Ma Rẹ Rehọ Adhẹẹ kẹ Udu-Esuo Jihova Hrọ

Eme ọ rẹ ziọ owhẹ iroro nọ who te yo edẹ anwae nana Kora, Detan, gbe Abiram? Ahwo ọwọsuọ! Eme a wọso? Udu-esuo Ọghẹnẹ. A kere ikuigbe owojẹ othọthọ rai fihọ Ikelakele uzou avọ 16, yọ orukpẹre ẹme na ọ jọ Uwou-Eroro ọ August 1, 2002, roma via evaọ otọ uzoẹme na “Rọ Omarokpotọ Yo Ẹme Kẹ Udu-esuo Ọghẹnẹ.” O te jọ oware erere kẹ owhẹ nọ who te se Uwou-Eroro nana, re who roro kpahe oghẹrẹ nọ a bi ti dhesẹ iẹe evaọ ividio na Respect Jehovah’s Authority (Rehọ Adhẹẹ kẹ Udu-Esuo Jihova). Whọ te ruẹ ẹwhọ nọ ọ jọ udevie emọ ẹrọwọ Kora avọ ọsẹ ọwọsuọ rai, ọnọ ọ wọso osu Ehrugbakpọ na. (Ik. 26:9-11) Edrama ikuigbe uzẹme nana e rẹ wọ omai kpobi re ma ru omarokpotọ mai kẹ Jihova rro haro vi epaọ ọsosuọ.

Nọ who bi rri ividio na, fi ẹro hotọ re who vuhu imuẹro na mu inọ Kora gbe ibe ọwọsuọ riẹ a kie kẹ odawọ omarokpotọ evaọ idhere ezeza jọ nọ i wuzou gaga: (1) Ẹvẹ a ro rri udu-esuo Ọghẹnẹ vo? (2) Ẹvẹ a rọ kuvẹ kẹ omorro, isiuru-ọkwa-okpehru, gbe ihri-eriọ re i kpomahọ ae? (3) Ẹvẹ a rọ tọ ẹro vi sebaẹgba ahwo nọ Jihova o ro mu? (4) Uruemu unoma-uguo vẹ a wo? (5) Fikieme obọdẹ uvẹ-iruo nọ a wo o gbẹ rọ dae ẹro ho? (6) Ẹvẹ a ro yo ẹme kẹ egbẹnyusu gbe ahwo uviuwou rai siọ oma nọ a re ro kpotọ kẹ Ọghẹnẹ ba?

Roro kpahe epanọ eware nọ ma wuhrẹ no edrama na ze i ro wobọ kpahe oghẹrẹ nọ ma re rri udu-esuo Ọghẹnẹ nẹnẹ: (1) Ẹvẹ ma re ru kpahe iroro nọ ekpako ukoko a jẹ, kọ fikieme? (2) Ẹvẹ ma sae rọ whaha iroro ethọthọ kpobi nọ ma wo? (3) Ẹvẹ ma re ru kpahe sebaẹgba ahwo nọ a ro mu nnọ a kobaro evaọ ukoko na? (4) Eme ma re ru otẹrọnọ ẹzi unoma-uguo u bi mu omai udu họ ẹruọ? (5) Ẹvẹ ma re rri uvẹ-iruo kpobi nọ a kẹ omai? (6) Ono ma rẹ rọ karo kẹ omarokpotọ mai kẹ Ọghẹnẹ hẹ, kọ oke vẹ onana o sae rọ jọ odawọ obẹbẹ kẹ omai?

Nọ a tẹ kiẹ ovuẹ nana riwi no evaọ ukoko na, kọ wha gbẹ daoma wariẹ rri ividio na? Jọ o lẹliẹ owhẹ woi họ iroro ziezi oware nọ ma jẹ rehọ adhẹẹ kẹ udu-esuo Jihova ẹsikpobi!—Ol. 18:25; 37:28.