UZOẸME AMARA NA: “VUẸ OVUẸ ẸME NA, MU ỌWHỌ RIẸ.”—2 TIM. 4:2.
Rọ Uvẹ Kpobi nọ U Rovie Fihọ Ta Usiuwoma Na
1. Eme ma wuhrẹ no oriruo Devidi ze?
1 Devidi ovie na ọ kuvẹ hẹ re eware nọ e via kẹe i ru ọwhọ nọ o wo evaọ egagọ Ọghẹnẹ kiekpotọ. Wọhọ oriruo, Devidi ọ jẹ gwọlọ bọ uwou kẹ Jihova. Nọ Jihova ọ whaha iẹe, Devidi o te nwene omaa riẹ, kẹsena ọ tẹ ruẹrẹ eware họ kẹ Solomọn re ọ bọ etẹmpol na. (1 Iv. 8:17-19; 1 Irv. 29:3-9) Orọnikọ eware nọ ọ rẹ sai ru hu eye Devidi ọ tẹrovi hi, rekọ enọ ọ rẹ sai ru. Ẹvẹ ma sae rọ rehọ aro kele Devidi nọ ma be rọ uvẹ kpobi nọ u rovie fihọ ta usiuwoma Uvie na?
2. Eme u fo nọ ma re ru?
2 Ru Onọ Ẹgba Ra U Te: Inievo buobu a ru uzuazọ rai lọhọ no re a sai ru ọkobaro obufihọ hayo ọrọ oke-kpobi. (Mat. 6:22) Kọ who gbe ru epọvo na re? Nọ whọ tẹ lẹ kpahe iẹe jẹ romatotọ kiẹ uyero ra riwi, ẹsejọhọ whọ te ruẹ nọ “ẹthẹ iruo” o rovie fihọ kẹ owhẹ. O tẹ rrọ ere, rehọ uvẹ na ruiruo ziezi.—1 Kọr. 16:8, 9.
3. Otẹrọnọ ma sai ru ọkobaro ho, uvẹ sa-sa vẹ o gbẹ riẹ nọ ma sae rọ ta usiuwoma ghele?
3 Kọ otẹrọnọ uyero ra o gbẹ kẹ owhẹ uvẹ te epanọ whọ sae rọ jọ ọkobaro ho? Daoma rehọ uvẹ ofa kpobi nọ u rovie fihọ kẹ owhẹ rọ ta usiuwoma na. Wọhọ oriruo, otẹrọnọ who bi ru iruo kugbe ahwo nọ a rrọ ukoko ho, daoma ta usiuwoma na kẹ ai nọ uvẹ na u te rovie. Otẹrọnọ who bi lele ẹyao muabọ, daoma ta usiuwoma evaọ oria nọ a be jọ siwi owhẹ na. Jọ o thọrọ owhẹ ẹro gbe he inọ ukoko na u ru ọruẹrẹfihotọ nọ ahwo nọ a kpako no hayo ohwo nọ okpẹyao jọ o kru ọ sae rọ niyẹrẹ iminiti 15, iminiti 30, hayo iminiti 45, o gbẹ maki te auwa ha evaọ amara. Nọ whọ tẹ be niyẹrẹ usiuwoma ota ra evaọ amara na, kareghẹhọ kele oke nọ whọ rọ ta usiuwoma oke-gheghe gbe obe kpobi nọ whọ rọ kẹ ahwo, te omobe-ovẹvẹ, obe uzizie Ekareghẹhọ gbe ọrọ okokohọ ubrotọ. Who te roro iminiti nọ whọ rọ ta usiuwoma evaọ etoke utioye na kugbe, u ti gb’owhẹ unu epanọ u re bu te!
4. Eme whọ gba riẹ mu no nọ who ti ru?
4 Makọ oghẹrẹ uyero kpobi nọ ma rrọ kẹhẹ, joma rọ uvẹ kpobi nọ u rovie fihọ ta usiuwoma na. Onana o te kẹ omai evawere nọ ma be daoma ru onọ ẹgba mai u te evaọ iruo Uvie na.—Mak 14:8; Luk 21:2-4.