Ọruẹrẹfihotọ Okokohọ Okogho Ọkpokpọ

Jihova o fo ọnọ ma rẹ kẹ oruaro. Ẹvẹ ma rẹ rọ kẹ Jihova oruaro? Eme o jẹ rrọ bẹbẹ kẹ ahwo jọ re a kẹ Jihova oruaro? Didi eghale i bi te ahwo nọ e be kẹ Ọghẹnẹ oruaro enẹna? A te jọ ọruẹrẹfihotọ okokohọ okogho ọrọ ukpe 2008 na kuyo enọ nana. Uzoẹme okokohọ na họ ‘Wha Ru Eware Kpobi rọ Kẹ Ọghẹnẹ Oruaro.’ (1 Kọr. 10:31) Roro kpahe eware nọ ma te reawere rai evaọ okokohọ edẹ ivẹ ọrọ ithubro abọ-ẹzi nọ ọ be tha na.

Ọsẹro ubrotọ na ọ te rọ izoẹme nana ta ẹme “Fikieme Ma Jẹ Kẹ Ọghẹnẹ Oruaro?” gbe “Jọ Emamọ Oriruo Evaọ Ẹnyalele Itee Ọghẹnẹ.” Ọ te kẹ ovuẹ ogbotu na “Amono Họ Ahwo nọ A be Kẹ Ọghẹnẹ Oruaro?” gbe ẹme ekuhọ na, “Ma be Rọ Okugbe-Ọvo Kẹ Ọghẹnẹ Oruaro Evaọ Akpọ-Soso.” Ọye o ti je ru Isukulu Odibọgba Esuo-Ọghẹnẹ na. Ọsẹro okogho na ọ te rọ izoẹme obotọ na ta ẹme “Rehọ Evawere Dhesẹ Oruaro Ọghẹnẹ Via,” “Ẹromuhọ Ẹgwọlọ Okogho Na,” gbe “Dikihẹ Whawha ‘Eva Uzẹme’ Na” onọ a rehọ no 2 Pita 1:12 ze. Evaọ ẹme ọfa, ma ti wuhrẹ inọ “Iruo Ọkobaro E rẹ Wha Oruaro Se Ọghẹnẹ.” Evaọ usu ọzọhọkugbe-eriariẹ ivẹ nọ i ti duobọte omai iroro na, ọrọ ọsosuọ na nọ uzoẹme riẹ o rrọ “Epanọ Ma rẹ rọ Kẹ Ọghẹnẹ Oruaro Evaọ Kabọ Kabọ Uzuazọ Mai” u ti dhesẹ otofa uvevẹ ọrọ eme ọ 1 Ahwo Kọrint 10:31 nọ a rọ ẹgba ẹzi kere na. Ọzọhọkugbe-eriariẹ avivẹ na “Egagọ Efuafo nọ A bi ro Jiri Jihova” o te ta kpahe abọ sa-sa ọrọ egagọ mai. Ma te reawere orukpẹre ọ Uwou-Eroro Na gbe ese ikere okpẹdẹ na evaọ Ẹdoka. Ọruẹrẹfihotọ kẹ ame-ọhọ ọ te jariẹ re.

Ahwo-akpọ buobu a be daezọ Ọghẹnẹ hẹ. Ikpeware nọ ahwo-akpọ a bi ru i reghe ahwo buobu aro no te epanọ a gbẹ be daezọ re a roro kpahe oruaro Jihova ha. (Jọn 5:44) Rekọ u mu omai ẹro inọ o rẹ kẹ erere re ma raha oke roro kpahe epanọ ‘Ma re ro ru eware kpobi kẹ Ọghẹnẹ oruaro.’ Ma omaa re whọ jariẹ re whọ sai wo erere vọvọ no abane okokohọ na ze.