“U Kri No nọ Me bi ro Rẹro nọ Wha ti Se Omẹ”

Ukpe 2010 họ oke ọsosuọ nọ ọzae jọ nọ a re se Ed avọ aye riẹ Jennie a rọ rehọ ifonu ta usi uwoma.a Jennie ọ ta nọ: “Ifonu nọ a rẹ jọ ta usi uwoma o were omẹ vievie he, mẹ vuẹ ọzae mẹ nọ mẹ gbẹ te rọ ifonu ta usi uwoma ofa ha!” Yọ ere o jọ ọzae riẹ oma re. Ọzae na ọ ta nọ: “Nọ ahwo nọ a gwọlọ zẹ eki rai a te se omẹ evaọ ifonu, o rẹ were omẹ hẹ. Fikiere me rri rie nọ ẹvẹ mẹ omamẹ mẹ rẹ rehọ ifonu se ahwo be ta usi uwoma kẹ ae?”

Rekọ ẹyao COVID-19 o te du lahwe. Oke yena mai Isẹri Jihova ma gbẹ jẹ ta usi uwoma no uwou ruọ uwou hu. Rekọ o gwọlọ nọ ma rẹ nya uwou nọ Jesu o vi omai inọ ma nyae ta usi uwoma kẹ ahwo, fikiere ifonu gbe ileta Isẹri Jihova a jẹ mae rọ ta usi uwoma oke yena. (Matiu 24:14; 28:19, 20) U te no ere no, Isẹri Jihova a tẹ gwọlọ ru ewuhrẹ, a rẹ rọ ifonu thuru kugbe ohwohwo, makọ ewuhrẹ nọ a re ru taure a te ti kpohọ usi uwoma. Fikiere evaọ ẹdẹ jọ, Ed ọ tẹ gbaudu ta nọ ọ rẹ rọ ifonu ta usi uwoma. Kọ ẹvẹ o jọ kẹe evaọ ẹdẹ ọsosuọ? O lọhọ kẹe he, ọ ta nọ: “Udu u je bru omẹ ọvo, fikiere mẹ tẹ lẹ se Jihova. Ere me ro se ọzae jọ nọ a re se Tyrone.”b

Tyrone avọ aye riẹ nọ a re se Edith a be rria ẹwho jọ nọ a re se Kentucky evaọ obọ America. Ikpe udhone gbe esa Tyrone ọ jọ, yọ ọ gbẹ jẹ ruẹ ude tere he. Ghele na, ọ rọwo nọ Brọda Ed o wuhrẹ Ebaibol kugbei. Ẹno nọ a re kru họ obọ ọ jẹ hae ro se obe, yọ oniọvo na ọ jẹ hae wuhrẹ Ebaibol kugbei ẹsikpobi evaọ ifonu.

Nọ oware wọhọ amara ọvo o vrẹ no, Tyrone avọ aye riẹ Edith a te mu ewuhrẹ họ, yọ ukoko jọ nọ o jọ ẹwho rai a je kuomagbe. Rekọ fikinọ a wo itanẹte he, kọ ifonu a jẹ hae tubẹ rọ gaviezọ kẹ iwuhrẹ na. Kọ eme o jẹ lẹliẹ Edith kuomagbe ewuhrẹ na dede?

Nọ Ed avọ Jennie aye riẹ a je wuhrẹ Tyrone obe ẹdẹ jọ, a te je yo uvou aye Tyrone nọ o bi fiobọhọ kẹ ọzae riẹ nọ ọ tẹ gwọlọ kẹ uyo gbe okenọ ọ tẹ gwọlọ rovie Ebaibol. Rekọ ọ jẹ kpahe fihọ ewuhrẹ na ha. Sista Jennie ọ ta nọ: “Oghẹrẹ nọ Edith ọ jẹ rọ ta ẹme, whọ rẹ nwane riẹ nọ eva e be were iẹe he. Rekọ mẹ avọ ọzae mẹ ma riẹ oware nọ o soriẹ ze he.”

Fikiere, ẹdẹ jọ nọ a je wuhrẹ Tyrone obe, Sista Jennie ọ tẹ gwọlọ nọ o re lele aye Tyrone ta ẹme. Nọ uvẹ nọ o nwani rovie, o te mi ọzae riẹ ifonu jẹ nọ Tyrone nọ: “Tyrone, o wọhọ nọ aye ra ọ rrọ etẹe kugbe owhẹ. Kọ o sae lọhọ re o lele omai se oria Ebaibol jọ hayo kẹ umuyo jọ?”

Aimava a tẹ kaki dhizu tao. Ukuhọ riẹ, Edith ọ tẹ kpọ unu inọ: “Mẹ omamẹ mẹ gwọlọ lele owhẹ ta ẹme dede. Mẹ yọ Osẹri Jihova, rekọ u te ikpe udhuvẹ no nọ me ri ro kpohọ ewuhrẹ gbe usi uwoma ha.”

Sista Jennie o te bo, ọ tẹ ta nọ: “Kiyọ whẹ yọ oniọvo mẹ!” Aimava a tẹ kpare oviẹ evaọ ifonu.

Nọ oke jọ o vrẹ no, Brọda Ed ọ tẹ kẹ Edith ibroshọ Zihe Bru Jihova Ze. Nọ eka jọ e jẹ vrẹ no, Brọda Ed avọ aye riẹ a te muẹrohọ nọ Edith o nwene gaga no. Ed ọ ta nọ: “Oke ọsosuọ, eva e jẹ were Edith tere he nọ ma je lele iei ta ẹme. Rekọ enẹna ọ be ta ẹme sasasa.” Edith ọ daoma nwene. Emẹrera na, ọ tẹ te wariẹ kruga ziezi evaọ ukoko na. Evaọ Ahrẹ, 2022, ọzae riẹ ọ tẹ họ-ame.

Nọ Brọda Ed ọ tẹ kareghẹhọ oghẹrẹ ubiẹro nọ ọ jẹ hai ro rri usi uwoma nọ a rẹ rọ ifonu ta, iroro riẹ i re kpohọ ẹdẹ nọ o ro se Tyrone evaọ ifonu. O se obe Jọn 6:44 kẹ Tyrone je ru ei vẹ kẹe inọ Jihova o bi si ahwo nọ a you rie gboma re a sae riẹ uzẹme na. Ẹme na ọ were Tyrone, ọ tẹ ta nọ: “U kri no nọ me bi ro rẹro nọ wha ti se omẹ.” Eva e be were Sista Jennie re inọ avọ ọzae riẹ a rolobọ họ. Dede nọ ozọ o jẹ dina mu ai, a gbaudu rehọ ifonu ta usi uwoma. Sista Jennie ọ ta nọ: “Nọ ohwo ọ tẹ gwọlọ ru oware jọ kẹ Jihova, oware na o tẹ make bẹ, ọ tẹ daoma ru ei, Jihova ọ rẹ ghale iẹe.”