Ru Uvẹ Fihọ nọ Whọ rẹ rọ Ta Usiuwoma
1 Ahwo nọ a wo oghẹrẹ iyero sa-sa a rrọ ukoko Ileleikristi na. Ghele na, ma wo okugbe ọvo evaọ ọtamuo mai nọ ma be rọ gọ Jihova. (Ol. 79:13) Kọ otẹrọnọ ẹyao hayo iyero ebẹbẹ efa i ru rie bẹbẹ nọ ma gbe bi wobọ tere he evaọ ewhowho emamọ usi na, ẹvẹ ma sai ro ru uvẹ fihọ nọ ma rẹ rọ ta usiuwoma?
2 Evaọ Iruẹru Ikẹdẹ Kẹdẹ: Jesu ọ rehọ uvẹ ẹmeọta kpobi nọ u rovie fihọ rọ ta usiuwoma. Ọ ta usiuwoma kẹ Matiu nọ ọ jẹ nya ọfisi imiazọhọ vrẹ, ọ ta usiuwoma kẹ Zakiọs eva okenọ o je kpohọ erẹ, jẹ ta usiuwoma kẹ aye Sameria evaọ okenọ o je serihọ. (Mat. 9:9; Luk 19:1-5; Jọn 4:6-10) Evaọ iruẹru ikẹdẹ kẹdẹ mai, ma sae rẹriẹ ẹmeọta gheghe zihe ruọ usiuwoma ota re. Nọ ma tẹ wha Ebaibol lele oma, kugbe emebe-evẹvẹ hayo ibroshọ, o te k’omai uduowha nọ ma rẹ rọ ta kpahe ẹrọwọ mai.—1 Pita 3:15.
3 Kọ ẹyao o ru nọ whọ gbẹ be sai wobọ tere evaọ usiuwoma ota nẹthẹ ruẹthẹ na ha? Fi ẹro hotọ kẹ uvẹ nọ whọ sae rọ ta usiuwoma kẹ ahwo nọ a rrọ oria imu bi ruiruo gbe amọfa nọ whọ ruẹ. (Iruẹru 28:30, 31) Otẹrọnọ iyero ra i kru owhẹ fihọ uwou, kọ whọ dawo isẹri-ise ifonu hayo ẹkwoma ileta no? Oniọvo-ọmọtẹ jọ o re kere ileta se imoni riẹ nọ e rrọ ukoko ho ẹsikpobi. O re kere eme uduotahawọ no Ebaibol ze gbe eware nọ ọ rọ ẹro ruẹ nọ ọ jẹ ta usiuwoma fihọ ileta na.
4 Eva Oria Iruo Hayo Obọ Isukulu: Isiuru mai nọ ma rọ gwọlọ jiri Jihova e te jẹ wọ omai ru uvẹ fihọ nọ ma re ro wuhrẹ ahwo uzẹme na eva oria iruo gbe obọ isukulu. Owhowho-uvie jọ nọ ọ rrọ ikpe-eree ọ ta oware nọ ọ jọ Awake! se kpahe ọvẹre kẹ ahwo eklase riẹ. Nọ owuhrẹ riẹ ọ te riẹ oria nọ ọmọ na o je se kpahe oware nọ ọ ta na no, o te mu Uwou-Eroro na gbe Awake! họ ẹrehọ ẹsikpobi. Nọ ma tẹ jọ oria iruo mai fi obe ọ Ebaibol Wuhrẹ na họ oria nọ amọfa a jẹ sae rue riẹ, o rẹ sae lẹliẹ ae nọ enọ nọ i re rovie uvẹ fihọ kẹ omai ta usiuwoma.
5 Kọ whọ sai roro kpahe idhere nọ who re ro ru uvẹ usiuwoma ota fihọ evaọ iruẹru ikẹdẹ kẹdẹ ra? Ẹkwoma iyero mai nọ ma re ro ruiruo ziezi, joma daoma kẹdẹ kẹdẹ re ma “rehọ okẹ iwẹegọ ejiro rọ kẹ Ọghẹnẹ.”—Hib. 13:15.