Kọ Akpọ na O Muhọ Ekuhọ No? Eme Họ Apocalypse?
Kọ who roro nọ a te raha akpọ na no? O sae jọnọ who bi roro nọ a te raha oware kpobi nọ o rrọ uzuazọ evaọ otọakpọ na muotọ. Ere ahwo jọ a rọwo nọ o te via, maero nọ a te se iyẹrẹ nọ a nẹ evaọ ebe awhusi wọhọ itienana:
“Ẹmo nọ a te jọ raha oware kpobi muotọ o sae via lọlọhọ. Ahwo a sai kekaro fihọ mu ei họ, o sai kieze kpregede, hayo fiki orithọ.”—Bulletin of the Atomic Scientists.
“Evaọ oware ikpe ikpe nọ e vrẹ na, ikpiso, ewhawho nọ e be to, iso nọ e be rrọ họ, ẹrrorro ọgaga, gbe iwhe ilogbo e be raha ọraha evaọ akpọ na soso.”—National Geographic.
“Anwọ ikpe jọ ze na, ebaka-ẹkpẹ nọ i re su gbidi gbidi e be raha ọraha gaga evaọ Africa vi epanọ o jọ vẹre.”—The Associated Press.
Kọ oware okpẹtu jọ o te via nọ o te raha akpọ na soso muotọ? Eme Ebaibol na ọ ta?
Kọ a te raha otọakpọ na no?
Ijo. Ẹme Ọghẹnẹ Ebaibol na, ọ vuẹ omai vevẹ nọ otọakpọ na ọ te jariẹ bẹdẹ bẹdẹ. (Ọtausiuwoma Na 1:4) Ahwo nọ “e be raha otọakpọ na” eye Ọghẹnẹ ọ te raha, orọnikọ otọakpọ nọ ọ ma na ha.—Eviavia 11:18.
Kọ akpọ na o muhọ ekuhọ no?
“Akpọ” nọ a jọ Ebaibol ta nọ o ti kuhọ na họ ahwo-akpọ nọ a be daezọ Ọghẹnẹ hẹ, nọ a bi yeri uzuazọ oriobọ. Ọghẹnẹ ọ te raha “akpọ ahwo nọ a riẹ Ọghẹnẹ hẹ” no, nwane wọhọ epanọ o ru evaọ oke Noa na.—2 Pita 2:5; 3:7.
Obe 1 Jọn 2:17 o ta nọ, “akpọ na ọ be vrẹ yọ ere isiuru riẹ re.” Oria Ebaibol nana o dhesẹ nọ orọnikọ otọakpọ nana Ọghẹnẹ ọ te raha ha, rekọ ahwo nọ a be rọwo siobọno ikpehre isiuru rai hi.
Oke vẹ urere na u ti ro te?
Ebaibol na ọ vuẹ omai ugogo oke nọ urere na o te rọ ze he. (Matiu 24:36) Rekọ o ta eware nọ i dhesẹ nọ urere na o te ze kẹle na. Ebaibol ọ ruẹaro nọ eware nana e te via:
Ẹmo, ohọo nọ u ti mu, ikpeyao, gbe etọ nọ i ti nuhu gaga e te jọ “no oria ruọ oria.”—Matiu 24:3, 7, 14; Luk 21:10, 11; Eviavia 6:1-8.
Ahwo a ti wo oriobọ gaga evaọ oria kpobi. Wọhọ oriruo, a ti “you ugho,” “kare uyere-ọghọ,” yọ “a ti wo oma-onyẹ hẹ.”—2 Timoti 3:1-5.
Ahwo buobu a rọwo nọ akpọ na o nwene no anwọ ukpe 1914, yọ eware nọ e be via evaọ akpọ na e rọwokugbe enọ Ebaibol ọ ta gbe nọ urere na o kẹle no. Re who gbe se kpahe ẹme na, rri izoẹme nana “Eme Ikelakele Ebaibol I Dhesẹ Kpahe Ukpe 1914?” gbe “Eme Họ Oka ‘Edẹ Urere’ Hayo ‘Oke Urere’ Na?”
Eme họ otofa “apocalypse” evaọ Ebaibol na?
Ẹme ẹvẹrẹ Griki nọ a re se a·po·kaʹly·psis nọ a fa “apocalypse” evaọ Ebaibol Oyibo jọ na u wo otofa “rovie” hayo “edhesẹvia.” Dede nọ ahwo buobu a rẹ rehọ “apocalypse” fihọ ọraha ologbo jọ nọ ọ te via, a rẹ mae rehọ ẹme na dhesẹ epanọ a rẹ fere evuẹ nọ i dhere via. Ebaibol na ọ tẹ jẹ ta kpahe “okenọ Olori na Jesu ọ te romavia” hayo “edhesẹvia” [apocalypse] riẹ, onọ o te via evaọ okenọ ọ te nyaze re ọ rehọ ogaga nọ o wo si emuemu kpobi no otọakpọ na no jẹ hwosa kẹ ahwo nọ a be gọ Ọghẹnẹ.—2 Ahwo Tẹsalonika 1:6, 7; 1 Pita 1:7, 13.
A se obe urere Ebaibol na A·po·kaʹly·psis, hayo Eviavia, keme u dhesẹ eware nọ e te via evaọ obaro. (Eviavia 1:1) Obe na o ta kpahe emamọ usi gbe ovuẹ nọ u re ru ohwo wo ẹruore. (Eviavia 1:3) U dhesẹ nọ Ọghẹnẹ o ti si okienyẹ kpobi no je zihe otọakpọ na ruọ aparadase. Evaọ oke yena, ohwo ọvo o gbe ti wo edada ha, ruẹ uye he, hayo whu dede he.—Eviavia 21:3, 4.
Kọ whọ gwọlọ gbe wuhrẹ kpahe emamọ eyaa nana nọ e rrọ Ebaibol na? Isẹri Jihova a re wuhrẹ Ebaibol na kugbe ahwo ọvọvẹ, yọ who ti wuhrẹ eware buobu. Ivie ta kẹ Osẹri Jihova jọ nẹnẹ na hayo jọ oria itanẹte mai yare nọ a nyabru owhẹ ze.