Ẹdẹ Obọdẹ nọ A rẹ Ruẹrẹ Họ kẹ Ẹtohọ Ebe-Iwuhrẹ Ebaibol
1 Muhọ no January 2009 vrẹ, ukoko kpobi u re fi urere ẹkpoka jọ họ kamara kamara, o sae jọ oka ọsosuọ amara na, nọ a rẹ jọ tẹrovi ẹtohọ ebe-iwuhrẹ Ebaibol. Ẹdẹ nana ọ sae jọ Ẹdẹ-Ọmaha hayo Ẹdoka, onọ u kiehọ ukoko na oma kpobi. Otẹrọnọ ohwo nọ ma nyaku evaọ ẹdẹ yena ọ rọwo obe-uwuhrẹ Ebaibol ho, ma sai fi obe ọ Ebaibol Wuhrẹ na hayo emagazini họ ada kẹe ghele. Ekpako gbe idibo iruiruo kpobi a rẹ daoma re a wobọ vọvọ evaọ ọruẹrẹfihotọ nana je fiobọhọ kẹ iwhowho-uvie to ebe-iwuhrẹ Ebaibol họ.
2 Ogbẹgwae Iruo Ukoko na o rẹ jiroro urere ẹkpoka nọ a rẹ jọ fi ẹdẹ jọ họ nọ a rẹ rọ to ebe-iwuhrẹ Ebaibol họ. N’oke t’oke wha rẹ kareghẹhọ iwhowho-uvie re a sae ruẹrẹ oma kpahe jẹ daoma ziezi to ebe-iwuhrẹ Ebaibol họ no uwou ruọ uwou gbe okenọ a tẹ be wariẹ weze bru ahwo nọ a dhesẹ isiuru.
3 Epanọ a rẹ rọ Ruẹrẹ Oma Kpahe: Ma sae jọ uko-obeva Odibọgba Uvie Mai ọrọ March 2006 gbe ẹwẹ-obe avọ 6 ọrọ omobe ọ Epanọ A ro Muhọ Jẹ Ruabọhọ Ebaibol E rọ Jiroro na ruẹ idhere nọ ma sae rọ to ebe-iwuhrẹ Ebaibol họ. Ahwo jọ a sae rehọ omobe-ovẹvẹ wọhọ Kọ Whọ Gwọlọ Riẹ Uzẹme Na? ro ruiruo. (Rri ẹwẹ-obe avọ 6 ọrọ Odibọgba Uvie Mai nana.) Ofariẹ, Odibọgba Uvie Mai ọrọ August 2007, ẹwẹ-obe avọ 3 o kẹ idhere nọ ma sae rọ to ebe-iwuhrẹ Ebaibol họ nọ ma te zihe bru ahwo nọ ma fi emagazini họ ada kẹ. A rẹ ghale ekpako gbe idibo iruiruo fihọ nọ e rẹ rẹrote omakugbe kẹ usiuwoma ota nọ o rẹ vrẹ iminiti 10 rite 15 ho, yọ a rẹ jọ oke nana ta hayo ru odhesẹvia ugogo edhere ọvo hayo ivẹ jọ nọ a sae rọ to ebe-iwuhrẹ Ebaibol họ.
4 Uzẹme o rrọ, inọ orọnikọ ohwo kpobi o ti dede obe-uwuhrẹ Ebaibol rehọ họ hayo ruabọhọ uwuhrẹ nọ ma tohọ kugbe ei no ho. Onana o rẹ lẹliẹ omai siuke kpemu hu, keme Jihova họ ọnọ o bi si enọ e wọhọ igodẹ ziọ ukoko riẹ. (Jọn 6:44) Orọnikọ ibi uzẹme nọ ma rẹ kọ họ ahwo udu ọvo họ owha-iruo mai hi, rekọ ma rẹ rẹrote je ku ame họ ibi na, yọ oyena o kẹre te ebe-iwuhrẹ Ebaibol nọ ma re ru kugbe ahwo nọ a dhesẹ isiuru. Ere oruo, ma re ro dhesẹ nọ mai yọ ibe iruiruo Ọghẹnẹ.—1 Kọr. 3:9.