Kọ Whọ be Vae?
Va eme? Eme nọ who re kere fihọ ekade ọ DPA na (durable power of attorney) nọ a ruẹrẹhọ kẹ Isẹri Jihova nọ e họ-ame no. Nọ ‘whọ riẹ oware nọ o rẹ sae via k’owhẹ odẹ notha ha’ na, u wuzou re whọ jiroro kpahe oghẹrẹ usiwo-imu gbe edhere nọ a re ro siwi owhẹ nọ oware idudhe o tẹ via, je kere iroro nọ whọ jẹ na fihotọ. (Jem. 4:14; Iruẹru 15:28, 29) Oyejabọ nọ a je ru ividio na Transfusion-Alternative Health Care—Meeting Patient Needs and Rights, re u fi obọ họ k’owhẹ. Rri ividio na otẹrọnọ who re yo Oyibo, nọ orọnọ ẹvẹrẹ Oyibo ọ rrọ na. Lẹ kpahe iẹe, re whọ jẹ rehọ evuẹ nọ e rrọ obotọ na rọ kiẹ oware nọ who wuhrẹ riwi.—Muẹrohọ: Fikinọ ividio na u wo eria jọ nọ a jo dhesẹ oma-obẹrọ sa-sa kpẹkpẹe, esẹgbini a rẹ yọroma nọ a tẹ gwọlọ riwi ividio na kugbe emọ rai.
(1) Ahwo jọ nọ a riẹ kpahe usiwo-imu a be wariẹ roro sọ u gine fo re a se azẹ fihọ oma keme ahwo buobu a gbẹ be gwọlọ nọ a se azẹ fihọ ae oma ha. Oware nọ o be lẹliẹ egba usiwo-imu na wariẹ roro kpahe onana họ, fiki enwoma nọ i re no azẹ osefihọ-oma ze gbe fikinọ igho nọ a be rọ dẹ azẹ i re buobu. (2) Edọkita a ru obẹrọ egaga no ababọ azẹ osefihọ-oma. Iriruo esa erọ obẹrọ ogaga nọ a sae ru nọ a dhesẹ evaọ ividio na họ: Ọmaha nọ a bẹre ubiudu riẹ, obẹrọ edhẹ, gbe orọ onwa-uke. (3) Edọkita nọ i bu vi 100,000 evaọ erẹwho 150 i dhesẹ no inọ u no rai eva ze re a siwi ahwo ababọ azẹ osefihọ-oma. Fikieme a rọ gwọlọ ru ere? Fikinọ a gwọlọ ru lele iroro nọ ahwo nọ a bi siwi a jẹ.
(4) Ekiakiẹ nọ a jọ esipito ru kẹle na o kẹ imuẹro inọ a bi mu se azẹ fihọ ahwo oma. A vuhumu no inọ ahwo buobu nọ azẹ ọ rrọ oma tere he nọ a siwi ababọ azẹ a bi wo omakpokpọ vi enọ a se azẹ fihọ oma. (5) Enwoma jọ nọ i bi no azẹ osefihọ-oma ze họ, emerae ẹyao nọ e rẹ sai no azẹ omọfa ruọ ohwo oma, oma ohwo nọ u re gbe wo ẹgba nọ o rẹ rọ họre ẹyao ga tere he, gbe ethobọ ohwo-akpọ nọ e rẹ sae wha ebẹbẹ efa jọ ze. (6) Kpahe irere nọ e rrọ usiwo-imu nọ a re ro nwene azẹ osefihọ-oma, edọkita buobu a ruẹ no inọ u re ru nọ a rẹ rọ rẹro te ọnọ ọ be mọ na ziezi; u re ru igho usiwo imu kpotọ. Yọ enẹna usiwo nọ e rẹ wha ebẹbẹ lele oma ha nọ e nwane ghare tere he e riẹ no.
