A Fi Oriruo Ẹrọwọ Hotọ K’Omai
1 Abọ iruo odibọgba oke-kpobi jọ nọ a muhọ evaọ ukpe ọ 1937 họ iruo ọkobaro obọdẹ. Ezae gbe eyae nọ i te ziezi, nọ i wo ona evaọ odibọgba Oleleikristi na a rehọ unevaze jẹ iruo rehọ re a kpohọ oria kpobi nọ Ukoko na u vi rai nyae jọ ta usiuwoma. Dede nọ anwọ oke yena ze ikpe buobu e vrẹ no, ekobaro obọdẹ a gbe bi dhesẹ oriruo ẹrọwọ nọ u fo nọ ma rẹ rọ aro kele.—Hib. 6:12.
2 A Kobaro: No emuhọ ze, ekobaro obọdẹ a kobaro evaọ iruo usiuwoma ota na ẹkwoma egramafonu nọ a je ro ruiruo evaọ unuẹthẹ ahwo nọ a be t’ẹme kẹ. A rehọ eme nọ a ta fihọ erekọdo ro ruiruo je ro lele ahwo ta kpahe Ebaibol evaọ okenọ a te kpohọ izihebro. A je ru onana evaọ ewho ilogbo nọ ikoko e rrọ. Evaọ uwhremu na, a te je vi ekobaro obọdẹ kpohọ eria nọ ẹgwọlọ kẹ iwhowho-uvie ọ jẹ mae rro. A je zihe bru ohwo kpobi nọ o dhesẹ isiuru kpahe ovuẹ Uvie na, a te je ru ebe-iwuhrẹ Ebaibol. Fiki omodawọ rai, a to ikoko nọ i bu te egba buobu họ. Omodawọ rai nọ a ro whowho emamọ usi na ababọ ẹbẹ nọ o bẹ rai o zọhọ fihọ ẹvi ologbo nọ ma be jọ ukoko na ruẹ nẹnẹ na. (Aiz. 60:22) Ma jọ Nigeria wo ekobaro obọdẹ nọ i bu te 750 yọ a gbe bi wo abọ ologbo evaọ ewhowho emamọ usi rọkẹ “enọ a ma kpobi evaọ akpọ na.”—Kọl. 1:23.
3 A Fo Aruorokele: Ekobaro obọdẹ jọ a ru iruo odibọgba oke-kpobi na te ikpe buobu no. Evaọ ikpe yena kpobi na, iyero sa-sa nọ a rẹriẹ ovao dhe no o bọ ẹrọwọ ezae gbe eyae omarokpotọ nana ga no. (1 Pita 1:6, 7) U no rai eva ze nọ a rọ kpairoro vrẹ ilale isiuru omobọ rai re a sai ruiruo usiuwoma ota evaọ eria nọ ẹgwọlọ ọ jẹ mae rro. Enẹna, ejọ e kpako no jẹ rẹriẹ ovao dhe ẹbẹbẹ ẹyao, hayo iyero ebẹbẹ efa. (2 Kọr. 4:16, 17) Ghele na, a ‘gbẹ rrọ gaga ghele evaọ oke owho.’ (Ol. 92:14) A fi eva rai kpobi họ Jihova, yọ Jihova ọ be ghale ai re.—Ol. 34:8; Itẹ 10:22.
4 U gine fo re ma jiri ekobaro obọdẹ na ziezi. Otẹrọnọ a vi ekobaro obọdẹ ziọ ukoko rai, rehọ uvẹ yena rọ raha oke kugbe ai re who wo erere no ikuigbe eware nọ a rehọ ẹro ruẹ no ze. Dhesẹ ovuhumuo kẹ iruo rai wọhọ ekobaro nọ i dikihẹ ga ziezi. Jọ edikihẹga rai ọ tuduhọ owhẹ awọ. Ahwo kpobi nọ a rehọ aro kele ẹrọwọ rai a te reawere eghale gbe aruoriwo Jihova keme “ahwo oruọzewọ a rẹ were iẹe.”—Itẹ 12:22.