Kọ Whọ Sai Ruiruo Evaọ Oria nọ Ẹgwọlọ na Ọ Jọ Mae Rro?
1 Kọ who roro kpahe ẹkwa kpohọ oria nọ ẹgwọlọ rọkẹ iwhowho Uvie efa ọ rọ no ẹdẹjọ? A te zizie owhẹ re ‘whọ nyaze . . . re who fiobọhọ,’ kọ whọ te j’owọ wọhọ epanọ Pọl ukọ na o ru? (Iruẹru 16:9, 10) Evaọ ikoko buobu, ẹgwọlọ ọ riẹ rọkẹ iviuwou nọ e kpako evaọ abọ-ẹzi, rọkẹ ekobaro re a fiobọhọ ru ẹkwotọ na re hayo rọkẹ ekpako gbe idibo iruiruo re a fiobọhọ rẹrote iruo na. Ẹsejọhọ ẹkwotọ na o wo ewho esese nọ e vaha abọ no ohwohwo evaọ eria ilogbo. O sae jọ nọ Ọgwa Uvie nọ ọ mae kẹle o thabọ gaga. Ẹsejọhọ okọ u bu tere he. O sae jọ nọ ova-ehru na u re woma ẹsikpobi hi. Kọ who ti wo unevaze re whọ rehọ use-abọ utioye na? Ẹvẹ whọ sae rọ kparobọ?
2 O Gwọlọ Ẹrọwọ gbe Evaifihọ: Nya lele ekpakpọ Ọghẹnẹ, Abram ọ kwa no orẹwho riẹ Ọr jẹ nya ikilomita 1,000 kpohọ Heran avọ aye riẹ, ọmọ oniọvo riẹ, gbe ọsẹ ọkpako riẹ, Tira. (Emu. 11:31, 32; Neh. 9:7) Nọ Tira o whu no, Jihova ọ tẹ ta kẹ Abram, ọnọ ọ kpako te ikpe 75 no, re ọ nyasiọ Heran gbe imoni riẹ ba jẹ kwa kpohọ orẹwho nọ Ọghẹnẹ o ti dhesẹ kẹe. Abram, Serai, gbe Lọt a ‘tẹ ruọ edhere.’ (Emu. 12:1, 4, 5) Uzẹme, orọnikọ re ọ nyai ruiruo evaọ oria nọ ẹgwọlọ rọkẹ egbodibo ọ jẹ rro Abram ọ rọ kwa ha. Rekọ ẹkwa riẹ o gwọlọ oware ofa jọ. Didi oware?
3 O rehọ ẹrọwọ gbe evaifihọ re Abram ọ sai ru oware utioye na. Iroro gbe edhere uzuazọ riẹ i re ti nwene. Ọ rẹ te nyasiọ omofọwẹ imoni riẹ ba. Rekọ o fievahọ Jihova re ọ sẹro riẹ gbe uviuwou riẹ. Ibuobu nẹnẹ a dhesẹ evaifihọ rai kpahe Jihova no evaọ oghẹrẹ ovona.
4 Iruo Ubroke: Kọ whọ reawere eghale iwoma nọ i re noi ze re a ruiruo evaọ ẹkwotọ nọ a ghale kẹ ahwo ho no ẹdẹjọ? Ukpe n’ukpo na evaọ United States of America, iwhowho-uvie 5,699 a jọ ekwotọ 163 evaọ usu ekwotọ 174 nọ a ghale kẹ ahwo ho na ruiruo. Iwhowho-uvie 5,676 efa i te fiobọhọ kẹ ikoko 380 ru ẹkwotọ rai nọ a re jo ruiruo ẹsikpobi hi re. Rọkẹ ejọ, onana o gwọlọ ekpohọ ugbothabọ. Kọ u ghine te oware nọ a re ru omodawọ utioye na kẹ?
