Ono Onana O te Were?

1. Eme ma re roro kpahe nọ ma te bi se Uwou-Eroro gbe Awake! na, kọ fikieme?

¹ A kere emagazini Uwou-Eroro gbe Awake! na evaọ oghẹrẹ nọ e rẹ rọ were ahwo kpobi. Fikiere emagazini na e ta ẹme kpahe izoẹme sa-sa. Nọ ma te bi se emagazini na, ma re roro kpahe oghẹrẹ ahwo nọ izoẹme na e te were, kẹsena ma vẹ daoma rehọ iẹe kẹ ahwo otiọye na.

2. Izoẹme emagazini mai vẹ e rẹ were amọfa?

² Kọ Uwou-Eroro nọ u kpozi kẹle na u wo uzoẹme jọ nọ whẹ avọ ibe-oruiruo ra wha ta ẹme kpahe no vẹre? Kọ uzoẹme jọ o ta kpahe uzuazọ uviuwou nọ u ti fi obọ họ kẹ omoni ra jọ? Kọ ohwo jọ nọ whọ riẹ ọ gwọlọ kpohọ orẹwho jọ nọ a jọ Awake! mai ta ẹme kpahe no? Kọ emagazini na jọ o te were utu ekiọthuọ hayo utu ahwo egọmeti jọ evaọ ẹkwotọ ra? Wọhọ oriruo, emagazini nọ o ta kpahe ebẹbẹ nọ ahwo nọ a kpako no a wo o rẹ were ahwo nọ a kpako no gbe ahwo nọ a be rẹrote ai. Emagazini nọ o ta kpahe ugbarugba o te were utu iporisi gbe isoja.

3. Gbiku jọ nọ u dhesẹ epanọ u wuzou te re ma rehọ emagazini mai se ahwo nọ e te were.

³ Iyẹrẹ: Nọ ọzae-avọ-aye jọ nọ e rrọ Isẹri Jihova evaọ obọ South Africa a se Awake! ọ October 2011 nọ o ta kpahe epanọ a rẹ rọ yọrọ emọ, a te fonu isukulu 25 evaọ ẹkwotọ ukoko rai. Udhegbivẹ evaọ usu rai a tẹ kuyo nọ a gwọlọ emagazini na re a ghale kẹ emọ isukulu rai. Ọzae-avọ-aye ọfa jọ evaọ orẹwho na a ru epọvo na re, yọ a kẹ isukulu buobu emagazini na evaọ ẹkwotọ rai. Iwuhrẹ isukulu na jọ a jiroro nọ a rẹ rehọ emagazini mai wuhrẹ emọ isukulu rai koka koka, a te je fi ae họ usu ebe nọ emọ na a re se. Ọzae-avọ-aye na a gbiku na kẹ ọsẹro ọnyawariẹ jọ, kẹsena ọsẹro ọnyawariẹ na ọ tẹ tuduhọ ikoko nọ e rrọ okogho riẹ awọ re a hae kẹ isukulu nọ e rrọ ẹkwotọ rai emagazini. A kere se uwou ogha nọ o rrọ orẹwho yena inọ a gbẹ gwọlọ emagazini na, onana u ru nọ uwou ogha na o rọ wariẹ ru emagazini yena efa.

4. Fikieme ma rọ gwọlọ nọ emagazini mai i te ahwo buobu obọ?

⁴ Emagazini mai e ta kpahe oware nọ o be lẹliẹ eware jọ via evaọ akpọ na gbe oware nọ Ebaibol na o ta kpahe eware nana, e tẹ jẹ ta kpahe Uvie Ọghẹnẹ. Emagazini mai ọvo họ enọ e be “vuẹ ovuẹ usiwo” evaọ akpọ na soso. (Aiz. 52:7) Fikiere, ma gwọlọ nọ i te ahwo buobu obọ. Edhere jọ nọ ma sai ro ru ere họ, nọ ma tẹ be hai nọ omamai nọ, ono onana o te were?