Omaa Uviuwou—Ekere Okpẹdẹ Na
1 Esẹgbini iyoyou a rẹ daoma rehọ emamọ emu kẹ emọ rai kẹdẹ kẹdẹ. Emu abọ-ẹzi nọ a rẹ rọ kẹ emọ na no Ẹme Ọghẹnẹ ze ọ tubẹ mai wuzou dede. (Mat. 4:4) Edhere jọ nọ whọ sai ro fiobọhọ kẹ emọ ra re a wo obọdẹ isiuru kẹ eware abọ-ẹzi jẹ “ro bru usiwo” họ ẹkwoma oke nọ wha rẹ ruẹrẹhọ ro se ikere okpẹdẹ gbe ọkpahefihọ riẹ na kẹdẹ kẹdẹ wọhọ uviuwou. (1 Pita 2:2) Oke vẹ whọ rẹ sai fi onana họ evaọ omaa uviuwou ra?
2 Eva Oke Emuọriọ: Ese ikere okpẹdẹ na nọ wha re ro mu ẹdẹ na họ u re fiobọhọ kẹ uviuwou ra wo Jihova họ iroro evaọ okpẹdẹ na soso. (Ol. 16:8) Oni jọ o ru rie fihọ ute nọ o re ro se ikere okpẹdẹ na gbe ọkpahefihọ riẹ kugbe ọmọzae riẹ nọ ọmọ na ọ be re emu-ohiohiẹ riẹ, ọ vẹ jẹ lẹ kugbei taure ọmọ na o te ti kpohọ isukulu. Onana o kẹ ọmọ na ẹgba nọ o ro dikihẹ gaga nọ ọ rẹriẹ ovao dhe ẹme nọ o kpomahọ ethathọ orẹwho ohwo, nọ ọ rọ dadamu kẹ edawọ abọ ọfariẹ-ogbe, jẹ rọ uduowha ta usiuwoma kẹ emọ-isukulu gbe iticha riẹ. Dede nọ ọye ọvo ọ jọ Osẹri eva isukulu na, ọ jọ goli hi.
3 Otẹrọnọ ohiohiẹ o gbe kiehọ owhai oma nọ wha re ro se ikere okpẹdẹ na ha, wha sai sei kugbe wọhọ uviuwou evaọ oke-ofa okpẹdẹ na, o sae jọ etoke nọ wha rẹ rọ re emu evaọ owọwọ. Ahwo jọ a re gbiku eware nọ a rọ ẹro ruẹ no odibọgba na ze gbe igogo-eme nọ a reawere rai no isase Ebaibol omobọ rai ze eva oke nana. Ibuobu e rẹ kareghẹhọ etoke itieye na eva okenọ a be re emu eva owọwọ wọhọ oke jọ nọ uviuwou na u wo kugbe nọ a rẹ mae rọ wereva.
4 Oke Aso: Rọ kẹ iviuwou jọ, oke nọ o mai kiehọ nọ a re ro se ikere okpẹdẹ na họ taure a te ti kiẹzẹ eva aso. Onana o rẹ sae jọ emamọ oke nọ a rẹ rọ lẹ kugbe. Nọ whọ be tẹme kpahe Jihova kẹdẹ kẹdẹ jẹ be lẹ sei yọ emọ ra i bi yo na, u re gine mu ai ẹro ziezi nọ Jihova ọ rrọ uzuazọ.
5 Jọ Jihova ọ ghale omodawọ ra nọ who bi ro wuhrẹ emọ ra uzẹme na nọ whọ be rehọ Ẹkiẹriwo Ikereakere na Kẹdẹ Kẹdẹ ro ruiruo ziezi na.