Fikieme Ma rẹ rọ Whaha Oware Kpobi nọ U Wobọ Kugbe Idhivẹri?

Ẹvẹ who roro?

• Kọ enwoma jọ e riẹ nọ ohwo o te bi rri isi gbe eware efa rọ daoma riẹ epanọ obaro ọ te jọ, hayo daoma lele ahwo nọ a whu no ta ẹme?

• Kọ iku kpahe idhivẹri hayo ẹgba ebi yọ iku esia gheghe manikọ oware uyoma nọ o rẹ sae wha ẹbẹbẹ ze?

Ma te jọ uzoẹme nana ta kpahe oware nọ iruẹru imizi o be rọ were ahwo gaga, gbe oware nọ o rọ gwọlọ nọ whọ rẹ kẹnoma kẹ eware itieye na.

• Fikieme o be rọ were ahwo?

• Fikieme ma rẹ rọ yọroma?

• Oware nọ whọ rẹ sai ru

• Ẹme nọ ehwa ra a ta

Fikieme o be rọ were ahwo?

Ahwo nọ a re ru ifimu je kere ebe a be hai fi eware nọ i kiekpahe idhivẹri họ ividio, ighe etẹlẹvisiọno, igemu ekọmputa, gbe ebe fikinọ ighe itienana e be wha erere se ai gaga. Fiki onana, eware nọ i wobọ kugbe isi nọ a rẹ rọ gbẹva, idhivẹri, ogaga ebi, eda, enọ i re se azẹ ahwo da, gbe eware itieye na e be were izoge buobu. Ẹjiroro vẹ a be rọ gwọlọ riẹ kpahe eware nana? Joma ta kpahe ejọ:

• A gwọlọ kiẹ oware kpobi: A rẹ gwọlọ riẹ sọ idhivẹri e ginẹ rrọ

• A gwọlọ riẹ kpahe obaro: A rẹ gwọlọ riẹ kpahe oghẹrẹ nọ odẹnotha ọ te jọ

• Ẹmeọta kugbe ahwo rai nọ a whu no: A gwọlọ edhere nọ a rẹ rọ ta ẹme kugbe ahwo rai nọ a whu no

Ẹjiroro esa nana e nwane thọ họ. Wọhọ oriruo, ohwo kpobi ọ rẹ gwọlọ riẹ epanọ odẹ ọ te jọ, yọ ohwo nọ ma you o te whu, o rẹ jọ omai oma inọ dodokọ ma rẹ wariẹ ruẹ e riẹ. Rekọ u wo eware jọ nọ whọ rẹ yọroma kpahe.

Fikieme ma rẹ rọ yọroma?

Ọghẹnẹ ọ jọ Ebaibol na vẹvẹ omai unu gaga kpahe oware kpobi nọ u wobọ kugbe idhivẹri. Wọhọ oriruo, Ebaibol na ọ ta nọ:

“A rẹ jọ udevie rai ruẹ ohwo ọvo vievie he . . . nọ ọ rẹ gbẹva, ohwo kpobi nọ o re ru emajiki, ohwo kpobi nọ ọ rẹ gwọlọ oka oware nọ o te via, ọbo-ẹva, ohwo kpobi nọ ọ rẹ nua amọfa, ohwo kpobi nọ ọ rẹ nekpẹ mi ohwo nọ o re lele izi ta ẹme hayo ọgbẹva, hayo ohwo kpobi nọ ọ rẹ nekpẹ mi enọ i whu no. Keme ohwo kpobi nọ o bi ru eware enana ọ rẹ tọtọ Jihova oma.”—Iziewariẹ 18:10-12.

Fikieme Ebaibol na o ro mukpahe iruẹru imizi te ere?

• Iruẹru imizi e rẹ lẹliẹ ohwo kuomagbe idhivẹri. Ebaibol ọ ta nọ ikọ-odhiwu jọ a ghẹmeeyo kẹ Ọghẹnẹ, a tẹ rọ ere zihe ruọ ewegrẹ Ọghẹnẹ. (Emuhọ 6:2; Jud 6) Ikọ imuomu nana nọ a re se idhivẹri na a rẹ rehọ ebo-ẹva, ahwo nọ a re lele izi ta ẹme, te enọ i re rri isi rọ kiotọ eware ro su ahwo thọ. Ma te bi ru eware nana yọ ma bi mu usu kugbe ewegrẹ Ọghẹnẹ.

• A be rọ iruẹru imizi wuhrẹ ahwo iwuhrẹ erue inọ ahwo jọ a wo ogaga nọ a rẹ rọ riẹ oware nọ o te via evaọ obaro. Rekọ Ọghẹnẹ ọvo họ ọnọ ọ rẹ sae ta nọ: “Evaọ obọ emuhọ mẹ rẹ jọ ta oware nọ u ti no oware ze, yọ anwọ oke krẹkri nọ u kpemu mẹ rọ ta eware nọ a ri ti ru hu.”—Aizaya 46:10; Jemis 4:13, 14.

• A be rọ iruẹru imizi wuhrẹ ahwo thọ inọ ahwo nọ a whu no a rẹ sai lele enọ e rrọ uzuazọ ta ẹme. Rekọ Ebaibol na ọ ta nọ: “Enọ i whu no a riẹ oware ovuovo ho . . . Iruo hayo omaa hayo eriariẹ hayo areghẹ ọvuọvo ọ rrọ obọ Uki hi.”—Ọtausiuwoma Na 9:5, 10.

Fiki ẹjiroro nana nọ ma fodẹ na, Isẹri Jihova a mukpahe oware kpobi nọ u wobọ kugbe iruẹru imizi. A rẹ jẹ kẹnoma kẹ eware ẹkeriotọ kpobi nọ i re dhesẹ eda, ahwo nọ a rẹ da azẹ amọfa, ogaga ebi, erayẹ, gbe eware itieye na efa. Maria, oniọvo-ọmọtẹ jọ nọ ọ rrọ uzoge ọ ta nọ: “Ifimu o te wobọ kugbe iruẹru imizi, kiyọ u fo re me rri rie he.”a

Oware nọ whọ rẹ sai ru

• Gbaemu nọ whọ rẹ “yọrọ obruoziẹ-iroro ọfuafo” evaọ aro Jihova ẹkwoma iruẹru imizi kpobi nọ whọ rẹ kẹnoma kẹ.—Iruẹru Ikọ 24:16.

• Gbolo oware kpobi nọ who wo nọ u wobọ kugbe iruẹru imizi kufiẹ. Se Iruẹru Ikọ 19:19, 20, re whọ ruẹ emamọ oriruo nọ Ileleikristi ikpe-udhusoi ọsosuọ a fihotọ evaọ onana.

Kareghẹhọ nọ: Whọ tẹ kẹnoma kẹ oware kpobi nọ u wobọ kugbe idhivẹri, yọ who bi dhesẹ nọ abọ Jihova whọ rrọ. Onana o rẹ lẹliẹ eva were iẹe.—Itẹ 27:11.