Ọruẹrẹfihotọ Okokohọ Okogho Ọkpokpọ

Ẹvẹ ma sai ro mugba kẹ ahwo nọ a be wọso egagọ uzẹme kekeke? Ẹvẹ ma sae rọ kparobọ vi omodawọ Setan nọ ọ be rọ gwọlọ ru omai kie ruọ akpọ omuomu nana? A te jọ ọruẹrẹfihotọ okokohọ okogho ukpe 2009 na kiyo enọ nana nọ i wuzou na. Uzoẹme riẹ họ ‘Wha Hae Rọ Ewoma Fi Eyoma Kparobọ.’ (Rom 12:21) A te jọ okokohọ na t’ẹme kpahe eware nọ e rrọ obotọ na.

Ọsẹro ubrotọ na o ti ru eme nana “A Thọ Omai Kpahe No Re Ma Rọ Ewoma Fi Eyoma Kparobọ,” “Yọrọ Oma Kpahe Evaifihọ Omobọ Ra Vrẹta!,” “Emuemu Kpobi O Ti Kuhọ Kẹle!,” gbe “Ẹbọga Ẹrọwọ Mai Re Ma Fi Akpọ na Kparobọ.” Ọsẹro okogho ọ te rọ izoẹme enana t’ẹme “Enẹna Họ Oke nọ Ma rẹ rọ Jaja Aro Vi!,” nọ a rehọ no Ahwo Rom 13:11-13 ze, gbe “Whọ Jọ Udu U Whrehe Owhẹ Evaọ Oke Uye He,” nọ a rehọ no Itẹ 24:10 ze. Ma bi je rẹro ẹme nana “Ẹta Kpahe Ẹgwọlọ Okogho Na” nọ ọsẹro okogho ọ te ta. Ẹme ọfa nọ ọ te kẹ uduotahawọ gaga họ “Kọ Whọ Sai Wo Obọ ‘Eva Odibọgba’ Na—Ẹkwoma Iruo Ọkobaro?” Evaọ ọzọhọkugbe-eriariẹ ivẹ nọ a ti ru evaọ okokohọ na, uzoẹme ọrọ ọsosuọ họ “Dadamu Kẹ Eghẹ Ẹdhọ.” U ti fiobọhọ kẹ omai vuhu jẹ whaha eghẹ Ẹdhọ nọ o bi ro ruiruo evaọ abọ ẹnyaharo-eware-ikuo, eware-ẹkeriotọ, gbe isukulu. Ọzọhọkugbe-eriariẹ na “Daoma Wo Ogaga nọ Who re ro Mugba kẹ Setan” u ti dhesẹ oghẹrẹ nọ ma sai ro fi uthubro nọ o rrọ Ahwo Ẹfẹsọs 6:10-18 na họ iruo.

Iruo usiuwoma ota Uvie na i re fi obọ họ kẹ omai fi Setan nọ ọ be wha eyoma oruo ze na kparobọ. (Evia. 12:17) Agbẹta nọ Setan ọ be rọ wọso Isẹri Jihova ẹsikpobi na! (Aiz. 43:10, 12) Rekọ Ẹdhọ ọ te kparobọ vievie he keme ma gbariẹ mu no inọ ma rẹ rehọ ‘ewoma fi eyoma kparobọ.’ Mu oma họ ẹruẹrẹhọ enẹna re whọ sai wo erere vọvọ no abọ-ane okokohọ okogho na ze.