Dhesẹ Uvi Isiuru—Ẹkwoma Enọ nọ Whọ rẹ Nọ Jẹ Gaviezọ
1 O rẹ were ahwo buobu re a ta iroro rai via, rekọ o rẹ were ae he re a rehọ ae keria otọ ọvo be t’ẹme kẹ hayo be nọ ae enọ. Fikiere, wọhọ egbodibo Ileleikristi, o gwọlọ nọ ma re wuhrẹ ona nọ ma rẹ rọ rehọ enọ rọ riẹ iroro ahwo.—Itẹ 20:5.
2 Enọ mai e rẹ jọ enọ e rẹ wọ ohwo roro, orọnikọ enọ e rẹ lẹliẹ oma vuọ ohwo hayo lẹliẹ eva dha ohwo ho. Ọ tẹ be ta usiuwoma nuwou ruọ uwou, oniọvo-ọmọzae jọ ọ rẹ nọ inọ, “Kọ who roro nọ ẹdẹjọ ọ te jariẹ nọ ahwo kpobi a te rọ rehọ adhẹẹ yeri kugbe ohwohwo?” Fiki oghẹrẹ uyo nọ ohwo na ọ kẹ, ọ rẹ ta nọ, “Kọ eme who roro nọ o te gwọlọ re onana o sae via?” hayo “Fikieme who ro roro ere?” Nọ ọ tẹ be ta usiuwoma oke-gheghe gbe evaọ eria ẹgbede, oniọvo-ọmọzae ọfa jọ ọ rẹ nọ ahwo nọ a wo emọ inọ, “Wọhọ ọyewọ, eme ọ be mae kẹ owhẹ evawere?” Ọ vẹ jẹ nọ inọ, “Eware vẹ e mae rrọ ọdawẹ kẹ owhẹ?” Muẹrohọ inọ enọ nana e rẹ lẹliẹ ahwo ta iroro rai orọnikọ enọ i re kpomovuọ họ ohwo oma ha. Nọ iyero e rrọ oghoghẹrẹ na, o sae gwọlọ nọ ma nwene ẹme mai gbe oghẹrẹ nọ ma rẹ nọ enọ mai re i kiehọ ahwo nọ a rrọ ẹkwotọ mai oma.
3 Ẹriẹ Iroro Ahwo: Otẹrọnọ u no ahwo eva ze re a ta iroro rai, rọ oma totọ gaviezọ ababọ ẹme nọ whọ rẹ za họ ai unu ugbẹzahọ. (Jem. 1:19) Dhesẹ ovuhumuo kẹ iroro rai nọ a ta na. (Kọl. 4:6) Whọ sae ta nọ: “Ẹme na o siuru kẹhẹ. Me yere owhẹ gaga nọ whọ rọ t’ẹme na k’omẹ.” Yere ai ziezi kẹ ẹme nọ a ta na. Romatotọ nọ enọ efa re whọ riẹ oware nọ o rrọ ai iroro gbe oware nọ a je roro ere. Daoma tẹrovi oware nọ wha jọ rọwo kugbe. Nọ whọ tẹ gwọlọ kpọ iroro rai rri ikere jọ, whọ sae ta nọ, “Kọ whọ sai roro no ẹdẹjọ sọ onana o rẹ lọhọ?” Whaha ora ọvo nọ whọ rẹ ta nọ o gba hayo ikẹ-isio.—2 Tim. 2:24, 25.
4 Epanọ ma gaviezọ te o rẹ sai fiobọhọ nọ ahwo a jẹ kiyo enọ mai ziezi. Ahwo a rẹ sae riẹ sọ ma be ginẹ gaviezọ kẹ ae ziezi. Ọsẹro ọnyawariẹ jọ o muẹrohọ nọ, “Nọ whọ tẹ romatotọ gaviezọ kẹ ahwo ziezi, o rẹ lẹliẹ ahwo si kẹle owhẹ, o tẹ jẹ rrọ odhesẹvia uvi isiuru nọ whọ kẹ ae.” Ezọ nọ ma rẹ gaviẹ kẹ amọfa o rẹ kẹ ae ọghọ, yọ o rẹ sae lẹliẹ ae kezọ kẹ emamọ usi nọ ma gwọlọ ta kẹ ae.—Rom 12:10