Rọ Aro Kele Eruẹaro Na—Habakuk
1. Eme ọ be via nẹnẹ nọ o jẹ via evaọ oke Habakuk?
1 Nọ akpọ na o bi dhe eyeyoma na, eware e sae jọ omai oma wọhọ epanọ o jọ Habakuk oma, nọ ọ nọ Jihova nọ: “Fikieme who je bi ru omẹ ruẹ eware ethọthọ jẹ ruẹ ukpokpoma?” (Hab. 1:3; 2 Tim. 3:1, 13) Ma tẹ be hai roro didi kpahe eme nọ Habakuk o kere gbe oriruo ẹrọwọ riẹ, u re fiobọhọ kẹ omai thihakọ nọ ma be hẹrẹ ẹdẹ ẹdhoguo Jihova na.—2 Pita 3:7.
2. Ẹvẹ ma sai ro dhesẹ nọ ma wo ẹrọwọ nẹnẹ?
2 Wo Ẹrọwọ: Habakuk ọ kuvẹ hẹ re eware iyoma nọ e be via i fi ọkora họ iẹe oma, ukpoye ọ jaja aro vi je kruga ziezi evaọ egagọ Ọghẹnẹ. (Hab. 2:1) Jihova ọ kẹ ọruaro na imuẹro nọ Ẹme riẹ ọ te seba erugba ha evaọ ẹruoke, gbe nọ “enọ i kiẹrẹe e rẹ te zọ fiki orọwọ rai.” (Hab. 2:2-4) Eme mai Ileleikristi ma rẹ sai wuhrẹ no onana ze, nọ ma be rria edẹ urere nana nọ i te ekuhọ no na? Ukpenọ ma re rẹro okenọ urere na o te rọ ze ọvo, o mai woma re u mu omai ẹro inọ o te tha hrọ. Ẹrọwọ o re fiobọhọ kẹ omai jaja aro vi je se iruo usiuwoma ota na gboja.—Hib. 10:38, 39.
3. Fikieme o rọ gwọlọ nọ ma re gbe wo oghọghọ evaọ egagọ Jihova?
3 Wo Oghọghọ Evaọ Egagọ Jihova: Okenọ Gọg obọ Magọg ọ te wọ ẹmo bru idibo Jihova, eware nọ i ti nuhu ẹrọwọ mai e te via. (Izik. 38:2, 10-12) Ẹmuofio ọ rẹ wha ọbẹwẹ ze, makọ rọkẹ enọ e te kparobọ dede. Ẹsejọhọ emuore ọ te jariẹ tere he, ekwakwa e sae raha ku omai, yọ akpọ ọ sae jọ gaga. Otẹrọnọ oyena o via k’omai, eme ma re ru? Habakuk o rẹro nọ eware e te jọ gaga, fikiere ọ tẹ gbaemu nọ o re siobọno oghọghọ riẹ hẹ evaọ egagọ Jihova. (Hab. 3:16-19) Epọvo na re, “evawere ỌNOWO na” o ti fiobọhọ kẹ omai thihakọ ebẹbẹ nọ i ti te omai evaọ obaro.—Neh. 8:10; Hib. 12:2.
4. Didi oghọghọ ma sai wo enẹna gbe evaọ obaro?
4 Ahwo nọ Jihova o ti siwi evaọ ẹdẹ ẹdhoguo riẹ na a ti gbe wuhrẹ kpahe iẹe. (Hab. 2:14) Enọ a te kpare no uwhu ze a ti wuhrẹ kpahe Jihova re. Makọ obọnana nọ urere na o re ze he na, joma rọ uvẹ kpobi ta kẹ amọfa kpahe Jihova gbe iruo igbunu riẹ!—Ol. 34:1; 71:17.