Oware nọ Ma rẹ rọ Karo
1. Ẹvẹ Jesu o ro dhesẹ nọ iruo odibọgba na i wuzou kẹe?
1 Iruo odibọgba na Jesu ọ rọ karo. Ọ rehọ owotọ nya emaele buobu evaọ ẹkwotọ Palẹstain re ọ sae ta usiuwoma kẹ ahwo. O yeri uzuazọ olọlọhọ re ọ sae rehọ oke buobu ta usiuwoma na. (Mat. 8:20) Nọ ogbotu ahwo a jẹ gwọlọ da Jesu ji re o siwi ahwo rai nọ e jẹ mọ, ọ ta nọ: “Mẹ rẹ vuẹovuẹ usiuwoma uvie Ọghẹnẹ [kẹ] ewho efa re; keme fiki onana a je vi omẹ ze.”—Luk 4:43.
2. Fikieme iruo odibọgba na i ro wuzou kẹ Jesu tere?
2 Fikieme iruo odibọgba na i ro wuzou kẹ Jesu tere? Oware nọ o mae jariẹ oja họ, erufuọ odẹ Jihova. (Mat. 6:9) O you Ọsẹ obọ odhiwu riẹ, yọ uyoyou nana o wọ riẹ yoẹme kẹe je koko ijaje Riẹ kpobi. (Jọn 14:31) Ofariẹ, o wo uvi ọdawẹ kẹ ahwo, yọ ọ gwọlọ fi obọ họ kẹ ae.—Mat. 9:36, 37.
3. Ẹvẹ ma rẹ sai ro dhesẹ nọ odibọgba na ma rọ karo?
3 Rọ Aro Kele Jesu: Re ma wo ọkpọ ẹzi Jesu evaọ iruo odibọgba na o sae jọ bẹbẹ keme eware nọ e rẹ rehọ oke mai jẹ wha ereghe ze e da akpọ na fia. (Mat. 24:37-39; Luk 21:34) Fikiere, ma rẹ daoma re ma muẹrohọ eware nọ e mai wuzou, fi oke họ nọ ma rẹ rọ ruẹrẹ oma kpahe je kpohọ usiuwoma kẹse kẹse. (Fil. 1:10) Ma rẹ daoma yeri uzuazọ olọlọhọ jẹ whaha omaweromẹ akpọ na nọ ma rẹ re t’oka.—1 Kọr. 7:31.
4. Fikieme u ro wuzou re ma rehọ eware nọ e mae roja karo enẹna?
4 Nọ ohwo owareghẹ o gbe wo oke bu hu, oware nọ o mai wuzou ọ rẹ kaki ru. Wọhọ oriruo, nọ ọ tẹ riẹ inọ ẹmo ọ be tha, ọ rẹ rehọ omoke nọ u kiọkọ gbe ẹgba riẹ rọ dhogbo epanọ uviuwou riẹ o te rọ zọ, jẹ ta kẹ erivẹ riẹ kpahe onana. Ọ rẹ kpairoro vrẹ eware nọ i wuzou tere he tao. Omoke kakao ọvo u kiọkọ re Amagẹdọn o fi ze. (Zef. 1:14-16; 1 Kọr. 7:29) Re ma sai siwi oma mai gbe enọ e be gaviezọ kẹ omai, ma re muẹrohọ uruemu gbe uwuhrẹ mai, makọ evaọ ukoko na hayo nọ ma tẹ rrọ kugbe ahwo obọ akpọ. (1 Tim. 4:16) Ababọ avro, re ma sae zọ ma rẹ rọ iruo odibọgba na karo!