Eva E Be Were Omai nọ Ma be Dao Ẹgba Mai Kpobi Evaọ Iruo Jihova!
1 O were Pọl ukọ na eva re ‘ọ raha uzuazọ riẹ’ re ọ sai ru iruo odibọgba riẹ gba. (2 Kọr. 12:15) Epọvo na nẹnẹ, Ileleikristi buobu a bi ruiruo gaga wọhọ ekobaro. Efa, dede nọ a wo ewha-iruo egbẹgbẹdẹ uviuwou nọ e be lẹliẹ ai wo uvẹ tere he a fi oke họ nọ a re ro kpohọ usiuwoma ota koka koka. Ejọ ghelọ ebẹbẹ ẹyao nọ a wo, a be rehọ umutho ẹgba nọ a wo rọ wha iruo Uvie na haro. O rrọ oware evawere nọ ma be rọ ruẹ ahwo Jihova nọ e be dao ẹgba rai kpobi ro ru iruo Jihova ghelọ owho hayo uyero uzuazọ rai!
2 Uyoyou Ọrivẹ: Utho ẹgba mai nọ ma re ru evaọ iruo Jihova, uyoyou nọ ma re dhesẹ kẹ Ọghẹnẹ gbe erivẹ mai, o rẹ lẹliẹ omai wo iroro efuafo. Fikinọ Pọl ọ rọ ẹgba riẹ kpobi ro ru iruo usiuwoma ota na, ọ sae ta avọ evawere nọ: “Nẹnẹ na mẹ jọ evie rai kpobi se isẹri nọ azẹ ahwo kpobi ono omẹ uzou.” (Iruẹru 20:24, 26; 1 Tẹs. 2:8) Obọ nọ ma re wo evaọ iruo odibọgba na wọhọ epanọ ẹgba mai gbe uyero mai o kuvẹ te, u re ru nọ ma gbẹ reabe azẹ hẹ.—Izik. 3:18-21.
3 Oma nọ ma rẹ dawo re ma fiobọhọ kẹ amọfa o rẹ wha evawere ze. (Iruẹru 20:35) Oniọvo jọ ọ ta nọ: “Nọ mẹ tẹ rehọ okpẹdoke na soso ru iruo Jihova no, oma o rẹ ginẹ rrọ omẹ nọ me te te uwou evaọ owọwọ. Rekọ eva e rẹ were omẹ, yọ me re yere Jihova nọ ọ rọ k’omẹ oghọghọ nọ ohwo ọvo ọ rẹ sai mi omẹ hẹ.”
4 Uyoyou kẹ Ọghẹnẹ: Ẹjiroro nọ ọ mai wuzou nọ ma be rọ rehọ ẹgba mai kpobi ru iruo Jihova họ, o rẹ lẹliẹ eva were Ọsẹ obọ odhiwu mai. Uyoyou kẹ Ọghẹnẹ o rẹ wọ omai koko izi riẹ, nọ o kẹre te usiuwoma ota gbe ilele nọ ma re ru. (1 Jọn 5:3) Nọ ahwo a gbẹ maki se iruo mai gboja ha hayo a tẹ be wọso omai, ma rẹ ruabọhọ ruiruo kẹ Jihova avọ oghọghọ.
5 Oke nana o rrọ oke nọ ma re ro siuke kpemu hu. Oke ivuẹvu na ma rrọ na. (Mat. 9:37) Evaọ oke ivuẹvu ọwhẹrẹ ọ rẹ mai ro ruiruo kri, keme omoke nọ o wo nọ o re ro koko ekakọ riẹ họ taure e tẹ te raha u tulo ho. Oke nọ o riẹ kẹ ivuẹvu abọ-ẹzi na u tulo ho. Fikiere, nọ ma riẹ oghẹrẹ oke nọ ma be rria na, joma ruabọhọ ẹgba mai kpobi nọ ma re ro ru iruo odibọgba na.—Luk 13:24; 1 Kọr. 7:29-31.