Obe Okpokpọ nọ Ma bi ro Wuhrẹ Ahwo na U Wo Ohẹriẹ Gaga

Evaọ Ọvo 2021, Utu Ẹruorote na u siobọno obe okpokpọ jọ re ma ro wuhrẹ ahwo. Oye họ, Reawere Uzuazọ Bẹdẹ Bẹdẹ!a Ma riẹ nọ eva e were owhẹ gaga nọ a siobọno obe na. Ere o jọ kẹ oniọvo jọ evaọ obọ Canada nọ a re se Matthew. Ọ ta nọ: “Te ividio nọ i dhesẹ obe na, ovuẹ nọ a kẹ kpahe iẹe gbe eme nọ ahwo nọ a rehọ e riẹ wuhrẹ ahwo no a ta, o lẹliẹ obe na were omẹ gaga. Oma o jẹ kpakpa omẹ re mẹ rehọ iẹe mu uwuhrẹ họ kugbe ahwo.”

Oghẹrẹ nọ ma rẹ rọ rehọ obe Reawere Uzuazọ Bẹdẹ Bẹdẹ! na wuhrẹ ahwo u wo ohẹriẹ no ebe efa kpobi. Ere ọvo ho, who te rri ọnọ a printi na, whọ rẹ ruẹ nọ u wo ohẹriẹ no efa kpobi. Oghẹrẹ vẹ a ro ru ei?

Obe Okpokpọ Mai na U Gine Wo Ohẹriẹ

Ewẹ-ebe riẹ i wo okpa gaga. Fikieme o rọ gwọlọ nọ ewẹ-ebe riẹ i re wo okpa? Keme iwoho nọ i bu vi egba ezeza (600) nọ i wo ekọlọ sa-sa eye e rrọ obe na. Iwoho riẹ e rehọ enwenọ isiakpe bu vi erọ obe Wuhrẹ Omai na. Whaọ eria nọ a kere eme hayo drọ iwoho fihọ họ e rrọ obe na gaga re. Nọ ewẹ-ebe nọ a ti ro ru obe na i gbe wo okpa ziezi hi, ohwo o te bi se eme nọ e rrọ ẹwẹ-obe jọ, ọ rẹ sae ruẹ iwoho nọ e rrọ abọdekọ ẹwẹ-obe na. Fikiere inievo nọ e rrọ utu iruo International Printing Department (IPD), evaọ Wallkill, New York, obọ U.S.A., a tẹ dawo oghẹrẹ ewẹ-ebe ene nọ ma bi ro printi ebe evaọ iwou ogha mai. Ogbẹgwae Ebe-Ikere orọ Utu Ẹruorote na a tẹ romatotọ kiẹ ene na riwi, a tẹ rehọ ọnọ ọ mai wo okpa. Oghẹrẹ ẹwẹ-obe nana ọ ghare gaga vi onọ ma bi ro printi ebe mai buobu. Rekọ o woma wo umuo ho keme ohwo o te bi se obe Reawere Uzuazọ Bẹdẹ Bẹdẹ! na, ọ rẹ ruẹ iwoho nọ e rrọ abọdekọ ẹwẹ-obe nọ o bi se he.

Oware nọ a ro ru uke riẹ u wo ohẹriẹ. Oware ofa jọ nọ o lẹliẹ obe na wo ohẹriẹ no ebe mai efa họ, oware nọ a be hai ro ru uke ebe mai, oye a ro ru uke riẹ hẹ. O tẹ whae ze nọ uwoho nọ o rrọ uke riẹ u ro mu gbalọ. U re je ru nọ uke obe na o gbẹ rọ kake hiẹ no ho. Oware nọ a ro ru uke obe na o rehọ enwenọ isiasoi ghare vi onọ a be hai ro ru uke ebe mai efa. Fikiere iwou ogha buobu a kuobọgbe gwọlọ onọ o mai ku evaọ oghẹrẹ uke obe nọ ma gwọlọ na.

Fikieme a rọ rehọ eware eghaghae nana ru obe na? Oniọvo jọ nọ o bi ru iruo evaọ ẹko-iruo IPD ọ ta nọ: “A te rọ obe nana wuhrẹ ahwo gaga yọ a te hai dhei ererovie. Fikiere ma ru rie evaọ oghẹrẹ nọ ọ rẹ gbẹ rọ jọ ziezi dede nọ a bi rovie iei ẹsikpobi.” Eduardo nọ o bi ru iruo evaọ ẹko-iruo nọ a re jo printi ebe evaọ uwou ogha Brazil ọ ta nọ: “Ukoko o rehọ igho unevaze ru emamọ obe nana nọ o rẹ kake raha ha na. Yọ oghẹrẹ nọ a ru rie o woma wo umuo ho.”

