Erara-ghọ Oleleikristi Evaọ Akpọ Nọ Ọ Tahaku
“Fikiere u tomai te obọ ufihọ kẹ ahwo otiọye, re ma ruẹse jọ egba iruiruo eva uzẹme na.”—3 JỌN 8.
1. Didi ekẹ nọ a gwọlọ gaga Ọnọma na ọ rọ kẹ ohwo-akpọ?
“OHWO o wo oware uwoma ovo evaọ otọ akpọ na vi ẹre gbe ẹda gbe ẹghọghọ họ, keme onana u re lele ie evaọ uye riẹ, eva edẹ uzuazọ riẹ kpobi nọ Ọghẹnẹ ọ kẹ riẹ eva otọ akpọ na.” (Ọtausiuwoma Na 8:15) Evaọ eme eyena okokahwohọ Hibru anwae na ọ rọ ta k’omai nọ orọnikọ Jihova Ọghẹnẹ ọ gwọlọ nọ omama ohwo-akpọ riẹ ọ ghọghọ jẹ wereva ọvo ho rekọ ọ kẹ rai eware nọ a re ro ru ere. Evaọ ikuigbe ohwo-akpọ kpobi isiuru odode jọ evaọ udevie ahwo evaọ oria kpobi o wọhọ nọ re a reawere jẹ riakpọ.
2. (a) Ẹvẹ ohwo-akpọ ọ rọ rehọ oware nọ Jihova ọ jiroro riẹ kẹ ai ro ruiruo thọ no? (b) Eme o no rie ze?
2 Nẹnẹ ma be rria uyerakpọ ẹgwọlọ isiuru nọ ahwo a be jọ raha oke rai kpobi bi le isiuru gbe akpọriọ. Ahwo buobu a zihe ruọ enọ i “you oma-obọrai, . . . enọ i yowọ enu-awere siọ Ọghẹnẹ ba” no, wọhọ epanọ Ebaibol na ọ ruẹaro riẹ. (2 Timoti 3:1-4) Whaọ, onana u mukpahe oware nọ ẹjiroro Jihova Ọghẹnẹ o rọ. Nọ ilale akpọriọ u te zihe ruọ oware ọsosuọ kẹ ohwo no, hayo otẹrọnọ omorro họ oware nọ u bi gele ohwo na, uvi edẹro u re noize he, ‘eware na kpobi i ve zihe ruọ ifofe gbe ofou olele họre.’ (Ọtausiuwoma Na 1:14; 2:11) Fiki onana, akpọ na ọ vọ avọ ahwo ọkora nọ akpọ ọ bẹ tunu no, yọ onana o be so ebẹbẹ buobu nọ e rọ okegbe mai na ze. (Itẹ 18:1) Ahwo a te bi viẹro ku ohwohwo jẹ be hẹrioma evaọ ovioma, uyẹ, uyerakpọ, gbe eyero-okọ.
3. Ẹvẹ ma sai ro duku uvi oghọghọ gbe edẹro?
3 Ẹvẹ eware i re wo ohẹriẹ te otẹrọnọ ahwo a be raro kele oghẹrẹ nọ Jihova o bi ro yeri kugbe amọfa—re a jọ wowou, ruọghọ, ghọ-erara! O ru rie vevẹ inọ edidi evawere uzẹme o roma hwa omodawọ nọ ma rẹ rọ nyate isiuru mai hi. Ikpoye, onana họ usiavẹ na: “Ẹkẹ oghale o mae rọ vi emio.” (Iruẹru 20:35) Re ma ruẹ uvi oghọghọ gbe edẹro, ma re fi ezadhe gbe omohẹriẹ nọ i re bru omai abọ dhe kparobọ. Yọ ma re je fiobọhọ kẹ ahwo nọ i bi lele omai gọ Jihova. U wuzou re ma yo ohrẹ onana: “Fikiere u tomai te obọ ufihọ kẹ ahwo otiọye, re ma ruẹse jọ egba iruiruo eva uzẹme na.” (3 Jọn 8) Edhesẹ erara-ghọ kẹ ahwo nọ i te, te epanọ ẹgba mai u te, u wo erere evaọ idhere ivẹ—o rẹ kẹ ọnọ o bi ru ọghọ na gbe ọnọ a bi ru kẹ na erere. Kọ, amono a rọ usu enọ i te kẹ ‘emamọ odederehọ’ mai?
