Ọruẹrẹfihotọ Ẹdẹ Okokohọ Obọdẹ Ọkpokpọ

Uzoẹme okokohọ obọdẹ rọkẹ ukpe 2008 na họ ‘Mai Họ Ọviẹẹ,—Jihova Họ Ọmebẹ Mai,’ onọ a rehọ no obe Aizaya 64:8 ze. Ithubro abọ-ẹzi nọ a te jọ okokohọ nana kẹ e te lẹliẹ omai wo ovuhumuo odidi kẹ areghẹ, ẹdhoguo-okiẹrẹe, ogaga, gbe uyoyou Jihova wọhọ Ọmebẹ Ologbo na.

Ẹme nọ ọsẹro okogho na o ti ru, “Ruiruo Wọhọ Okwakwa nọ U Wo Ọghọ Evaọ Odibọgba Na,” u ti dhesẹ epanọ ahwo buobu a bi ro wo oghale fikinọ a riẹ uzẹme na je bi wuhrẹ amọfa kpahe iẹe. Ẹme na “Eroro-Didi O Te Kpọ Owhẹ” u ti dhesẹ epanọ eroro-didi kpahe ehri-izi ikiẹrẹe Jihova o rẹ rọ thọ omai. Ọkovuẹ ọrara na ọ te rehọ izoẹme enana ta ẹme “Wha Kielele Akpọ Nana Ha” gbe “Jọ Ọmebẹ Ologbo na Ọ Ma Owhẹ.” Esẹgbini gbe izoge na a ti wo uduotahawọ no eme enana ze “Izoge Nọ Jihova O bi ro Ruiruo” gbe “Uvi Iruo Nọ I Te Esẹgbini Evaọ Ewuhrẹ Emọ.” Ma te rọ ẹkwoma idhesẹvia gbe ahwo nọ a te kiẹ riwi ro yo jẹ ruẹ eware nọ inievo-emezae gbe erọ emetẹ mai a be sai ru evaọ odibọgba na. Ahwo nọ a gwọlọ dhesẹ omaromudhe rai kẹ Ọghẹnẹ via ẹkwoma ame-ọhọ a rẹ vuẹ ọsẹro ukoko rai ababọ oke-oraha. Wha Uwou-Eroro nọ a ti wuhrẹ evaọ ẹkpoka okokohọ obọdẹ na lele oma.

Ọmebẹ Ologbo na o re ru oware kpobi nọ ọ jiroro riẹ. Rekọ obọ mai o rrọ, re ma salọ sọ ma rẹ se hayo kẹe uvẹ re ọ m’omai ruẹrẹ họ oghẹrẹ nọ ọ gwọlọ. Enọ e roma kẹ Jihova re ọ ma ae je ru ai fo, a wọhọ ukulu ọviẹẹ nọ ọ rrọ obọ ọmebẹ, onọ ọ ma, ralọ, bru ereghẹ họ, jẹ rehọ eri erae ru woma fihọ okwakwa nọ a re ro ru emamọ oware. Ma tẹ be romakpotọ kẹ Jihova evaọ edhere otiọna o rẹ wha irere s’omai jẹ kpare esuo riẹ kpehru.