Ọruẹrẹfihotọ Ẹdẹ Okokohọ Obọdẹ Ọkpokpọ

Uzoẹme okokohọ obọdẹ rọkẹ ukpe 2009 na họ ‘Yọrọ Iruo Odibọgba na, Re Who Ru Ei Gba,’ nọ a rehọ no Ahwo Kọlọsi 4:17 ze. Mai Ileleikristi, ma se uduotahawọ yena gboja gaga. Utee mai họ re ma rọ eva mai kpobi ru odibọgba mai gba wọhọ epanọ Jesu o ru. (Jọn 17:4) Pọl uko na o fi emamọ oriruo h’otọ re evaọ abọ nana. Ọ gba riẹ mu inọ o re ru iruo odibọgba riẹ te oka.—Iruẹru 20:24.

Ẹme ọsẹro okogho na u ti dhesẹ oghẹrẹ nọ iwhowho-uvie sa-sa a bi ro fi ebẹbẹ kparobọ evaọ odibọgba rai. A te jọ ẹme na “Rọ Ẹro Te Oware Nọ Whọ Kọ” ta kpahe epanọ ma sai gine ro fiobọhọ kẹ ‘enọ i wo eva ezi kẹ uzuazọ ebẹdẹ bẹdẹ.’ (Iruẹru 13:48) Oruẹme ọrara na ọ te jọ ẹme na “Edhesẹ Oma Mai Wọhọ Egbodibo” ta kpahe 2 Ahwo Kọrint 6:1-10 unọjọ utọjọ. Evaọ oke uvo, ọ te rehọ uzoẹme na “Rri Odibọgba Ra Ghaghae” rọ t’ẹme. Ababọ avro, whọ te jọ eme nana “Te Emaha Te Ekpako A Bi Wo Oghọghọ Eva Odibọgba Na” gbe “Izoge Nọ I Bi Ru Odibọgba Rai Gba” wo uduotahawọ. Ahwo nọ a gwọlọ nọ a rẹ rehọ ame-ọhọ dhesẹ omaromudhe rai via evaọ ẹdẹ okokohọ obọdẹ hayo okokohọ okogho nọ e be tha na, jọ a vuẹ ọsẹro ukoko rai ababọ oke-oraha. Abọjọ nọ o wuzou gaga evaọ ikokohọ mai họ ewuhrẹ ọrọ Uwou-Eroro Na. Wha Uwou-Eroro nọ a ti wuhrẹ evaọ oka okokohọ obọdẹ na lele oma ziọ okokohọ na.

Re ma sai ru iruo odibọgba mai gba, ma rẹ daoma ruẹ nọ iruẹru efa hayo isiuru eware efa e rehọ oke nọ ma re ro ru iruo nọ Jihova o mu họ omai obọ họ. Jọ uduotahawọ abọ-ẹzi nọ a te jọ ọruẹrẹfihotọ ẹdẹ okokohọ obọdẹ nana kẹ na u fiobọhọ k’omai kpobi vuhumu oware nọ u fo nọ ma re ru re ma tẹrovi odibọgba na, gbe epanọ ma sai ro ru ei gba.