‘Rẹro te Imiwhrori avọ Eyaukuotọ’
4. Didi enwene evaọ usu uviuwou ma be ruẹ makọ evaọ udevie ahwo Jihova?
4 Iviuwou nọ e doma mu gbe erọo evawere yọ oware nọ a rẹ rọ ọthobọ ruẹ nẹnẹ. Erọo nọ e be fa kiti kiti gbe ini nọ e rọo ho nọ i bi vihọ evaọ akpọ na soso u nwene epanọ u fo nọ uviuwou o rẹ jọ no. Fikiere, ahwo buobu nọ i zihe ruọ Isẹri Jihova no evaọ ikpe mai enana a no iviuwou nọ e tahaku no ze. A fa orọo rai no hayo a hẹriẹ no ọrivẹ-orọo rai no, hayo a be rria iviuwou nọ ọyewọ ọvo ọ rọ. Fiba onana, wọhọ epanọ Jesu ọ ruẹaro riẹ, uzẹme nọ o wuhrẹ na o wha ohẹriẹ ziọ iviuwou buobu no.—Matiu 10:34-37; Luk 12:51-53.
5. Eme Jesu ọ ta nọ o rẹ sae jọ ehri uduotahawọ kẹ enọ e rọ iviuwou nọ e tahaku?
5 O rẹ sasa udu mai re ma ruẹ ahwo ekpokpọ nọ e rehọ edikihẹ ọgaga kẹ uzẹme na no, yọ ma rẹ rọ eyaa uduotahawọ Jesu sasa ai oma ẹsikpobi: “Ohwo ọvo ọ rọ họ, ọnọ ọ siọ uwou ba, hayo imoni emezae, hayo imoni emetẹ, hayo oni, hayo ọsẹ, hayo emọ, hayo etọ fiki mẹ gbe usiuwoma, rekọ o re wo ekpahọ udheusoi enẹna, iwou, gbe imoni emezae, gbe imoni emetẹ, gbe ini, gbe emọ, gbe etọ, gbe ẹlahiẹ; gbe uzuazọ ebẹdẹ bẹdẹ eva akpọ nọ ọ be tha.”—Mak 10:29, 30.
6. Ẹvẹ ma sae rọ jọ ‘inievo emezae, inievo emetẹ, ini, gbe emọ’ kẹ “imiwhrori avọ eyaukuotọ” evaọ udevie mai?
6 Kọ, amono họ ‘inievo emezae gbe emetẹ gbe ini gbe emọ’ enana? Re ma ruẹ ogbotu ahwo evaọ Ọgwa Uvie, ẹsejọ udhusoi hayo bu viere, enọ i re se oma rai inievo emezae gbe emetẹ o rẹ nwane lẹliẹ ohwo roro nọ enana họ inievo emezae, emetẹ, ini, gbe emọ riẹ hẹ. Dai roro ẹme ọnana: Jemis olele na ọ kareghẹhọ omai nọ re Jihova ọ jẹ egagọ mai rehọ, ma rẹ ‘rẹro te imiwhrori gbe eyae-uku evaọ uye rai, jẹ kare epe no akpọ na.’ (Jemis 1:27) Oyena u te dhesẹ nọ ma rẹ kuvẹ re uruemu akpọ ọrọ omoya efe gbe omoya otu u ruru edhesẹ ohrọoriọ mai kẹ “imiwhrori avọ eyaukuotọ” itieye na ha. Ikpoye, ma rẹ j’owọ re ma dhesẹ usu gbe erara-ghọ mai rọ kẹ ai.
7. (a) Eme họ uvi ẹjiroro ọghọ dhesẹ kẹ “imiwhrori avọ eyaukuotọ”? (b) Ono ọfa ọ sai w’abọ evaọ edhesẹ erara-ghọ Oleleikristi?
7 Edhesẹ erara-ghọ kẹ “imiwhrori avọ eyaukuotọ” orọnikọ o rẹ jọ obufihọ eware iwo ẹsikpobi hi. Iviuwou nọ ọyewọ ọvo ọ rọ hayo onọ egagọ o hẹriẹ o sae nwane jọ nọ a wo ẹbẹbẹ ugho ho. Ghele, uvi okuomagbe, okegbe uviuwou na, okuomagbe ahwo nọ e rọ ikpe sa-sa, gbe ẹghale emamọ eware ẹzi—enana yọ abọ uzuazọ nọ i wo aghare gaga. Fikiere, ma tẹ kareghẹhọ nọ orọnikọ epanọ ehaa na o rro te he, rekọ ẹzi uyoyou gbe okugbe họ oware nọ u muẹme, ẹvẹ u re woma te inọ, ẹsejọ, makọ “imiwhrori avọ eyaukuotọ” na dede a rẹ sai wo abọ evaọ edhesẹ erara-ghọ kẹ ibe Ileleikristi efa!—Wawo 1 Ivie 17:8-16.
