọ ma riẹ nọ ọ te ghale omodawọ mai re ma jariẹ evaọ ọruẹrẹfihotọ na kpobi na.
9 Vu Eghale Na: Ma wo isiuru kẹ Ẹme Ọghẹnẹ, keme ma riẹ nọ ẹkwoma riẹ ma sae rọ rro te esiwo. (1 Pita 2:2) Ma te kpohọ okokohọ na jẹ gaviezọ kẹ eme ọruẹrẹfihotọ na u ti fiobọhọ k’omai omomọvo bọ ẹrọwọ fihọ Ẹme ọyena ma vẹ jẹ dadamu kẹ ọwọsuọ Setan viere. Evaọ ere oruo, ma re dhesẹ kẹ Jihova gbe iriughe kpobi nọ ma ghine wo ovuhumuo kẹ eware abọ-ẹzi yọ “ma rọ ahwo otiọye nọ i kie kpemu . . . hu, rekọ enọ i wo orọwọ nọ i siwi izi rai.”—Hib. 10:39; 12:16; Itẹ 27:11.
10 Ma rẹ sai wo irẹro nnọ Jihova Ọghẹnẹ o ti rovie ethẹ obọ odhiwu na je ku oso eghale abọ-ẹzi ku omai. (Mal. 3:10) Ru ei fihọ ute ra re whọ jọ Okokohọ Ubrotọ “Enọ I Bi Ru Ẹme Ọghẹnẹ” na no emuhọ ọruẹrẹfihotọ ohiohiẹ Edisoi-Oka na rite olẹ ekuhọ je bo “Ami!” eva uvo Ẹdoka. Eva e te were owhẹ nnọ who ru ere!