Epanọ Ma Sai ro Wo Onaa Ziezi Evaọ Usi Uwoma Ota​—Nwene Lele Uyero Ohwo Na

OWARE NỌ U RO WUZOU: Enọ a rọ ẹzi wholo gbe igodẹ efa na a bi zizie oghẹrẹ ahwo kpobi re a “da ame uzuazọ ọvọvẹ.” (Ev 22:17) Ame uzuazọ nana o dikihẹ kẹ ọruẹrẹfihotọ Jihova nọ o bi ro siwi ahwo-akpọ nọ a bi yoẹme no igbo uzioraha gbe uwhu. Re ma sai fiobọhọ kẹ ahwo erẹwho gbe egagọ sa-sa, o gwọlọ nọ ma rẹ ta “usi uwoma ebẹdẹ bẹdẹ” na evaọ oghẹrẹ nọ u re ro si ahwo urru.​—Ev 14:6.

EPANỌ A RE RO RU EI:

• Salọ uzoẹme gbe oria ikere nọ u re duobọte ahwo nọ a rrọ ẹkwotọ ra udu. Whọ sae salọ oriruo usi uwoma ota jọ hayo oware ofa nọ whọ rọ ta usi uwoma ziezi no. Izoẹme gbe eria ikere vẹ ahwo a rẹ mae gaviezọ kẹ? Kọ usi jọ u bi do nọ ahwo buobu a be ta kpahe evaọ ẹkwotọ ra? Uzoẹme vẹ o te mae were ọzae hayo aye evaọ ẹkwotọ ra?

• Rehọ oghẹrẹ nọ u fo nọ a re ro yere ahwo evaọ okegbe ra ro yere ahwo nọ whọ be ta usi uwoma kẹ.​—2Kọ 6:3, 4

• Riẹ oghẹrẹ ebe gbe ividio sa-sa nọ e rrọ Ẹkpẹti Ekwakwa Ewuhrẹ mai na re whọ riẹ onọ whọ sae rọ kẹ ohwo nọ o wo isiuru

• Danlodu ebe gbe ividio evaọ ẹvẹrẹ ahwo nọ whọ sae nyaku evaọ ẹkwotọ ra

• Nwene uzoẹme ra re u kiehọ uyero ohwo nọ whọ be ta usi uwoma kẹ na. (1Kọ 9:19-23) Wọhọ oriruo, eme whọ rẹ sae ta nọ whọ tẹ ruẹ nọ ohwo jọ o whu ku ohwo nọ whọ be ta usi uwoma kẹ na?

WHA RRI IVIDIO NA, KẸSENA WHA VẸ KIYO ENỌ NANA:

• Uzoẹme vẹ owhowho-uvie na o ro mu ẹme họ kugbe ohwo na?

• Eme ọ jẹ via kẹ ohwo nọ a be ta usi uwoma kẹ na?

• Oria Ebaibol jọ vẹ o mai woma nọ a re se evaọ oke utionana, kọ fikieme?

• Ẹvẹ whọ sai ro nwene uzoẹme usi uwoma ota ra re u si ahwo nọ a rrọ ẹkwotọ ra urru?