Epanọ A je ro Printi Ebe nọ Okpẹyao COVID-19 na O Du Lahwe

Evaọ amara Asa, 2021 ma ro mu obe Reawere Uzuazọ Bẹdẹ Bẹdẹ! na họ eprinti. Oke nana yọ okpẹyao COVID-19 na ọ rrọ otọ no. Ẹyao na u ru eware ga vi epaọ ọsosuọ. Fikinọ a gbẹ jẹ kẹ ohwo ọvo uvẹ re ọ rueva uwou ogha ọvuọvo ho, inievo nọ e jẹ hai no obọ otafe ze ti lele omai ru iruo a gbẹ jẹ sae nyaze he. Yọ a gbe je zizie ahwo ziọ Ebẹtẹle gbe he. Fikiere evaọ iwou ogha jọ, inievo nọ i re ru iruo evaọ ofẹ nọ a re jo printi ebe a gbe tulo ho. Evaọ omoke jọ, a gbe je printi ebe he evaọ iwou ogha efa fiki izi egọmeti.

Eme u fiobọhọ kẹ omai evaọ oke yena? A rehọ inievo jọ nọ e rrọ ẹko iruo efa evaọ Ebẹtẹle kpohọ ofẹ nọ a re jo printi ebe nyai ru iruo evaọ omoke jọ. Oniọvo jọ nọ a re se Joel nọ o bi ru iruo evaọ IPD ọ ta nọ: “Inievo nana a daoma wo umuo ho. A jẹ daoma wuhrẹ epanọ a re ru iruo na. Enana kpobi e wha riẹ ze nọ ma sai ro ru iruo na.”

Dede nọ eware e lọhọ họ, obe Reawere Uzuazọ Bẹdẹ Bẹdẹ! na nọ ma printi i bu te ima buobu. Ma dẹ eware buobu nọ a re ro printi ebe wọhọ ame-ugbẹ, ewẹ-ebe, oware nọ a rẹ rọ gba ewẹ-ebe kugbe, oware nọ u re ru nọ uke obe o gbẹ rọ kake vo ho gbe eware itieye efa. Evaọ emerae isoi ọvo, ma raha igho nọ i bu vi edọla 2.3 million (koyehọ ₦955,558,000). Re ma gbẹ raha igho bu gahrọ họ, unu ebe nọ ikoko sa-sa a ginẹ gwọlọ ọvo ma re printi se ai.

“Obe U re gbe Woma Vi Enẹ Hẹ”

Ẹvẹ inievo nọ e be rehọ obe na wuhrẹ ahwo gbe ahwo nọ a be rehọ iẹe wuhrẹ a rri obe na? Oniọvo-ọmọzae jọ nọ a re se Paul evaọ obọ Australia ọ ta nọ: “Whọ tẹ be rehọ obe Reawere Uzuazọ Bẹdẹ Bẹdẹ! na wuhrẹ ahwo, oma ọvo o rẹ were owhẹ. Whẹ avọ ohwo na wha rẹ ta ẹme ziezi, orọnọ whẹ ọvo ọ rẹ ta ha. O rẹ lẹliẹ oma kpakpa omẹ re me wuhrẹ ahwo. Oghẹrẹ nọ a ru obeva riẹ u wo erru gaga. Eme nọ e riẹe eva, te enọ na, ividio, iwoho, echate gbe oria utee na i re fiobọhọ kẹ ohwo nọ who bi wuhrẹ na gaga. Obe u re gbe woma vi enẹ hẹ. O be lẹliẹ omẹ riẹ ahwo wuhrẹ ziezi.”

Ohwo jọ nọ a bi wuhrẹ Ebaibol evaọ obọ United States ọ ta nọ: “Obe okpokpọ na o were omẹ gaga. Iwoho na i re fiobọhọ kẹ omẹ riẹ oware nọ me bi wuhrẹ ziezi. Yọ ividio na e rẹ lẹliẹ omẹ roro didi jẹ daoma ru oware nọ me wuhrẹ.” Isiava soso a bi wuhrẹ ohwo nọ ọ ta ẹme nana koka koka, yọ ọ be hai kpohọ ewuhrẹ ẹsikpobi.

Ma gbe bi printi obe Reawere Uzuazọ Bẹdẹ Bẹdẹ! na evaọ evẹrẹ efa buobu. Utu Ẹruorote na u kuenu kẹ omai no inọ a fa obe na fihọ evẹrẹ nọ i bu te egba ihrẹ gbe ikpe (710). Onana o rehọ evẹrẹ egba esa gbe udhuvẹ (340) bu vi enọ a printi obe Wuhrẹ Omai na fihọ.

Ẹvẹ a be sae rọ ruẹ ugho printi ebe nana kpobi? Unevaze nọ wha bi ru rọkẹ iruo akpọ-soso na. Yọ donate.jw.org ahwo a be mai jo ru unevaze na. Unevaze rai o da omai ẹro fia. U bi fiobọhọ kẹ omai ru ebe gbe eware efa nọ ma re ro wuhrẹ ahwo kpahe Jihova, a vẹ sai “reawere uzuazọ bẹdẹ bẹdẹ.”—Olezi 22:26.