Kọ Erara E rọ Udevie Mai?
8. Didi enwene a rẹ sae ruẹ evaọ ikoko Isẹri Jihova buobu?
8 Ma be rria etoke nọ ahwo a bi jo no oria ruọ oria. “Ahwo nọ a bu vi ima 100 evaọ akpọ na a be rria erẹwho nọ a jọ rọ emotọ họ, yọ ima 23 a le no ẹwho obọ rai no,” ere World Press Review ọ ta. Oware nọ onana o wha ze no họ evaọ eria buobu, maero evaọ ikpewho buobu, ikoko ahwo Jihova nọ ahwo uyẹ ovo hayo orẹwho ovo i ru via vẹre i wo ahwo nọ i no abọ sa-sa akpọ na ze no. Ẹsejọhọ onana o rọ uzẹme evaọ oria nọ whọ be rria. Kọ ẹvẹ ma re rri “erara” hayo ‘ahwo ẹwho efa’ enana, wọhọ epanọ ahwo akpọ na a re se ai na, enọ ẹvẹrẹ rai, uruemu rai, gbe oghẹrẹ uzuazọ rai i wo ohẹriẹ no omai?
9. Didi egbefẹ ma rẹ sai kie ro kpahe eriwo mai ọrọ “erara” gbe ‘ahwo ẹwho ọfa’ nọ e be ziọ ukoko Ileleikristi na?
9 Re a tae kpẹkpẹe, ma rẹ kuvẹ kẹ ozodhẹ erara re o lẹliẹ omai roro nọ ma mai wo ẹgwọlọ uvẹ nọ ma rọ riẹ uzẹme na vi ahwo nọ i no ekuotọ efa hayo enọ a re se ekuotọ egedhọ na ze he; hayo kọ ma re roro epaọ ẹsenọ erara enana i bi si ọghọ no Ọgwa Uvie na oma hayo eria efa ha. U te fo re Pọl ukọ na ọ kareghẹhọ Ileleikristi ahwo Ju ikpe-udhusoi ọsosuọ jọ, enọ i wo iroro enana họ eva, inọ ohwo ọvo o te he; o rọ uwowou Ọghẹnẹ gheghe nọ o ro ru ei lọhọ k’omai re ma wo usiwo. (Ahwo Rom 3:9-12, 23, 24) Ma rẹ ghọghọ inọ enẹna uwowou Ọghẹnẹ o be nyate ahwo buobu oma enọ, evaọ edhere jọ, a whaha e rai uvẹ eyo usiuwoma na. (1 Timoti 2:4) Ẹvẹ ma sae ro dhesẹ nọ uyoyou nọ ma wo kẹ ae yọ orọ obọdẹ?
10. Ẹvẹ ma sai ro dhesẹ nọ ma bi ghine dhesẹ uvi ọghọoruo kẹ ‘ahwo ẹwho ọfa’ evaọ udevie mai?
10 Ma rẹ sai lele uthubro Pọl: “Whai ohwo o dede ohwo rehọ, wọhọ epanọ Kristi o dede owhai rehọ rọ kẹ oruaro Ọghẹnẹ.” (Ahwo Rom 15:7) Ma te vuhumu nọ ahwo nọ i no ẹkuotọ ọfa hayo okegbe ọfa ze oware o rẹ kare ae obọ gaga, ma re dhesẹ uwowou gbe ọdawẹ kẹ ai nọ ẹgba mai u te te. Ma re dede ai ziọ udevie mai, ru omomọvo rai “wọhọ ohwo ẹwho” mai, je “yowu iei wọhọ epanọ who you oma ra.” (Iruo-Izerẹ 19:34) Onana o nwane lọhọ eruo ho, rekọ ma rẹ sae kparobọ ma tẹ kareghẹhọ ohrẹ na: “Wha kielele akpọ nana ha; rekọ jọ ẹjiroro ọkpokpọ rai o rẹriẹ owhai, re wha dhesẹ oreva Ọghẹnẹ via, o nọ uwoma nọ a jẹrehọ nọ ojẹ gbunu.”—Ahwo Rom 12:2.
