Whowho Emamọ Usi na Inọ Akpọ Ọkpokpọ Ọ Kẹle No!

Evaọ amara Akpegbọvo, ma ti wobọ evaọ usi-uwhowho obọdẹ nọ ma ti ro whowho nọ akpọ ọkpokpọ ọ kẹle no. (Ol 37:10, 11; Ev 21:3-5) Fikiere, jọ oke nana ruẹrẹ oma kpahe re whọ sai wobọ vọvọ evaọ usi-uwhowho nana. Ahwo kpobi nọ a ti ru ọkobaro obufihọ evaọ amara na, a sae salọ nọ a re ru euwa ọgba hayo euwa udhuvẹ-gbikpe.

Oghẹrẹ vẹ ma ti ro ru ei? Daoma re who se oria Ebaibol jọ nọ o ta kpahe akpọ ọkpokpọ na kẹ ohwo kpobi nọ whọ nya ku. Nọ whọ tẹ be salọ oria Ebaibol nọ who ti se kẹ ohwo na, roro kpahe oware nọ o rẹ sai si ahwo ẹkwotọ ra urru. Otẹrọnọ ohwo jọ o dhesẹ isiuru evaọ ẹdẹ ọsosuọ nọ whọ rọ ta usi uwoma kẹe, rehọ Uwou-Eroro uvitha ẹgbede Ọrọ avọ 2 2021 na kẹe. Kẹsena who ve zihe bru ohwo na ababọ oke oraha, jẹ rehọ ibroshọ Reawere Uzuazọ Bẹdẹ Bẹdẹ! na mu obe-uwuhrẹ Ebaibol họ kugbei. A rẹ ruẹ obọ oghọghọ nọ ma ti wo ho, keme ma ti whowho “usi uwoma oware nọ o mai woma”!​—Aiz 52:7.

WHA KPORO IVIDIO OLE NA AKPỌ ỌKPOKPỌ NA, KẸSENA WHA VẸ KIYO ENỌ NANA:

• Emamọ ẹruore vẹ ọmọtẹ ọsese na o bi roro kpahe?

• Eware jọ vẹ who bi rẹro rai evaọ akpọ ọkpokpọ na?

• Ẹvẹ eware nọ who bi rẹro rai evaọ akpọ ọkpokpọ na nọ who re roro didi kpahe e sai ro fiobọhọ kẹ owhẹ wobọ ziezi evaọ usi-uwhowho nọ ma ti ru evaọ Akpegbọvo na?​—Luk 6:45