5 Oniọvo-ọmọzae jọ nọ o ru ere o kere nọ: “Okenọ a ta k’omẹ kpahe ẹjiroro na re mẹ wha utu ahwo jọ kpohọ ẹkwotọ jọ nọ a re jo ruiruo ẹsikpobi hi, o kake ruọ omẹ oma ha. Rekọ mẹ tẹ jiroro nọ mẹ rẹ rehọ iruo na. Me ti bruenu fiki riẹe ẹdọvo ho yọ u nwene uzuazọ mẹ no. Me bi yere Jihova kẹdẹ kẹdẹ fiki uvẹ-ọghọ nọ me ro kpohọ erẹ nana.” Oniọvo-ọmọzae ọfa jọ ọ ta nọ oye họ oware nọ ọ rẹ mae kareghẹhọ evaọ ikpe 20 riẹ evaọ uzẹme na! Ọmọ ikpe-ikpegbọ jọ nọ o kpohọ oria nọ ẹgwọlọ ọ rọ ọ ta nọ: “A rẹ ruẹ oware nọ u woma tei hi evaọ uzuazọ mẹ kpobi!” Iwhowho-uvie buobu a rọwo nọ iruo i ru evaọ oria nọ ẹgwọlọ na ọ jọ mae rro makọ evaọ ubroke u ru ovuhumuo rai kẹ odibọgba na kodo no. Lele ahwo no a ru rie no t’ẹme. Whọ te ruẹ nọ u fiba ẹnyaharo abọ-ẹzi rai yọ ẹsejọhọ a te wariẹ ru ei nọ a tẹ kẹ ae uvẹ na.
6 Ẹrehọ iruo ubroke re who ruiruo evaọ oria nọ ẹgwọlọ na ọ jọ mae rro o sai je ru ẹjiroro ọfa gba. Ahwo nọ a bi ru ere a sai wo evuẹ nọ i w’iruo nọ i re fiobọhọ kẹ ae “roro araha” ọrọ ẹkwa kpohọ abọ ọfa ọ orẹwho na.—Luk 14:28.
7 Jihova ọ gba riẹ mu re a whowho emamọ usi na “kẹ erẹwho akpọ na kpobi” taure urere na u te te. (Mat. 24:14) Nọ whọ riẹ nọ enẹ o rrọ na, kọ u ti n’owhẹ eva ze re whọ kwa kpohọ oria nọ ẹgwọlọ na ọ jọ mae rro, otẹrọnọ whọ rẹ sai ru ere? Ẹgwọlọ na ọ rọ eria buobu.
8 Ẹkwa Kpohọ Oria nọ Ẹgwọlọ na Ọ Jọ Mae Rro: Kọ who seri iruo họ no? Kọ who wo oria nọ ugho u re no ze ẹsikpobi? O gbẹ rọ ere he, kọ whọ sae gwọlọ iruo obọ jọ? Kọ whọ sae jọ oria kpobi ruiruo evaọ orẹwho na? Otẹrọnọ whọ sae kwa ha, kọ whọ sai fiobọhọ kẹ ohwo uviuwou na jọ re o ruiruo evaọ oria ofa?
9 Otẹrọnọ whọ rehọ oma olẹ roro kpahe iẹe no who te roro nọ who te re whọ kwa kpohọ oria nọ ẹgwọlọ na ọ jọ mae rro, lele uviuwou ra gbe ekpako ukoko ra t’ẹme kpahe iẹe. Kẹsena, who ve kere ileta jẹ rehọ iẹe kẹ ekpako na re a ku ei kugbe eriwo gbe ẹme ọrọwokugbe rai taure a te vi ei kpohọ uwou ogha na.
10 Eme who re kere fihọ ileta ra? Ikpe ra, ideti ame-ọhọ ra, owha-iruo nọ who wo evaọ ukoko na, sọ whọ rọo no hayo whọ te rọo ho, gbe sọ who wo emọ esese. Fodẹ ibrotọ nọ whọ gwọlọ nọ who re jo ruiruo na, wọhọ epanọ ẹgwọlọ ra ọ rrọ.
11 Kọ who wo ọwhọ gbe udu-obọra? Kọ uyero ra o k’owhẹ uvẹ re who ruiruo evaọ oria nọ ẹgwọlọ na ọ jọ mae rro? O tẹ rọ ere, muẹrohọ epanọ Jihova o re ku eghale iwoma ku ahwo nọ i fievahọ iẹe nọ a bi dhesẹ ẹzi omolahiẹ kẹ amọfa ẹsikpobi na!—Ol. 34:8; Mal. 3:10.