Ghale Kugbe Erezi Na
11, 12. Didi obọdẹ ororokẹ a kẹ idibo Jihova jọ evaọ (a) Izrẹl anwae (b) ikpe-udhusoi ọsosuọ na?
11 Evaọ usu ahwo nọ a ghine te kẹ ororokẹ gbe erara-ghọ mai họ ekpako Ileleikristi enọ i bi ruiruo gaga kẹ omokpokpọ ẹzi mai. Jihova o ru obọdẹ eruẹrẹfihotọ kẹ izerẹ gbe ahwo Livai evaọ Izrẹl anwae. (Ikelakele 18:25-29) Evaọ ikpe-udhusoi ọsosuọ, a ta kẹ Ileleikristi re a sẹro ahwo nọ e be gae na evaọ ọkwa obọdẹ. Ekere nọ o rọ 3 Jọn 5-8 o k’omai eriwo ọsese ọrọ ẹkpekpe uyoyou nọ o jọ udevie Ileleikristi ọsosuọ na.
12 Jọn ukọ na nọ ọ kpako no na o ghine wo ovuhumuo uwowou gbe ọghọoruo onọ Gayọs o dhesẹ kẹ inievo enyukọ jọ nọ a vi nya i weze bru ukoko na. Inievo enana—kugbe Demitriọs, ọnọ ọ wha ileta na—aikpobi yọ erara hayo Gayọs ọ riẹ rai vẹre he. Rekọ a dede i rai rehọ ziezi keme ‘odẹ Ọghẹnẹ a rọ nyaze.’ Enẹ Jọn o fi rie họ: “Fikiere u tomai te obọ ufihọ kẹ ahwo otiọye, re ma ruẹse jọ egba iruiruo eva uzẹme na.”—3 Jọn 1, 7, 8.
13. Amono evaọ udevie mai nẹnẹ e mai fo kẹ ‘odederehọ mai’?
13 Nẹnẹ, evaọ udevie ukoko Jihova, ejọ e riẹ buobu nọ e be lahiẹ oma rai gaga fiki ewoma inievo na kpobi. Enana i kugbe esẹro ọnyawariẹ, enọ e be raha oke gbe ẹgba rai koka koka evaọ ọbọga ikoko na; imishọnare, enọ e nyase iviuwou gbe egbẹnyusu rai ba re a ta usiuwoma evaọ ekuotọ efa; enọ e rọ iwou Ebẹtẹle hayo iwou ogha, enọ i bi ruiruo rọ tha usiuwoma ota akpọ na soso uke; gbe enọ e rọ iruo ọkobaro na, enọ e be raha oke gbe ẹgba rai buobu evaọ iruẹru usiuwoma ota na. Uzẹme, enana kpobi a bi ruiruo gaga, orọnikọ rọ kẹ oruaro hayo erere obọ rai jọ họ, rekọ fiki uyoyou kẹ okugbe-inievo Oleleikristi na jẹ rọ kẹ Jihova. A te kẹ aruorokele mai fiki egagọ udu rai kpobi yọ a te kẹ ‘emamọ odederehọ’ re.
14. (a) Ẹvẹ o jẹ rọ nọ ma rẹ jọ Ileleikristi nọ i woma viere nọ ma te bi dhesẹ ọghọoruo kẹ erọ ẹrọwọ na? (b) Fikieme Jesu ọ jẹ ta nọ Meri ọ salọ “abọ owoma”?
14 Nọ ma te ‘dede ahwo itieye na rehọ’ ziezi, Jọn ukọ na ọ ta nọ ma vẹ “jọ egba iruiruo eva uzẹme na.” U re ru omai jọ emamọ Ileleikristi viere. Ere o rọ keme iruo Ileleikristi i kugbe ewoma oruo kẹ ibe enọ e rọwo. (Itẹ 3:27, 28; 1 Jọn 3:18) Osaohwa o riẹ evaọ edhere ọfa re. Okenọ Meri avọ Mata a dede Jesu ziọ uwou rai, Mata ọ tẹ gwọlọ nọ o re dede Jesu rehọ ziezi ẹkwoma ethere “eware buobu” kẹe. Meri o dhesẹ erara-ghọ evaọ edhere ọfa. Ọ “keria awọ Ọnowo na je yo eme riẹ,” yọ Jesu o jiri rie fikinọ ọ salọ “abọ owoma.” (Luk 10:38-42) Ẹmeọta kugbe ahwo nọ e kpako no yọ abọ nọ u wuzou evaọ oke owọwọ nọ a rẹ rọ nyusu kugbe ai.—Ahwo Rom 1:11, 12.
