Usi-Uwhowho Obọdẹ nọ Ma ti ro Mu Uwuhrẹ Ebaibol Họ Kugbe Ahwo Evaọ Azie

Evaọ amara Azie, ma te daoma re ma rehọ ibroshọ Reawere Uzuazọ Bẹdẹ Bẹdẹ! na mu uwuhrẹ Ebaibol họ kugbe ahwo kpobi. Owhowho-uvie kpobi nọ ọ gwọlọ ru ọkobaro obufihọ evaọ amara na, ọ sae salọ nọ o re ru euwa ọgba. Kọ oghẹrẹ vẹ ma ti ro ru usi-uwhowho obọdẹ nana?

• Ẹdẹ Ọsosuọ: Rọ eme nọ a kere fihọ uke ibroshọ na ta ẹme ruọ ahwo oma, re whọ jẹ daoma mu uwuhrẹ Ebaibol họ. Ma rẹ jẹ daoma mu uwuhrẹ Ebaibol họ kugbe ahwo nọ ma ta usi uwoma kẹ evaọ oke nọ u kpemu nọ a gaviezọ gbe izihebro mai. O tẹ make rọnọ a rọwo nọ a re wuhrẹ Ebaibol na evaọ oke nọ u kpemu hu, ẹsejọhọ ibroshọ ọkpokpọ mai na gbe oghẹrẹ nọ ma bi ro ru uwuhrẹ Ebaibol enẹna o te were ae. Ma rẹ nyasiọ ibroshọ na ba kẹ ahwo nọ ma dihọ uwou hu hu, yọ ma re fi ei họ ileta vi se ahwo nọ ma riẹ sọ a te gaviezọ kẹ omai hi hi. Evaọ amara nana, Ogbẹgwae Iruo Ukoko na o sai fi oke ofa họ kugbe onọ a be hai ro kpohọ usi uwoma.

• Idhere Efa nọ A Sai ro Ru Usi-Uwhowho Na: Otẹrọnọ ukoko ra o rẹ rehọ oware nọ a re fi ebe họ ghelie rọ ta usi uwoma, wha fi ibroshọ Reawere Uzuazọ Bẹdẹ Bẹdẹ! na họ iẹe. Nọ ohwo jọ ọ tẹ ta nọ ọ gwọlọ ibroshọ na, vuẹe kpahe uwuhrẹ Ebaibol nọ ma rẹ rọ ibroshọ na ru. Jọ etetẹe na rọ omoke jọ dhesẹ oghẹrẹ nọ ma re ru uwuhrẹ na kẹe, hayo ru ọruẹrẹfihotọ nọ whọ sai ro ru ei oke ọfa. Ọsẹro usi uwoma ota na ọ sae salọ inievo nọ i wo onaa ziezi re a kpohọ ekwotọ nọ ahwo a be jọ thueki, re a jọ etẹe mu uwuhrẹ Ebaibol họ kugbe ahwo. Whọ sae jẹ vuẹ ahwo nọ wha gbe bi ru iruo hayo ahwo nọ whọ ta usi uwoma kẹ evaọ oke gheghe kpahe uwuhrẹ Ebaibol na.

Jesu o jie uzi kẹ omai nọ ma “ru ahwo zihe ruọ ilele,” je “wuhrẹ ae.” (Mt 28:19, 20) Ajọ usi-uwhowho obọdẹ nana u fiobọhọ kẹ omai rehọ ibroshọ Reawere Uzuazọ Bẹdẹ Bẹdẹ! na ru iruo nọ Jesu ọ kẹ omai na.