EPANỌ MA SAE RỌ WHAHA OMUKPAHỌ

2 | Whaha Orukele

Ebaibol na Ọ Ta Nọ:

“Wha rọ eyoma hwosa eyoma kẹ ohwo ọvo ho. . . . O tẹ lọhọ, nọ orọnọ obọ rai o rrọ na, wha lele ahwo kpobi rria dhedhẹ. Iyoyou, wha kioja kẹ omobọ rai hi, . . . keme a kere nọ: ‘“Orukele ọmẹ; mẹ te hwa zihe,” ere Jihova ọ ta.’”—AHWO ROM 12:17-19.

Oware nọ Onana U Dhesẹ:

Dede nọ eva e rẹ sae dha omai nọ a te ru omai thọ, Ọghẹnẹ ọ gwọlọ nọ ma re ru orukele he. Ukpoye, ọ gwọlọ nọ ma hẹrẹ bọo oke nọ ọye ọvo ọ te kpọ eware vi.—Olezi 37:7, 10.

Oware nọ Whọ rẹ Sai Ru:

Fikinọ mai ahwo-akpọ ma gba ha, nọ ma te ru orukele, o rẹ whae ze nọ omukpahọ o gbe ro kuhọ họ. Fikiere nọ ohwo jọ o te ru owhẹ thọ, who du ru ei kele he. Daoma kpọ ofu ra re who je ru udhedhẹ. Evaọ ẹsejọ, o rẹ mai woma re ma kpairoro vrẹ oware nọ a ru omai thọ na. (Itẹ 19:11) Rekọ evaọ eware jọ, o sae gwọlọ nọ ma re ru oware jọ kpahe oware nọ a ru omai na. Wọhọ oriruo, otẹrọnọ a ru owhẹ oware jọ nọ o wọso uzi, whọ sae vuẹ iporisi hayo ta kẹ enọ i wuzou evaọ ẹwho nọ whọ rrọ.

Ma te ru orukele, yọ omobọ mai ma bi ru na

Kọ otẹrọnọ edhere ọvo ọ riẹ nọ whọ sai ro ku ẹme na họ dhedhẹ hẹ? Hayo otẹrọnọ who ru oware kpobi nọ whọ rẹ sai ru no re whọ sai ku ẹme na họ dhedhẹ, rekọ o bi ro kuhọ họ? Who du ru orukele he. Orukele o rẹ lẹliẹ eware yoma ga. Ukpoye, ru oware nọ o rẹ whaha orukele avọ omukpahọ. Daoma fievahọ Ọghẹnẹ inọ o ti ku ẹbẹbẹ na họ evaọ edhere nọ o mai woma. “Rẹroso ẹe, o ti fiobọhọ kẹ owhẹ.”—Olezi 37:3-5.

Iku Uzuazọ—ADRIÁN

Ọ Sae Whaha Orukele

Adrián o je ru ozighi gaga nọ ọ gbẹ jọ uzoge. Ọ jẹ hae họre ahwo je ru orukele fiki omukpahọ nọ o jọ udu riẹ. Ọ ta nọ: “Ẹsibuobu mẹ rẹ rọ igbeke họre, yọ a rẹ sa omẹ fihọ otọ evaọ edhere avọ azẹ nọ o bi whẹ no omẹ oma ze, a vẹ nyasiọ omẹ ba bi roro nọ me whu no.”

Adrián o te mu Ebaibol na họ ewuhrẹ nọ ọ jọ ikpe 16. Ọ ta nọ: “Nọ me bi wuhrẹ Ebaibol na, mẹ tẹ ruẹ nọ u fo nọ me re nwene uruemu mẹ.” O gwọlọ nọ o re si omukpahọ no udu riẹ jẹ siọ ozighi ba. Ẹme nọ ọ rrọ obe Ahwo Rom 12:17-19 nọ o ta nọ ma siọ orukele ba kẹ Jihova na, o fiobọhọ kẹe gaga. Ọ ta nọ: “Mẹ tẹ te ruẹ nọ Jihova o ti si okienyẹ kpobi notọ evaọ oke nọ o fihọ. Ẹmẹrera na, mẹ tẹ te siọ uzuazọ ozighi ba.”

Evaọ owọwọ ẹdẹ jọ, ahwo utu ugbarugba jọ nọ Adrián ọ jẹ hai lele họre vẹre a tẹ be họre iẹe. Ọnọ o wuzou rai ọ tẹ ta nọ: “Kọ whọ gbẹ kpobọ?” Adrián ọ ta nọ: “Mẹ jẹ gwọlọ nọ me re ru ae kele.” Rekọ ukpenọ o re ru ae kele, ọ tẹ jọ udu riẹ lẹ se Jihova, kẹsena ọ tẹ nyase ae ba.

Adrián ọ ta nọ: “Evaọ okiokiọ riẹ, mẹ tẹ ruẹ ọnọ o wuzou utu ugbarugba na nọ ọye ọvo ọ jọ usu. Mẹ tẹ gwọlọ nọ me re ru ei kele fiki ofu nọ o jọ udu mẹ, rekọ mẹ tẹ wariẹ lẹ se Jihova re o fiobọhọ kẹ omẹ kpọ ofu mẹ. Akpọ o gbe omẹ unu gaga inọ ọ nyabru omẹ ze, ọ tẹ ta kẹ omẹ nọ: ‘Rọvrẹ omẹ rọkẹ oware nọ ma ru evaọ owọwọ odẹnukpo na. Uzẹme riẹ họ, mẹ gwọlọ jọ wọhọ owhẹ. Mẹ gwọlọ wuhrẹ Ebaibol na.’ Eva e were omẹ gaga inọ mẹ sai kpọ ofu mẹ! Fiki oware nana nọ o via na, me te mu ei Ebaibol na họ ewuhrẹ.”