Eva Etoke Obọdẹ
15. Obọdẹ oke vẹ o rẹ sae jọ oke evawere kẹ ahwo Jihova?
15 Dede nọ Ileleikristi uzẹme a re lele iruemu nọ e viodẹ hayo edẹ-eriosehọ hayo ehaa akpọ na ha, etoke jọ e riẹ nọ a re kokohọ re a riawere usu ohwohwo. Wọhọ oriruo, Jesu o kpohọ ehaa orọo evaọ Kena o te je fiba oghọghọ ehaa na ẹkwoma oware igbunu ọsosuọ riẹ nọ o ru. (Jọn 2:1-11) Epọvo na re nẹnẹ, ahwo Jihova a re wo evawere kugbe evaọ etoke obọdẹ itieye na, yọ emamọ edhesẹ oghọghọ gbe ehaa iruo i re fiba awere oke oyena gaga. Rekọ, eme u fo eruo?
16. Didi ọkpọvio ma wo kpahe emamọ uruemu makọ evaọ etoke obọdẹ?
16 Ro no ewuhrẹ Ebaibol mai ze, ma wuhrẹ emamọ uruemu nọ u fo kẹ Ileleikristi, yọ onana ma re lele kẹse kẹse. (Ahwo Rom 13:12-14; Ahwo Galesha 5:19-21; Ahwo Ẹfẹsọs 5:3-5) Okuomagbe otu, te orọ ehaa orọo hayo orọ ẹjiroro ọfa, o rẹ k’omai obe udu nọ ma re ro gbabọ kẹ ute Oleleikristi mai hi hayo re ma ru oware nọ ma hae rọ aro koko ru vẹre he he; yọ o gb’omai họ re ma lele uruemu kpobi evaọ ẹkuotọ nọ ma be rria ha. Ibuobu iruemu na i wo ehri no iruemu erue gbe ogbẹrọwọ egagọ erue ze, yọ efa i kugbe iruemu nọ e rọwo kugbe erọ Ileleikristi vievie he.—1 Pita 4:3, 4.
17. (a) Eme u dhesẹ nọ ehaa orọo obọ Kena na o jọ kpatiẹ gbe nọ a sẹro riẹ ziezi? (b) Eme u dhesẹ nọ Jesu ọ jẹ ehaa ọyena rehọ?
17 Ma te se Jọn 2:1-11, o rẹ jọ bẹbẹ k’omai hi re ma ruẹ nọ ehaa na ọ jọ ruaro jegbe nọ ahwo nọ a zizie a jọ buobu. Ghele, a “zizie” Jesu gbe ilele riẹ; orọnikọ a thoukpuru nya ha, dede nọ ejọ rai a jọ imoni enọ i wo ehaa na. Ma re je muẹrohọ nọ ‘egbodibo’ e jariẹ jegbe ọnọ ‘o wuzou’ ehaa na, ọnọ ọ rẹ kpọ oware nọ a be wọ kẹ ahwo na hayo onọ a rẹ ruẹ. Enana kpobi i dhesẹ nọ a ruẹrẹ ehaa na họ ziezi jẹ sẹro riẹ. Ekere na o te kuhọ ta nọ ẹkwoma oware nọ o ru evaọ ehaa na, Jesu o te “dhesẹ oruaro riẹ.” Kọ ọ hae salọ ehaa ọyena re ọ jariẹ dhesẹ oruaro riẹ otẹrọnọ o jọ whọhọ whọhọ hayo onọ a jẹ jọ da jẹ roma ghelie otọ? Dazigbe.
