Kọ Whẹ Yọ Ohwo nọ Ọ rẹ Dhomovuọ?
1 U re gb’omai unu hu evaọ okenọ ma tẹ ruẹ ọmaha nọ o bi n’omai rri no emu oni hayo ọsẹ riẹ ze. Ohwo kpobi ọ rẹ vuoma evaọ oke emaha. Makọ evaọ oke ọkpako, ibuobu e rẹ gbẹ dhomovuọ ghele. Otẹrọnọ omovuọ u bi kpomahọ abọ-owo ra evaọ odibọgba na, eme whọ rẹ sai ru?
2 Eyeri Kugbe Omovuọ: O r’oja re a muẹrohọ “ohwo odidi obọ eva” na. (1 Pita 3:4) Bọ uyoyou ra kẹ Jihova gbe erivẹ ra ga. Jọ u mu owhẹ ẹro gaga nnọ erugba iruo usiuwoma ota na yọ edhere obọdẹ jọ nọ a re ro dhesẹ ẹzi uyoyou oma-urodheidhe. Nya lele emamọ omaa uwuhrẹ omobọ-ohwo gbe iwuhrẹ enya. Lẹ ẹsikpobi rọkẹ obufihọ Jihova dẹẹ. Ẹrọwọ ọgaga gbe eva nọ a re fihọ iẹe e rẹ bọ aruọwha ga jẹ kẹ “udu nọ a [rẹ] rọ ta ẹme Ọghẹnẹ ababọ ozọ.”—Fil. 1:14.
3 Họre iroro ọ seba-ete. O wọhọ nọ Timoti o ru ere. Pọl ọ tuduhọ Timoti awọ nọ “who ru re ohwo ọvo o ri owhẹ ọmaha ha,” jẹ kareghẹhọ iẹe nọ “Ọghẹnẹ ọ kẹ omai ẹzi ozọ-odhẹ hẹ rekọ ẹzi ogaga.” (1 Tim. 4:12; 2 Tim. 1:7) Jihova ọ rehọ Timoti ruiruo ziezi, yọ ọ te rehọ owhẹ ruiruo re otẹrọnọ whọ daoma wo ẹnyaharo avọ evaifihọ kpahe Iẹe riẹriẹriẹ.—Ol. 56:11.
4 Eroro kpahe ikere Ebaibol, wọhọ onọ o rrọ Matiu 10:37 na, u fiobọhọ kẹ oniọvo-ọmọtẹ jọ nọ omovuọ riẹ o jẹ lẹliẹe dhozọ ọzae riẹ nọ ọ wọso ẹe. Nọ o bi thihakọ na, odibọgba na ọ tẹ te lọhọ kẹe viere, yọ uwhremu riẹ ozae, oni, gbe inievo riẹ kpobi a tẹ jẹ uzẹme na rehọ!
5 Omaruẹrẹhọ U Wuzou: Evaifihọ ra e te jẹ rro viere evaọ okenọ whọ tẹ ruẹrẹ oma họ ziezi kẹ odibọgba na. Salọ ẹmeọta ọlọlọhọ jọ no omobe ọ Ebaibol E rọ Jiroro na ze hayo ikere Odibọgba Uvie Mai nọ e vrẹ no, wuhrẹ iẹe ziezi, je dhe ai ẹwẹwariẹ. Ukpenọ who re wo uduama, wo emamọ iroro. Wo aruọwha ẹkwoma amọfa nọ who re lele ru iruo kpekpekpe. Woi họ iroro nnọ ahwo buobu nọ whọ be nyaku eva inuẹthẹ na a rẹ dhomovuọ re wọhọ owhẹ. Ahwo kpobi a gwọlọ ovuẹ Uvie na.
6 Otẹrọnọ whọ rẹ dhomovuọ, whọ ruawa ha. Nọ whọ be daoma na, Jihova o ti fiobọhọ kẹ owhẹ jọ ọnọ o re whowho emamọ usi na ziezi. Kẹsena who ve ti wo oghọghọ evaọ odibọgba ra.—Itẹ 10:22.