Kọ Whọ Te Jariẹ?
1 Osẹri jọ nọ o kri no ọ ta okejọ nọ: “Ẹdẹ ọsosuọ okokohọ na ọ tẹ vrẹ owhẹ, yọ eware buobu e vrẹ owhẹ no!” Fikieme o je roro ere? Keme ẹdẹ ọsosuọ na họ emuhọ ehaa emuore ologbo abọ-ẹzi nọ ukoko Jihova o ruẹrẹhọ k’omai. (Aiz. 25:6) Etẹe nọ ma rẹ jọ no oke emuhọ vrẹ u re dhesẹ nọ ma rọwo kugbe eme ọso-ilezi na: “Eva e were omẹ hrọ nọ a ta kẹ omẹ nọ, ‘Ma kpo obọ uwou ỌNOWO!’ ”—Ol. 122:1.
2 Ghele na, ukpe n’ukpo eva Ikokohọ Ubrotọ “Ẹme Eruẹaruẹ Ọghẹnẹ” na jọ, ahwo nọ a jariẹ evaọ Edisoi-Oka a kawo vi erọ Ẹdẹ-Ọmaha gbe Ẹdoka gaga. Onana u dhesẹ nọ inievo mai buobu a yo eme abọ okokohọ na jọ nọ e kẹ evuẹ nọ i w’uzou kpahe ẹme eruẹaruẹ na ha. A te je kuọ usu evawere kugbe ibe enọ e rọwo fiẹ.
3 Whọ Kuvẹ re Iruo E Da Owhẹ Ji Hi: Ẹsejọhọ awaọruọ kpahe okpomahọ nọ onana u ti wo kpahe akiruo ohwo họ ẹjiroro jọ nọ ahwo jọ a gbẹ nya evaọ Edisoi-Oka ha na. Ghele na, Isẹri buobu a ruẹ no nọ u re no ega iruo rai eva ze re a fiobọhọ evaọ ẹme ọnana otẹrọnọ a tẹ kake yare uvẹ oke krẹkri kpahotọ. Ọtamuo oniọvo-ọmọtẹ ọkobaro jọ re o kpohọ iwuhrẹ ukoko gbe ikokohọ kpobi o were ọga iruo riẹ eva gaga te epanọ ọ rọ raha okpẹdẹ jọ soso evaọ okokohọ nọ ọkobaro na ọ nya!
4 U fo ho re who roro nọ o te were ọga iruo ra ha re ọ kẹ owhẹ uvẹ, hayo re who ku ei họ nnọ u fiẹme he otẹrọnọ ẹdẹ okokohọ jọ ọ vrẹ owhẹ. Avọ udu imuẹro, ruẹrẹ oma kpahe re whọ rehọ ona dhesẹ no Ikereakere na ze kẹ ọga iruo ra kpahe oware nọ ekpohọ okokohọ na ọ jẹ rrọ abọ nọ ọ r’oja evaọ egagọ ra. (Hib. 10:24, 25) Who ve fi udu ra kpobi họ eyaa Jihova, vuhumu nnọ oware abọ-iwo kpobi nọ whọ gwọlọ u ti t’owhẹ obọ otẹrọnọ whọ rehọ ẹgwọlọ abọ-ẹzi rọ karo evaọ uzuazọ ra.—Mat. 6:33; Hib. 13:5, 6.
5 Usiavẹ na họ ewo ovuhumuo kẹ “eware nọ e mae r’oja.” (Fil. 1:10, 11, NW; Ol. 27:4) Onana o rẹ w’omai m’omaa re ma wo erere vọvọ no ọruẹrẹfihọ Jihova nana nọ ọ r’oja na ze. Muọ ugogo omaa họ eruo enẹna, re whọ jẹ gbaemu inọ whọ te jariẹ edẹ esa na kpobi!