Kọ Wha Rọwo Jesu?

Ee. Ma rọwo Jesu, ọnọ ọ ta nọ: “Mẹ họ edhere na, gbe uzẹme, gbe uzuazọ; ohwo ọvo o bru Ọsẹ na ze he, rekọ fiki mẹ.” (Jọn 14:6) Ma rọwo inọ Jesu o no obọ odhiwu ziọ otọakpọ, jẹ rehọ uzuazọ ogbagba riẹ dheidhe rọ ta ahwo-akpọ no igbo. (Matiu 20:28) Uwhu gbe ekparomatha riẹ u ru nọ ahwo nọ a fi ẹrọwọ họ iẹe a ti ro wo uzuazọ ebẹdẹ bẹdẹ. (Jọn 3:16) Ma rọwo re inọ Jesu Kristi o muhọ esuo no enẹna, ọye họ Ovie ọrọ Uvie Ọghẹnẹ nọ o rrọ obọ odhiwu, onọ o te wha udhedhẹ ziọ otọakpọ na soso kẹle na. (Eviavia 11:15) Rekọ ma rọwo ẹme Jesu nọ ọ ta nọ: ‘Ọsẹ na ọ rro vi omẹ.’ (Jọn 14:28) Fikiere, ma rẹ gọ Jesu hu, keme ma rọwo nọ ọye họ Ọghẹnẹ Erumeru hu.