Epanọ Whọ Sae rọ Kareghẹhọ Eria Ebaibol nọ Who Se

Ẹsejọhọ who se ku oria Ebaibol nọ o were owhẹ gaga no. O sae jọ nọ oria na u ru eva were owhẹ nọ who sei, hayo o sae jọ nọ u ru nọ who ro nwene ekpehre iroro jọ nọ who wo. O sae tubẹ via nọ whọ gwọlọ rọ oria Ebaibol yena tuduhọ amọfa awọ. (Ol. 119:11, 111) Rekọ nọ whọ nwane kpama no oria nọ who jo sei na o tẹ thọrọ owhẹ ẹro no. O tẹ rrọ ere, eware nọ ma be te ta na e sai ru owhẹ kareghẹhọ iẹe.

• Kere ẹme jọ fihọ oria tag evaọ JW Library® kpahe oria Ebaibol na. Nọ who te se oria Ebaibol jọ nọ o were owhẹ gaga, kere iei fihotọ, re who kere ẹme jọ kpahe iẹe evaọ oria tag na. Whọ sai kere fihọ iẹe nọ “Eria Ebaibol nọ E Were Omẹ.” Ru eria ikere nọ whọ gwọlọ kareghẹhọ enẹ re whọ gbẹ gwọlọ ae bẹ hẹ.

• Fi oria Ebaibol nọ who se na họ oria nọ whọ sae jọ ruẹ e riẹ. Kere oria Ebaibol nọ whọ gwọlọ na fihọ ẹwẹ-obe jọ. Who ve fi ei họ oria nọ whọ sae jọ ruẹ e riẹ ẹsikpobi. Ahwo jọ a re fi ẹwẹ-obe na họ ughẹgbe rai. Yọ amọfa a rẹ tae mu ẹthẹ ifriji rai. Ahwo jọ a rẹ rehọ uwoho oria Ebaibol na, a ve fi ei họ oria nọ a sae jọ kake ruẹ e riẹ evaọ ifonu hayo ekọmputa rai.

• Kere oria Ebaibol na fihọ ẹwẹ-obe jọ hayo ekade. Kere oria Ebaibol na fihọ abọjọ ekade na. Who ve kere eme nọ e rrọ oria Ebaibol na họ abọ nọ o kiọkọ. Who ve ku obe hayo ekade na rẹriẹ kpohọ ofẹ nọ who kere oria Ebaibol na họ. Whọ vẹ daoma re whọ kareghẹhọ eme nọ e rrọ oria Ebaibol na. Whọ sai je rri abọ nọ who kere eme Ebaibol na họ re whọ jọ uzou ra kareghẹhọ oria nọ ẹme na o no ze.