Roro Kpahe Ẹme ọ Jihova Kẹdẹ Kẹdẹ!
1 Ẹdẹ kpobi ọ rẹ wha use-abọ se ẹrọwọ ra. Ẹsejọhọ ogbẹnyusu obọ akpọ jọ ọ be hae tunye owhẹ re wha jọ usu ọ ọmọtẹ avọ ọmọzae. Iticha ra ọ gwọlọ nọ who le ute akpọ jọ, hayo ọga iruo ra ọ gwọlọ nọ who ruiruo vrẹ unu euwa nọ a gwọlọ. O sae jọ nọ whọ be hae mọ. Dede nọ edawọ itieye na e sae rẹriẹ aro dhe owhẹ eva oke kpobi, whẹ ọvo ọ rrọ họ. Jihova ọ ruẹrẹ oma kpahe re ọ k’owhẹ areghẹ nọ o gwọlọ re whọ sai yeri kugbe ai. Eroro kpahe ekere Ebaibol na gbe ọkpahefihọ nọ e rrọ Ẹkiẹriwo Ikereakere Na yọ edhere jọ nọ whọ rẹ sae rọ rehọ Ẹme Jihova fihọ oma kẹse kẹse. Kọ whọ be rehọ uvẹ onana ro ruiruo?
2 Obufihọ O Riẹ: Aizaya 30:20 u dhesẹ Jihova wọhọ ‘Owuhrẹ Ologbo’ nọ ahwo Ọghẹnẹ a rẹ sae rẹro so kẹ obufihọ. Ọ rẹ k’owhẹ oware nọ whọ gwọlọ re whọ rẹriẹ aro dhe use-abọ ẹrọwọ ra. Evaọ oghẹrẹ vẹ? Owọ nọ u lele i rie na o ta nọ: “Ezọ rai i re ti yo ẹme evaọ obọ emu rai nọ, ‘Ọnana họ edhere na, wha nyae.’ ” Nẹnẹ na, Jihova ọ be ta “ẹme” via ẹkwoma Ikereakere na gbe ebe ọ ‘odibo ẹrọwọ na.’ (Mat. 24:45) Efe areghẹ ọ rrọ izoẹme Uwou-Eroro nọ i kpemu no na, nọ i duobọte enwene k’abọ k’abọ uzuazọ Oleleikristi. Ẹwariẹ kiẹriwi enọ a fodẹ evaọ Ẹkiẹriwo Ikereakere Na u re fiobọhọ k’owhẹ bọ evu ọ eriariẹ eghaghae nọ u re fiobọhọ evaọ eyerikugbe edawọ oghẹrẹ kpobi.—Aiz. 48:17.
3 Ru Uvẹ Kẹe: Makinọ uvẹ o jẹ hae jariẹ evaọ ohiohiẹ hẹ, oni jọ o ru rie fihọ oware nọ o r’oja re o lele ọmọzae riẹ se ikere na jẹ ta kpahe ọkpahefihọ rai evaọ okenọ ọmọ na ọ be re emu ohiohiẹ. Eme enana kugbe olẹ họ eme urere nọ ọmọ na o re yo k’ohiohiẹ k’ohiohiẹ taure o ti te kpohọ isukulu. E bọ riẹ ga whaha isiuru ẹnwae-obro, ro wo edikihẹ ọgaga mukpahe ohọre kẹ esuo orẹwho ohwo, jegbe ro se-isẹri avọ aruọwha kẹ emọ-isukulu gbe iwuhrẹ. Dede nọ ọye ọvo họ Osẹri nọ ọ jọ isukulu na, ọ jọ goli vievie he.
4 Rẹro so Jihova avọ Ẹme riẹ rọkẹ ọkpọvio. Who te ru ere, ọ te jọ ohwo nọ ọ ghinẹ rrọ uzuazọ kẹ owhẹ, wọhọ ogbẹnyusu nọ a re fievahọ. Nya bru ei kẹdẹ kẹdẹ! Kuomagbe ima amọfa nọ a bi se Ẹme Ọghẹnẹ kẹdẹ kẹdẹ evaọ akpọ na soso, jọ ibiaro ra e jọ enọ e be ‘ruẹ Owuhrẹ Ologbo ra.’