‘Ekẹ Ahwo’ nọ E be Sẹro Uthuru Ọghẹnẹ avọ Osegboja
1 Ẹvẹ ọruẹrẹfihotọ oyoyou ọrọ ‘ekẹ ahwo’ nọ Jihova o ru ẹkwoma Ọmọ riẹ na o woma te! (Ẹf. 4:8, 11, 12) A wo ewha-iruo buobu, kugbe uthuru Ọghẹnẹ nọ a be rẹrote avọ ọwhọ gbe osegboja. (1 Pita 5:2, 3) Mai kpobi ma bi wo erere no ọruẹrẹfihotọ nana nọ ma gwọlọ gaga na ze. Makọ ejọ e rrọ otọ ebẹbẹ egaga, a kuomagbe ukoko na obọ, a wo ewhrehe jọ, hayo a reghe no, ezae enana a wo isiuru omobọ ohwo kpahe ewoma abọ-ẹzi ahwo na kpobi.—Fil. 2:4; 1 Tẹs. 5:12-14.
2 Okenọ eware nọ e via evaọ akpọ e tẹ wha awa-ọruọ jọ ze, ithuru-igodẹ esese nana a rẹ jọ wọhọ “oria nọ u sioma no ofou, oria nọ [u dhere] no ẹkporo.” Evaọ okenọ oma o tẹ lọhọ omai hayo okenọ ma tẹ rrọ uye jẹ gwọlọ omosasọ, a re ru omai oma sasa, “wọhọ oko-ame eva oria oyaya” hayo “wọhọ edhedhẹ utho ulogbo nọ u ruru otọ oyaya.”—Aiz. 32:2.
3 Uduotahọ Enọ E Siọ Iruo Uvie ba No: Ekpako na i re ru obọdẹ omodawọ re a tuduhọ ahwo nọ a zihe ruọ ẹdhigodo no hayo siọ iruo uvie ba no awọ, fiobọhọ kẹ ae re a zihe kpohọ abọ owo kẹse kẹse evaọ iruẹru ukoko na kpobi. Iweze ẹruorote iyoyou i fiobọhọ kẹ ahwo buobu bi kpohọ iwuhrẹ ukoko kẹse kẹse no jẹ bọ ae ga evaọ abọ-ẹzi te epanọ a be rọ wariẹ w’obọ evaọ odibọgba na. Omodawọ utioye na kpobi nọ ekpako na a bi ru na u dhesẹ ẹruọsa oyoyou Jihova gbe emamọ isuẹsu Jesu Kristi. O fi oriruo ọrọ edhesẹ ọdawẹ otiọye rọkẹ igodẹ riẹ kpobi nọ i reghe hayo vru no h’otọ.—Mat. 18:12-14; Jọn 10:16, 27-29.
4 Ithuru-igodẹ esese na a re fiẹrohotọ kẹ eka nọ i re dhesẹ nọ ohwo o bi kie kpemu evaọ abọ-ẹzi. Ohwo kpobi nọ o dhesẹ eka udu-uwhrehe, ọnọ o zihe ruọ ẹdhigodo evaọ iwuhrẹ enya, hayo ọnọ o bi rolobọ evaọ usiuwoma ota, ẹsejọhọ a gwọlọ uketha abọ-ẹzi. Ekpako na i wo osegboja re a fiobọhọ kẹ ohwo kpobi nọ o bi dhesẹ isiuru kpahe osẹ gbe ẹgọ akpọ na hayo ọnọ ọ rẹ gwọlọ fo ukoko na. Avọ uvi isiuru gbe uyoyou, u re no esẹro ọdawẹ eva ze re a ‘rehọ izuazọ rai kẹ’ evaọ omodawọ re a fiobọhọ kẹ ahwo otiọye re a wariẹ fi errae họ uyoyou rai kẹ Jihova.—1 Tẹs. 2:8.
5 Evaọ okenọ u kpemu, Ileleikristi jọ nọ e roma mudhe no a sioma no ukoko na, kie ruọ ababọ-iruo evaọ abọ-ẹzi keme ebẹbẹ ẹyao, ugho, hayo otunyẹ uviuwou e ga vi ae oma. Ejọ e kwa kpohọ oria okpokpọ rekọ a gbe duku ukoko nọ o kẹle he. Ukpenọ a rẹ fo ae, ekpako na e rẹ rọ ẹwo kẹ ae imuẹro inọ Jihova ọ rẹ rẹrote igodẹ riẹ kpobi yọ ọ rẹ sẹro rai evaọ etoke ọbẹbẹ. (Ol. 55:22; 1 Pita 5:7) Ithuru-igodẹ nọ e jaja aro vi a rẹ sai fiobọhọ kẹ ae vuhumu nnọ otẹrọnọ a ‘bigba Ọghẹnẹ o re ti bigba ae,’ kẹ ae omosasọ.—Jem. 4:8; Ol. 23:3, 4.
6 Enọ E Rrọ Oma-Kọkọ họ nọ A re Rri Ghaghae: Ithuru-igodẹ esese iyoyou i re je wo ọdawẹ kẹ enọ ahwo a rẹ sai rri vo. Ahwo jọ nọ a rrọ oma-kọhọ họ, enọ e rẹ sai no uwou ze he, hayo enọ e ko, a rrọ ukoko kpobi. Ẹkẹ-abọ rai evaọ ewhowho ovuẹ Uvie na o ghinẹ rẹ kakao fiki uyero rai. Ẹsejọhọ uvẹ kpobi nọ a rẹ rọ ta usiuwoma o sae jọ okenọ a tẹ be t’eme kugbe ahwo nọ a weze bru ai ze, ahwo nọ a be nya edhere vrẹ, hayo enọ e be rẹrote ai. Ghele na, a re rri onọ a sai ru kpobi wọhọ uketha oghaghae rọkẹ iruo usiuwoma ota na kpobi. (Mat. 25:15) O tẹ make rọnọ iminiti 15 ọvo a ro se-isẹri, a rẹ n’iyẹrẹ riẹ, yọ a re gbe kele ai wọhọ Iwhowho Uvie erọ ẹsikpobi.
7 “Ekẹ ahwo” na a rẹ mae riẹ kpahe ẹgwọlọ abọ-ẹzi inievo rai evaọ etoke nana evaọ ẹgbukpe na—ezi Ekareghẹhọ. Ẹvẹ o rrọ oke nọ u fo te kẹ ekpako na re a daoma ziezi fiobọhọ kẹ ahwo kpobi nọ a reghe no re a wariẹ ruẹ oghọghọ gbe udhedhẹ iroro nọ u re no emamọ usu kugbe ukoko na ze! Ma rẹ ghọghọ nọ ma tẹ ruẹ ahwo otiọye nọ ma gbẹ rrọ “ẹgba orọwọ na” evaọ iwuhrẹ ukoko jẹ rue rae evaọ odibọgba na be wariẹ k’imuẹro ẹrọwọ rai kpahe idhe ẹtanigbo na.—Gal. 6:10; Luk 15:4-7; Jọn 10:11, 14.