Wuhrẹ Emọ-Uwuhrẹ Ebaibol Ra re A Hae rọ Ẹme Ọghẹnẹ Kuọ Omarai

Re ma sai fiobọhọ kẹ emọ-uwuhrẹ Ebaibol mai riẹ Jihova je kru ga ziezi evaọ ukoko na, orọnikọ eware nọ ma bi wuhrẹ ai na ọvo u fo nọ a rẹ riẹ hẹ. (Mt 5:3; Hib 5:12–6:2) O gwọlọ nọ a rẹ riẹ epanọ a rẹ rọ rehọ Ẹme Ọghẹnẹ kuọ omarai.

Wha tẹ nwani mu obe-uwuhrẹ Ebaibol na họ no, dhesẹ kẹ emọ-uwuhrẹ Ebaibol ra oghẹrẹ nọ a sae rọ ruẹrẹ oma kpahe kẹ uwuhrẹ na jẹ tuduhọ ae awọ re a hai ru ere. (mwb18.03 6) Tuduhọ ae awọ re a hae lẹ taure a te ti mu uwuhrẹ omobọ rai họ. Fiobọhọ kẹ ae re a riẹ epanọ a sae rọ jọ ifonu hayo ekọmputa danlodu ebe gbe ividio nọ a re ro ru uwuhrẹ. Dhesẹ epanọ a sae rọ ruẹ eware ekpokpọ nọ a fihọ jw.org gbe JW Broadcasting^® kẹ ae. Rọ ẹmẹrera wuhrẹ ai re a hai se Ebaibol na kẹdẹ kẹdẹ, ruẹrẹ oma kpahe kẹ iwuhrẹ ukoko, je ru ekiakiẹ nọ a te wo enọ jọ. Fiobọhọ kẹ ae re a hai roro didi kpahe eware nọ a bi wuhrẹ.

WHA RRI IVIDIO ODHESẸVIA NA FIOBỌHỌ KẸ EMỌ-UWUHRẸ EBAIBOL RA RE A HAE RỌ ẸME ỌGHẸNẸ KUỌ OMARAI, KẸSENA WHA VẸ KIYO ENỌ NANA:

• 

  Oghẹrẹ vẹ Neeta o ro fiobọhọ kẹ Jade ruẹ nọ, nọ ọ tẹ be ruẹrẹ oma kpahe kẹ uwuhrẹ orọnikọ iyo enọ na ọvo u fo nọ ọ rẹ riẹ hẹ?

• 

  Eme o fiobọhọ kẹ Jade vuhumu nọ uzi nọ Jihova o fihọ kpahe ọfariẹ-ogbe na o kiehọ?

• 

  Oghẹrẹ vẹ Jade o wo otoriẹ eroro-didi uwhremu na?