(7) Nọ egẹgẹ azẹ ọwawae nọ e rẹ wọ ofou nọ ma rẹ wẹ rehọ dhẹ oma na wariẹ na i gbe bu tere he, o rẹ lẹliẹ ohwo wo ẹyao nọ azẹ o re ro re noi oma. Ẹvẹ azẹ o re reno ohwo oma te nọ ọ jẹ sae gbẹ jọ uzuazọ? Okwakwa-osese orọ egẹgẹ-azẹ ọwawae nọ a re se hemoglobin o tẹ maki kpotọ gaga, ohwo ọ sae gbẹ jọ uzuazọ ghele. Re a sai ku ebẹbẹ nana họ, edọkita e ta nọ a rẹ sai kẹ ohwo otiọye imu nọ e rẹ kẹ azẹ hayo lẹliẹ azẹ na wariẹ bu. (8) Eme a re ru re azẹ nọ ọ rrọ ohwo oma o bu viere? A rẹ kẹe imu nọ e rẹ kẹ azẹ na ẹgba. Ẹsejọ, umu na erythropoietin (EPO) o sai ru azẹ bu te epanọ a gwọlọ. Evaọ erẹwho jọ, umu na, erythropoietin u wo oware nọ a re se albumin nọ a rehọ no azẹ ze. Sọ Oleleikristi ọ rẹ rehọ umu utioye na yọ ẹme omobọ ohwo. (9) Onaa vẹ a be rọ bẹre ahwo re azẹ ọ seba ehwẹ hrọ? Ẹro nọ a re muhọ otọ ziezi evaọ oke obẹrọ, ekwakwa ọ electrocautery (ekwakwa ẹlẹtriki nọ a bi ro ru obẹrọ nọ i re ru oria nọ a be bẹre na yamu), imu nọ i re ru nọ azẹ o gbe hwẹ kufiẹ ga hrọ họ, gbe intraoperative cell salvage (onaa nọ a re ro bru azẹ dhe oma na re ọ seba evru evaọ etoke obẹrọ). Sọ Oleleikristi ọ rẹ rehọ oghẹrẹ imu gbe idhere usiwo nana yọ ẹme omobọ ohwo.
(10) Kọ usiwo-imu nọ u re nwene azẹ osefihọ-oma o sai ruiruo eva oma emaha gbe eva etoke idudhe nọ ohwo ọ tẹ rrọ uyero uwhu-gbe-azọ? Ee. Oriruo jọ họ ọrọ ọmọ ikpe ene nọ a yẹ avọ ẹbẹbẹ ubiudu nọ a ru obẹrọ ogaga kẹ unuẹse buobu ababọ azẹ osefihọ-oma. Ẹsipito jọ nọ o re zurie gaga evaọ obọ United States, kukpe kukpe o re ru obẹrọ kẹ Isẹri Jihova buobu nọ e siọ azẹ, yọ a ruẹ no inọ ahwo a gbe bi whu te epanọ o jọ họ. (11) Obọdẹ ehri-uzi jọ nọ o be kpọ edọkita họ, adhẹẹ nọ a rẹ rọ kẹ udu nọ ọnọ ọ be mọ na o wo nọ ọ rẹ rọ se hayo rọwo oghẹrẹ usiwo nọ u je rie. Fikiere, u wuzou re Ileleikristi a jiroro oghẹrẹ usiwo nọ a te gwọlọ taure ẹbẹbẹ jọ ọ tẹ te ze. Kọ whọ jiroro kpahe oghẹrẹ usiwo-imu nọ a re ro nwene azẹ osefihọ-oma nọ whẹ avọ emọ ra wha rẹ sae rehọ no, je kere iroro nọ whọ jẹ na fihọ ekade DPA na no? Re whọ sai wo otoriẹ eme nana ziezi, romatotọ se uzou avọ 7 ọrọ obe ọ “Uyoyou Ọghẹnẹ” na gbe ebe efa nọ a fodẹ evaọ eva riẹ na. Je rri uko-obeva Odibọgba Uvie Mai ọrọ December 2006 nọ u wo uzoẹme na: “Didi Iroro Mẹ rẹ Jẹ Kpahe Eroruiruo Egẹgẹ-Esese Azẹ gbe Oghẹrẹ Usiwo-Imu nọ U Kpomahọ Eroruiruo Azẹ Obọmẹ?” Ruẹ nọ who kere iroro nọ whọ jẹ na gbagba fihọ ekade DPA ra. U re woma re whọ vuẹ amiunugu ra gbe ahwo uviuwou ra nọ e rrọ Isẹri Jihova ha kpahe iroro nọ whọ jẹ na vevẹ.
[Ẹkpẹti nọ ọ rrọ ẹwẹ-obe avọ 3]
• Kọ whọ jiroro kpahe oghẹrẹ usiwo-imu nọ a re ro nwene azẹ osefihọ-oma nọ whẹ avọ emọ ra wha rẹ sae rehọ no?
• Kọ whọ be hae wha ekade DPA nọ who kere eme fihọ gbagba no lele oma ariẹsehe, oware idudhe jọ o via?