Obufihọ kẹ Amọfa re A Kẹ Jihova Orro
1 Evaọ akpọ na soso a bi whowho ovuẹ jọ nọ u w’uzou gaga: “Dhozọ Ọghẹnẹ jẹ rehọ oruaro kẹ e, keme oke oziẹobro riẹ o te no; wha jẹ gọ e, Ọnọ Ọ ma odhiwu gbe akpọ gbe abade, gbe iyeri ame.” (Evia. 14:6, 7) O rrọ uvẹ-ọghọ k’omai re ma w’obọ evaọ ewhowho ọyena. Eme o gwọlọ nọ ahwo a rẹ riẹ kpahe Jihova re a sae dhozọ riẹ jẹ gọ e?
2 Odẹ Riẹ: O gwọlọ re ahwo a rehọ odẹ vuhu Ọghẹnẹ uzẹme ọvuọvo na hẹriẹ-oma no eghẹnẹ erue buobu nọ a be gọ nẹnẹ na. (Izie. 4:35; 1 Kọr. 8:5, 6) Evaọ uzẹme, enọ i kere Ebaibol na a fodẹ odẹ oghaghae Jihova bu vi asia 7,000. Dede nọ u fo re ma dhesẹ orimuo kpahe okenọ ma rẹ rọ fodẹ odẹ Ọghẹnẹ, ma rẹ ko ẹe dhere hayo se ẹe ba ẹfodẹ hẹ. Oreva Ọghẹnẹ họ re ahwo-akpọ kpobi a riẹ odẹ riẹ.—Ol. 83:18.
3 Uruemu Riẹ: Re a kẹ Jihova orro, o gwọlọ re ahwo a riẹ oghẹrẹ Ọghẹnẹ nọ ọ rrọ. Ma re ru ae riẹ kpahe uyoyou ulogbo, areghẹ okpehru, ẹdhoguo ọgbagba, avọ ogaga erumeru riẹ, jegbe ohrọoriọ, uyoyou-ẹwo, gbe ekwakwa igbunu efa riẹ. (Ọny. 34:6, 7) A rẹ jẹ riẹ epanọ a re ro wo uvi ozodhẹ kẹ Ọghẹnẹ hrọ, re a kẹ e adhẹẹ, vuhumu nnọ izuazọ rai e rọ oma hwa ewo ọjẹrehọ Jihova.—Ol. 89:7.
4 Esikẹle Ọghẹnẹ: Re a siwi ai vrẹ ẹdhoguo Ọghẹnẹ nọ ọ be tha na, ahwo a re se Jihova avọ ẹrọwọ hrọ. (Rom 10:13, 14; 2 Tẹs. 1:8) Onana u vi eriariẹ kpahe odẹ gbe ekwakwa Ọghẹnẹ nọ a re wo ọvo. Ma re fi obọ họ kẹ ahwo bọ usu omobọ ohwo kugbe Jihova, rọ udu rai kpobi fi eva họ iẹe. (Itẹ 3:5, 6) Nọ a bi fi eware nọ a wuhrẹ họ iruo, rẹriẹ ovao bru Ọghẹnẹ evaọ olẹ osegboja, jẹ be ruẹ obufihọ riẹ evaọ izuazọ rai na, ẹrọwọ rai ọ te rro, u ti fi obọ họ kẹ ae si kẹle Jihova.—Ol. 34:8.
5 Joma whowho odẹ Ọghẹnẹ avọ ajọwha je fi obọ họ kẹ amọfa re a fi eva rai kpobi họ iẹe jẹ dhozọ riẹ. Ma rẹ gbẹ sai fi obọ họ kẹ ahwo buobu re a riẹ Jihova jẹ kẹ e orro wọhọ “Ọghẹnẹ usiwo” rai.—Ol. 25:5.