Ẹjiroro Ikpegbivẹ nọ E be Lẹliẹ Omai Ta Usiuwoma

Eme họ oware nọ o be mae lẹliẹ omai ta usiuwoma je wuhrẹ ahwo? Kọ fikinọ ma gwọlọ fi obọ họ kẹ enọ e gwọlọ riẹ uzẹme na re a ziọ edhere uzuazọ? (Mat. 7:14) Oye họ ẹjiroro ọsosuọ nọ a jọ obotọ fodẹ, rekọ orọnikọ oware nọ o mae rrọ omai oja oye he. Evaọ usu ẹjiroro 12 nọ ma jọ obotọ fodẹ nọ e be lẹliẹ omai ta usiuwoma na, ovẹ who roro nọ o mai wuzou?

1. U re siwi uzuazọ ahwo—Jọn 17:3.

2. O rrọ unuovẹvẹ kẹ ahwo. —Izik. 3:18, 19.

3. Yọ edhere jọ nọ ma bi ro ru eruẹaruẹ Ebaibol na gba.—Mat. 24:14.

4. U bi dhesẹ ẹrẹreokie Ọghẹnẹ. Okenọ Ọghẹnẹ ọ te raha akpọ na, ohwo ọvo ọ sae fo ẹe he inọ ọ kẹ ahwo omuomu uvẹ nọ a re ro kurẹriẹ hẹ.—Iruẹru 17:30, 31; 1 Tim. 2:3, 4.

5. Ma be rọ ere hwa osa nọ ma re, koyehọ re ma rọ ẹme Ọghẹnẹ wuhrẹ ahwo nọ ọ rehọ azẹ Jesu dẹ.—Rom. 1:14, 15.

6. U bi si abe-ọriọ nọ omai uzou. —Iruẹru 20:26, 27.

7. Re ma sai wo esiwo. —Izik. 3:19; Rom. 10:9, 10.

8. Ma be rọ ere dhesẹ nọ ma you amọfa.—Mat. 22:39.

9. U dhesẹ nọ ma bi yoẹme kẹ Jihova gbe Ọmọ riẹ.—Mat. 28:19, 20.

10. Usiuwoma ota yọ abọjọ egagọ mai.—Hib. 13:15.

11. U dhesẹ nọ ma you Ọghẹnẹ. —1 Jọn 5:3.

12. Yọ oware jọ nọ u bi ru odẹ Jihova fo.—Aiz. 43:10-12; Mat. 6:9.

Orọnikọ enana ọvo họ ẹjiroro nọ ma be rọ ta usiuwoma na ha. Wọhọ oriruo, usiuwoma ota u re ru ẹrọwọ mai ga, jẹ whae ze nọ ma rẹ rọ jọ ibe-iruiruo Ọghẹnẹ. (1 Kọr. 3:9) Rekọ, ẹjiroro nọ o mae rro nọ o be lẹliẹ omai ta usiuwoma na họ orọ avọ 12 na. Te ahwo a gaviezọ hayo a gaviezọ họ, usiuwoma ota mai yọ oware jọ nọ u bi ru odẹ Ọghẹnẹ fo, jẹ whae ze nọ Jihova ọ rẹ rọ ruẹ ẹme kpahe kẹ ọnọ ọ be poviẹe na. (Itẹ 27:11) Ma gine wo uvi ẹjiroro sa-sa nọ ma rẹ rọ ta usiuwoma na ‘ababọ eriosehọ.’—Iruẹru 5:42.