Rọ Ẹkwoma Ejẹ Emagazini Bọ Isiuru
1 Ahwo buobu nọ ma rẹ nyaku evaọ odibọgba na a re dede omai rehọ jẹ rọ evawere rehọ ebe mai, rekọ a rẹ rọwo nọ a ru obe-uwuhrẹ Ebaibol ẹsikpobi kugbe ai hi. Edhere jọ nọ ma sae rọ bọ isiuru rai họ ẹkwoma ejẹ emagazini. Nọ who te fi emagazini họ-ada, kere odẹ ohwo na gbe oria nọ ọ be rria fihotọ, ẹdẹ nọ whọ rọ kẹe emagazini na, uvitha nọ who fihọ ada kẹe, ikereakere nọ wha tẹme kpahe gbe oware ofa kpobi nọ who muẹrohọ nọ o rẹ sai dhesẹ isiuru ohwo na via. Nọ uvitha emagazini ekpokpọ i te kpozi, rri gwọlọ eme nọ e te were ahwo nọ a rrọ ejẹ ra, whọ vẹ ta kpahe ae nọ who te weze nya. (1 Kọr. 9:19-23) Nọ oke o be nyaharo na, oware jọ nọ a se evaọ emagazini mai na o sae kpare isiuru rai jẹ wọ ae re a gbẹ gwọlọ wuhrẹ.
2 Ghele na, ma riẹ inọ ahwo jọ buobu a te nwane rehọ fiki emagazini mai nọ a se kẹ omobọ rai ọvo zihe ruọ idibo Jihova ha. Nọ o rẹ kpata kpata kẹ ahwo enẹna re a gwọlọ Jihova na, eme ọfa ma rẹ gbẹ sai ru ro fiobọhọ kẹ ae? (Zef. 2:2, 3; Evia. 14:6, 7) Ma rẹ sae bọ isiuru rai ẹkwoma ikereakere nọ ma r’oma totọ salọ nọ ma re dhesẹ kẹ ae eva oke kpobi nọ ma bi fi emagazini họ ada kẹ ae.
3 Ẹmeọta Kugbe nọ A re jo Se Oria Ikere-Ọvo: Roro kpahe ahwo nọ a rrọ ejẹ emagazini ra, jẹ ruẹrẹ ẹmeọta ikere-ọvo fihọ kẹ ẹgwọlọ omomọvo. (Fil. 2:4) Wọhọ oriruo, otẹrọnọ ohwo jọ nọ a you o whu ku ohwo jọ kẹle, whọ sai weze bru ohwo na unuẹse buobu re whọ ta oware nọ Ebaibol e ta kpahe uyero iwhuowhu na gbe ẹruore ẹkparomatha na kẹe. Whọ sae rehọ eme nọ e rrọ obe ọ Reasoning na evaọ otọ izoẹme na “Death” (Uwhu) gbe “Resurrection” (Ẹkparomatha) rọ ruẹrẹ ẹmeọta ikere-ọvo nana họ. Whọ sae ta eme efa nọ i wobọ kugbe uzoẹme nana, wọhọ epanọ a ti ro si ẹyao, owho, gbe uwhu no riẹriẹriẹ. Ẹjiroro na họ re ma gwọlọ uzoẹme nọ u re si ohwo na urru, ma ve je dhesẹ kẹe oware nọ Ebaibol e ta kpahe iẹe.
4 Fiobọhọ kẹ Ai Wo Otoriẹ: Dede nọ o rẹ mai woma re a ru ẹmeọta na lọhọ jẹ kpẹre, o gwọlọ oware ofa vi ikereakere nọ a salọ na nọ wha re se ọvo. Setan o wuhu iroro ahwo di no kpahe emamọ usi na. (2 Kọr. 4:3, 4) Makọ ahwo nọ a riẹ Ebaibol na dede a gwọlọ obufihọ re a wo otoriẹ Ebaibol na. (Iruẹru 8:30, 31) Fikiere, rehọ oke ru ei vẹ jẹ rehọ ẹme nọ ikere na e be ta na rọ kẹ oriruo, wọhọ epanọ who re ru nọ who te bi ru ẹme evaọ Isukulu Odibọgba Esuo-Ọghẹnẹ na. (Iruẹru 17:3) Ruẹ nọ ohwo na o wo otoriẹ epanọ Ẹme Ọghẹnẹ ọ sai ro fiobọhọ kẹe evaọ uzuazọ.
5 Otẹrọnọ ohwo na ọ be reawere oware nọ o bi wuhrẹ na, rọ ẹrera ku ikere Ebaibol ivẹ hayo esa kugbei evaọ iweze kpobi. Gwọlọ uvẹ nọ who re ro mu ẹmeọta họ evaọ ibroshọ Gwọlọ na gbe obe Eriariẹ na. Evaọ edhere nana, iweze ejẹ emagazini o sai zihe ruọ obe-uwuhrẹ Ebaibol.
[Study Questions]
1. Ẹvẹ ma sae rọ rehọ ejẹ emagazini bọ isiuru?
2. Fikieme o jẹ rrọ oware okpakpata kẹ ahwo re a gwọlọ Jihova enẹna, kọ eme ọfa ma rẹ sai ru ro fiobọhọ kẹ ae?
3. (a) Ẹvẹ ma sae rọ ruẹrẹ ẹmeọta ikere-ọvo sa-sa họ? (b) Izoẹme vẹ e mae rrọ eware ọdawẹ kẹ ahwo ẹkwotọ rai?
4. Fikieme o jẹ roja re ma fiobọhọ kẹ ahwo wo otoriẹ oware nọ o rrọ oria ikereakere nọ ma be rọ tẹme kugbe ai, kọ ẹvẹ ma sai ro ru ere?
5. Ẹvẹ iweze ejẹ emagazini o sai ro zihẹ ruọ obe-uwuhrẹ Ebaibol?