Rehọ Ebaibol Na Ruiruo Avọ Onaa
1. Fikieme Ebaibol na u ro wuzou gaga?
1 Ebaibol na nọ a rọ ẹgba ẹzi Ọghẹnẹ kere na nọ ma re ro ruiruo ziezi o sai fi obọ họ k’omai wuhrẹ ahwo uzẹme na jẹ fere iwuhrẹ erue via.—2 Tim. 2:15; 1 Pita 3:15.
2. Eme ọ rẹ sai fi obọ họ k’omai duku oria ikere lọlọhọ?
2 Se Ebaibol na re Whọ Riẹ Eme riẹ Ziezi: Epanọ ohwo ọ rehọ okwakwa ruiruo te, ere o rẹ reriae obọ te. Ebaibol na nọ who re se no emuhọ te ekuhọ o rẹ lẹliẹ owhẹ riẹ oware nọ Ebaibol u gine wuhrẹ. Onana u re je fi obọ họ k’owhẹ kareghẹhọ ikereakere, jẹ sai rovie kpohọ ae lọlọhọ. Nọ whọ be riẹ Ikereakere na ziezi na, whọ te sae t’ẹme avọ ajọwha gbe imuẹro nọ whọ tẹ be ta usiuwoma kẹ amọfa.—1 Tẹs. 1:5.
3, 4. (a) Eware jọ vẹ ma rẹ sai ru nọ ma jẹ riẹ Ebaibol na ziezi? (b) Kọ whọ dao idhere efa jọ no re whọ sae riẹ eme Ebaibol na ziezi?
3 Wo uruemu nọ who re ro rovie Ebaibol ra lele ohwo nọ o bi ru ẹme evaọ iwuhrẹ ukoko. Nọ who te bi ru uwuhrẹ omobọ ra gbe nọ whọ tẹ be ruẹrẹ oma kpahe kẹ iwuhrẹ ukoko, se ikere kpobi nọ a fodẹ, je roro kpahe epanọ who re ro fi ai h’iruo. Ahwo buobu a vuhumu no inọ Ebaibol na nọ a re se noze dẹẹ viukpọ ekọmputa hayo ẹwẹ-obe gheghe nọ a rehọ ekọmputa kere eme fihọ, u re fi obọ họ nọ a je duku oria Ebaibol lọlọhọ nọ a tẹ rrọ usiuwoma.—Jọn 14:26.
4 Iviuwou jọ a ruẹrẹ oke họ nọ a re ro wuhrẹ eria Ebaibol uzuzou. A re ru onana ẹkwoma abọjọ ekade nọ a re kere oria ikere na jọ fihọ, a ve je kere uzedhe eme ikere na fihọ abọdekọ riẹ. A rẹ rehọ onana dao omomọvo sọ ọ sae ta eme ikere na via uzuzou, hayo kareghẹhọ oria nọ u noze. Oghẹrẹ nọ a rẹ rọ ta usiuwoma nọ ma re wuhrẹ, gbe Ebaibol na nọ ma rẹ rọ k’uyo onọ hayo ẹme nọ ohwo ọ kpare ze o rẹ lẹliẹ omai wo onaa ziezi.
5. Fikieme o jẹ gwọlọ nọ ma wo ẹnyaharo evaọ onaa nọ ma be rọ rehọ Ebaibol na ruiruo?
5 Uvumọ obe nọ a rẹ rọ wawo Ebaibol na o riẹ hẹ. Ebaibol na ọvo u wo eme nọ e rẹ sai ru ahwo wo ‘esiwo.’ (2 Tim. 3:15) Nọ ahwo buobu nọ a rrọ ẹkwotọ mai a riẹ kpahe eme eghaghae nọ e rrọ Ebaibol na ha na, onana o gwọlọ nọ ma re wo ẹnyaharo evaọ onaa mai re ma sae rehọ eme nọ e rrọ Ebaibol na ro wuhrẹ ai.—Itẹ 2:1-5.