Odibọgba Mai Yọ Iruo Ohrọoriọ
1 Jesu o muẹrohọ nọ ibuobu ahwo nọ a jẹ kezọ kẹ ẹme riẹ a jọ “oyoya, a tẹ jẹ vaha wọhọ igodẹ nọ i wo othuru hu.” (Mat. 9:36) Ọ rọ edhere ẹwolẹ gbe uyoyou ro wuhrẹ ai idhere Jihova, wha omosasọ se ai, jẹ rọ ohrọ rọ ẹro te ẹgwọlọ abọ-ẹzi rai. Nọ ma bi roro kpahe idhere riẹ na, ma re wuhrẹ epanọ ma re ro roro je wo ọdawẹ wọhọ epaọ Jesu, ohrọoriọ u ve dhesẹ oma via evaọ odibọgba mai.
2 Jae rehọ omoke jọ roro kpahe oware nọ Jesu o ru evaọ okenọ ahwo nọ a gwọlọ obufihọ a nyabru ei ze. (Luk 5:12, 13; 8:43-48) O dhesẹ ororokẹ rọkẹ ahwo nọ a wo ẹgwọlọ obọdẹ. (Mak 7:31-35) Ọ riẹ oghẹrẹ nọ eware e jọ ahwo oma, ọ tẹ rọ ere dhesẹ ọdawẹ kẹ ae. O rri vrẹ eriwo okafe ahwo na. (Luk 7:36-40) Evaọ uzẹme, Jesu o dhesẹ oghẹrẹ ohrọ nọ Ọghẹnẹ mai o wo.
3 ‘Ohrọ O Re Riẹ’: Orọnikọ fikinọ odibọgba na ọ jọ owha-iruo Jesu o lẹliẹ e riẹ whae haro ho. “Ohrọ” kẹ ahwo o jẹ wọe. (Mak 6:34) Ere ọvona nẹnẹ re, orọnikọ ma be jẹ vuẹ ovuẹ gheghe he, rekọ ma be daoma siwi uzuazọ ahwo nọ o rẹ ghaghae na. Daoma riẹ oware nọ o lẹliẹ ahwo be jẹ oghẹrẹ owọ jọ. Fikieme a jẹ be ruawa? Kọ isu egagọ erue a gbabọ kẹ ae jẹ be viẹ ae họ? Uvi isiuru nọ ma re dhesẹ kẹ amọfa o rẹ sae wọ ae nọ a jẹ kezọ kẹ emamọ usi na.—2 Kọr. 6:4, 6.
4 Ohrọ nọ a re dhesẹ kẹ ohwo u re duobọ tei udu. Wọhọ oriruo: Aye jọ nọ ọmọtẹ emerae-esa riẹ o whu o je weri gaga. Nọ Isẹri Jihova ivẹ jọ i kporo ẹthẹ riẹ, aye na ọ tẹ ta kẹ ae nọ a ruọ eva avọ ẹjiroro nọ o ti ro lele ai sikẹ nọ a tẹ ta kpahe oware nọ o lẹliẹ Ọghẹnẹ be kuvẹ uye-oruẹ. Rekọ aye na ọ ta uwhremu na nọ: “A kezọ kẹ omẹ avọ ọdawẹ ologbo nọ a dhesẹ, nọ a jẹ nyavrẹ, eva e were omẹ te epanọ mẹ rọ ta kẹ ae inọ a wariẹ zihe ze eva oke-ofa.” Kọ whọ be daoma dhesẹ ọdawẹ kẹ ohwo kpobi nọ whọ nyaku evaọ odibọgba na?
5 Ohrọriọ nọ ma rẹ daoma wo u ti fiobọhọ k’omai wha uvi omosasọ se amọfa. Evaọ ere oruo, ma rẹ wha orro se “Ọsẹ ohrọ kpobi” na, Jihova.—2 Kọr. 1:3.