Usi-Uwhowho Obọdẹ nọ Ma ti ro Whowho Uvie Ọghẹnẹ Evaọ Akpegbọvo

Jesu o whowho “usi uwoma Uvie Ọghẹnẹ.” (Luk 4:43) O te je wuhrẹ ahwo re a lẹ nọ Uvie yena o ze. (Mt 6:9, 10) Evaọ amara Akpegbọvo, ma ti wobọ evaọ usi-uwhowho obọdẹ jọ, onọ ma ti ro whowho Uvie Ọghẹnẹ. (Mt 24:14) Fikiere, jọ oke nana ruẹrẹ oma kpahe re whọ sai wobọ vọvọ evaọ usi-uwhowho nana. Ahwo kpobi nọ a ti ru ọkobaro obufihọ evaọ amara Akpegbọvo na, a sae salọ nọ a re ru euwa ọgba hayo euwa udhuvẹ-gbikpe.

Oghẹrẹ vẹ ma ti ro ru ei? Daoma re who se oria Ebaibol jọ nọ o ta kpahe Uvie Ọghẹnẹ kẹ ohwo kpobi nọ whọ nya ku evaọ ẹkwotọ ra. Nọ whọ te salọ oria Ebaibol nọ who ti se kẹ ohwo na, roro kpahe egagọ nọ ohwo na ọ rrọ. Otẹrọnọ ohwo jọ o dhesẹ isiuru evaọ ẹdẹ ọsosuọ nọ whọ rọ ta usi uwoma kẹe, rehọ Uwou-Eroro uvitha ẹgbede Ọrọ avọ 2 2020 na kẹe. Kẹsena who ve zihe bru ohwo nọ o dhesẹ isiuru na ababọ oke oraha, jẹ daoma rehọ obe jọ evaọ Ẹkpẹti Ekwakwa Ewuhrẹ mai na mu obe-uwuhrẹ Ebaibol họ kugbe ohwo na. Oke nọ u kiọkọ nọ Uvie Ọghẹnẹ o te rọ raha egọmeti ahwo-akpọ kpobi no u gbe tulo ho. (Da 2:44; 1Kọ 15:24, 25) Fikiere, jọ omai kpobi ma rehọ uvẹ usi-uwhowho obọdẹ nana nọ u rovie fihọ na ro dhesẹ nọ abọ Jihova gbe Uvie riẹ ma rrọ.