Branch Letter

Iwhowho-Uvie Eghaghae:

Ma bi ruiruo gaga re ma sae wha emamọ usi na haro evaọ Nigeria. Evaọ ukpe-iruo nọ o vrẹ na, ma sae whẹ ẹjini nọ a re ro kere ebe nọ a re se nọ rotary press họ, ma yere inievo nọ i no erẹwho ihrẹ ze ti fiobọhọ na gaga. Fiki ẹjini rotary press na nọ ma whẹ họ na, ma sai ru unu iruiruo nọ e rẹ jọ oria nọ a jẹ rehọ ẹjini kere ebe na kpotọ. Ofariẹ re, Ugboma Esuo na u kuenu k’omai no inọ ma sae rehọ ẹjini na kere ibroshọ gbe emebe-evẹvẹ nọ ma gwọlọ evaọ Nigeria nọ ma wo ẹjini nọ ọ rẹ sai kere ebe nana no na.

Erara buobu a be hae nyaze re a ruẹ rotary press na. Oware jọ nọ o jọ ẹjini na were ahwo gaga họ Quantum Pollution Control (Abọ jọ Ẹjini na nọ U re Ru nọ Ẹjini na Ọ Gbẹ Nua Ofou Hu). Nọ a nya ẹjini na wariẹ no, ohwo jọ ọ tẹ nọ inọ: “Diẹse igho na i bi no ze?” Ọ tẹ ta nọ a dhesẹ oria nọ etehe unevaze ọ rrọ kẹe, o te ru unevaze. Ofariẹ, ọ tẹ ta nọ o ti fiba unuigho nọ ọ be hai ro ru unevaze kẹ iruo akpọ soso na.

Ma bi zizie owhai re wha nyaze te rọ ẹro rai ruẹ epanọ a be rọ rehọ azọhọ unevaze rai ruiruo ziezi evaọ ekere emagazini gbe ibroshọ nọ ma re ro ruiruo evaọ ewhowho emamọ usi na. U mu omai ẹro inọ iweze nana o te jọ oware omawere kẹ owhai!

Ma nyaharo gaga no re evaọ iruo nọ Ẹko-Iruiruo Ebabọ Ọgwa Uvie na a bi ru. Anwọ ikpe isoi nọ e vrẹ nọ ọruẹrẹfihotọ nana o ro muhọ na, Egwa Uvie nọ ma bọ re no i bu vi odu ọvo no. Onana o wha ujiro ulogbo se odẹ Jihova no wọhọ epanọ ẹme ọbo imu ologbo jọ nọ o mu ẹro họ ebabọ Ọgwa Uvie jọ nọ a jẹ bọ evaọ Ekiti State u dhesẹ. Ọ ta nọ: “Ọgwa nana nọ a rehọ omoke kakao ọvo bọ na u dhesẹ emamọ omaa gbe ọrọwokugbe. Onana u dhesẹ orọnikọ ewoma uwou na wọhọ oria egagọ ọvo ho, rekọ te epanọ ahwo nọ a be te jariẹ gọ a woma te gbe ọruẹrẹfihotọ nọ a ma kiete.”

Iruo ajọwha nana kpobi nọ a be rọ wha isiuru Uvie na haro na i woma kẹhẹ! Unevaze ugho nọ wha bi ru rọ tha iruo na uke o d’omai ẹro fia. (Itẹ 3:9, 10) Jọ Jihova ọ gbẹ ghale omodawọ mai nọ ma be rọ okugbe rehọ “ajiri kẹ oro riẹ” na.—Ẹf. 1:12.

Inievo rai,

Uwou Ogha Nigeria