Fi Obọ họ kẹ Emọ Ra Wo Ẹnyaharo Evaọ Odibọgba Na
1 Esẹgbini Ileleikristi a wo owha-iruo ulogbo nọ a re ro wuhrẹ emọ rai epanọ a rẹ ta usiuwoma no emaha ze. A rẹ sai ru onana evaọ idhere buobu. A te wuhrẹ emọ jọ, a rẹ sai se ikere Ebaibol jọ uzuzou o tẹ make rọnọ a te riẹ epanọ a re se obe he. Onana o rẹ sai duobọte ahwo nọ a be kezọ kẹ omai gaga. Nọ emaha na e be kpako na, a rẹ sae jọ odibọgba na ru woma vi epaọ ọsosuọ dede. Kọ ẹvẹ whai esẹgbini wha sai ro fi obọ họ kẹ emọ rai re a ta usiuwoma? Ẹsejọhọ iroro-ejẹ obotọ na i ti gbe fi obọ họ.
2 Nọ who te yere ohwo no, whọ sae ta nọ:
◼ “Ọmọzae mẹ, [odẹ ọmọ na], o wo uvi ikere jọ nọ ọ gwọlọ se kẹ owhẹ.” Ọmọ ra ọ sae ta nọ: “Ikere Olezi nana i wuhrẹ omẹ odẹ Ọghẹnẹ. [Ọmọ na o ve se hayo ta eme nọ e rrọ Olezi 83:18 na uzuzou.] Emagazini enana e ta kpahe oware nọ Jihova Ọghẹnẹ o ti ru kẹ omai. Mẹ sae nya se ai ba kẹ owhẹ?” Whọ sai ku ẹme na họ ẹkwoma epanọ a be rọ tha iruo akpọ-soso na uke nọ who re ru vẹ.
3 Hayo whọ sae dawo edhere nana:
◼ Yere ohwo na. “Me bi wuhrẹ ọmọtẹ mẹ, [se odẹ riẹ], re ọ hai ru ewoma kẹ amọfa evaọ ẹwho na. Ọ gwọlọ se oria Ebaibol jọ kowhẹ kpẹkpẹe.” Ọmọtẹ ra na ọ sae ta nọ: “Edhere jọ nọ mẹ rọ gwọlọ fi obọ họ kẹ ahwo họ ẹkwoma ẹruore Ebaibol kpahe obaro na nọ mẹ rẹ vuẹ ae. [Ọmọ na o ve se hayo ta eme nọ e rrọ Eviavia 21:4 na uzuzou.] Emagazini enana e ta kpahe eware nọ Uvie Ọghẹnẹ u ti ru kẹ omai. Me roro nọ o te were owhẹ re who se ai.”
4 Edhere usiuwoma ota nọ a ru lọhọ nọ a re ro ruiruo ẹsikpobi u re fi obọ họ kẹ emọ na wo ẹzẹ evaọ ona nọ a re ro whowho ovuẹ Uvie na. A tẹ be hai wuhrẹ epanọ a rẹ ta ẹme vevẹ avọ emamọ edo-uvo u re fi obọ họ kẹ ae ta ẹme evaọ iyero sa-sa. Oma nọ a rẹ ruẹrẹ họ ziezi evaọ ẹruoke gbe uvi ejiri nọ a re jiri ai u ti fi obọ họ kẹ emaha na nọ a jẹ sae ta ẹrọwọ rai via.
5 Avọ uduotahawọ utioye, emaha buobu a te no wọhọ iwhowho-uvie nọ e re họ-ame he. Ẹvẹ o rrọ oware oghọghọ te re ma ruẹ emọ mai nọ i bi wo ẹnyaharo evaọ odibọgba Oleleikristi na!—Ol. 148:12, 13.