18. Eme a re roro kpahe gaga evaọ etoke okuomagbe obọdẹ kpobi?
18 Kọ, ẹvẹ kpahe ehaa obọdẹ mai jọ nọ ma re jo zizie ahwo na? U fo re ma kareghẹhọ inọ ẹjiroro odederehọ amọfa avọ erara-ghọ o rọ re mai kpobi ma “ruẹse jọ egba iruiruo eva uzẹme na.” Fikiere, u te he re ma se ehaa jọ okuomagbe “Isẹri” na. Onọ nọ a rẹ sae nọ họ, Kọ o ghinẹ rọ isẹri kpahe ahwo nọ ma rọ gbe oware nọ ma rọwo? Ma rẹ rehọ ehaa itieye wọhọ uvẹ nọ ma rẹ rọ ruẹ epanọ ma rẹ sae nya thabọ te evaọ aruorokele akpọ na ha, evaọ omarọkẹ “urusio uwo, gbe urusio ibiaro gbe eheri uzuazọ” họ. (1 Jọn 2:15, 16) Ikpoye, ehaa enana i re dhesẹ edikihẹ mai wọhọ Isẹri Jihova, yọ u re mu omai ẹro inọ oware nọ ma bi ru o rẹ wha oruaro gbe ọghọ se Jihova.—Matiu 5:16; 1 Ahwo Kọrint 10:31-33.
‘Ru Ọghọ Ababọ Ẹguọ’
19. Fikieme u je fo nọ ma rẹ “ghọ ohwo, ababọ ẹguọ”?
19 Nọ eyero akpọ na o bi dhe eyeyoma na yọ ahwo a be hẹriẹ viere na, u fo re ma ru onọ ma sai ru kpobi re ma ru ọgbakugbe nọ o rọ udevie Ileleikristi uzẹme na ga viere. (Ahwo Kọlọsi 3:14) Fiki onana, ma re wo “uyoyou nọ o rẹ hiẹ hẹ” kẹ ohwohwo, wọhọ epanọ Pita ọ ta kẹ omai. Evaọ edhere ọliọliọ, o te fibae nọ: “Whai ohwo ọ hẹ ghọ ohwo, ababọ ẹguọ.” (1 Pita 4:7-9) Kọ u no omai eva ze re ma rehọ ẹwẹ obọ mai ru ọghọ kẹ inievo mai, re ma lahiẹ oma mai re ma jọ wowou je fiobọhọ? Hayo kọ ma rẹ go okenọ uvẹ utioye na u te rovie? Otẹrọnọ ere ma bi ruẹ, koyehọ ma be raha oghọghọ nọ ma hai wo no je ku osaohwa ọrọ evawere ewoma oruo fiẹ.—Itẹ 3:27; Iruẹru 20:35.
20. Didi eghale e be hẹrẹ omai otẹrọnọ ma bi dhesẹ ọghọoruo evaọ akpọ inẹnẹ nọ ọ tahaku na?
20 Iruo ru kugbe ibe Ileleikristi mai kpekpekpe, re ma jọ wowou avọ ọghọ kẹ ohwohwo, o rẹ wha eghale buobu ze. (Matiu 10:40-42) Rọ kẹ ahwo itieye na Jihova ọ yeyaa nọ “ọ rẹ te rehọ uwoho riẹ ruru ai eva aro riẹ. Ohọo gbe uruame u gbe ti kpe ai ofa ha.” Re ma jọ otọ uwoho Jihova họ re ma reawere uketha gbe ọghọ riẹ. (Eviavia 7:15, 16; Aizaya 25:6) Ẹhẹ, ẹruore erara-ghọ Jihova nọ ma te reawere riẹ bẹdẹ bẹdẹ o nwane rọ obaro na.—Olezi 27:4; 61:3, 4.
Kọ Whọ Sae k’Iyo Nana Vevẹ?
◻ Eme ma re rri vo ho otẹrọnọ ma gwọlọ duku uvi oghọghọ gbe edẹro?
◻ Amono họ “imiwhrori avọ eyaukuotọ” na, kọ ẹvẹ ma rẹ rọ ‘rẹro te’ ai?
◻ Ẹvẹ ma re rri “erara” gbe ‘ahwo ẹwho ọfa’ nọ e rọ udevie mai?
◻ Amono a mai fo kẹ ororokẹ nẹnẹ?
◻ Ẹvẹ etoke obọdẹ i re ro dhesẹ uvi ẹzi erara-ghọ?
[Pictures on pages 28, 29]
Eva etoke ehaa ma rẹ sae dhesẹ ọghọoruo kẹ ahwo ẹwho ọfa, emọ nọ i wo esẹ hẹ, iruiruo odibọgba oke-kpobi, gbe erara nọ ma zizie