Ẹkpẹti Onọ

◼ Igogo idhere vẹ ma sae rọ tha ekobaro uke?

Wariẹ akpọ na họ evaọ ukpe iruo 2009, enwenọ inievo-emezae gbe emetẹ 800,000 a ru iruo ọkobaro oke-kpobi gbe ọrọ obọdẹ. Egbodibo oke-kpobi nana a be rehọ oke, ẹgba, gbe eyero rai rọ wha usiuwoma na haro. (Itẹ 3:9) Omodawọ rai o be were Jihova oma! Idhere vẹ ma sae rọ rehọ aro kele Jihova re ma fiba oghọghọ gbe akọthiwo rai evaọ iruo nana?

Ababọ avro, eme uduotahawọ mai e sai fi obọ họ kẹ ae ruabọhọ iruo ọkobaro rai. (Itẹ 25:11) Kọ ma sae jọ iruẹru koka koka mai ru inwene jọ re ma sai kuomagbe ekobaro kpohọ usiuwoma? O tẹ gwọlọ, ma rẹ sae rehọ omoto hayo imotosaikoro mai rọ wọ ae hayo kẹ ae ugho ofa. (1 Kọr. 13:5; Fil. 2:4) Ma rẹ sae jẹ thae uke ẹkwoma ọghọ nọ ma re ru ae je zizie ae ziọ uwou mai kẹ emuọriọ ẹsejọ.—1 Pita 4:8, 9.

Ikereakere na e kẹ imuẹro inọ Jihova ọ rẹ rẹrote enọ e rehọ Uvie riẹ karo. (Ol. 37:25; Mat. 6:33) Edhere jọ nọ o bi ro ru onana họ ẹkwoma inievo Ileleikristi iyoyou mai. (1 Jọn 3:16-18) Wọhọ epanọ whọ riẹ, orọnikọ ekobaro a re rẹro nọ amọfa a te kẹ ae igho ho. Yọ orọnikọ ẹsikpobi a rẹ sae nwane ta kẹ amọfa ha nọ a tẹ gwọlọ oware jọ. Fikiere, o gwọlọ nọ ma re fiẹrohotọ ziezi re ma ruẹ oria nọ ekobaro a jo wo ẹgwọlọ re ma ru ‘onọ o kare rai rọ kẹ ae.’—2 Kọr. 8:14, 15.

Okenọ Fibi, ọtausiuwoma ajọwha nọ ọ jọ ukoko Kẹnkria evaọ ikpe-udhusoi ọsosuọ o kpohọ Rom, Pọl ọ tuduhọ inievo obọ Rom awọ inọ: “Wha rehọ iẹe eva Ọnowo na wọhọ epanọ [u fo] erezi na, . . . wha fiobọhọ kẹe eva eware kpobi nọ [ọ jọ] obọ rai guọlọ.” (Rom 16:1, 2) Ma wo uvẹ otiọye re nọ ma rẹ rọ tha ekobaro oke-kpobi gbe erọ obọdẹ nọ e rrọ ukoko mai uke enọ i bi whowho emamọ usi na ababọ eriosehọ.—Iruẹru 5:42.